Press "Enter" to skip to content

Aiti work order u MLA Mawlai sha ka Mawsiatkhnam Sports Club

Shillong, Rymphang 22: Kum shi bynta ban ïa don bynta lang ha ka sngi rakhe dap snem jong ka klob u MLA Mawlai u Bah PT Sawkmie u la aiti ïa ka work order bad ïa ka bol sha ka Mawsiatkhnam Sports Club na ka bynta ka jingdonkam ka jong ka.
Ïa kane ka work order u MLA u la ai ha ka kti u samla R Thabah, uba long President ka MawsIatkhnam SC ha ka jingdon ryngkat u Mac Susngi, u secretary, ki dkhot, u rangbah shnong bah K Pasi, Rangbah Shnong barim bah G Majaw, Secretary Shnong Bah Wanlamkupar Lynrah bad kiwei. Kum ka dak jong ka jinglehkmen ka Sport Club ha kane ka sngi ka la pynlong ruh ïa ka jingbamkhana bad ki khun samla jong ka Shnong.
Hashuwa ban aiti ïa ka Work Order (WO) kaba da ka pisa bad ka bol, u MLA Mawlai u la ong ba ka long kaba donkam bha ban tehlakam ïa ki khun samla, kumta donkam ban pynlong ïa kum kine ki jinglehkkmen bad ka long ruh kaba donkam ban ïai pynlong ïa ki lympung ïalehkai phutbol ha ka thaiñ.
“Nga kyrpad baphin ïa long kawei bad haba phi ong ba phi ieit ïa ka jaitbynriew, kynmaw ban ieit shuwa ïa la ka ïing ka sem, ka shnong ka thaw, ki marjan marpa, naba kumno phin ieit ïa ka jaitbynriew haba ïa ki jong la jong phim ieit, kumta ka long kaba donkam ba phin ieit shuwa ïa kine ki jong la jong” ong u MLA.
Haba pynkut u la kyntu ïa ki ba kin ïa long ki samla kiba don akor bad kiba burom. Ha ka juh ka por u pyntip ruh ba shen ka Mawsiatkhnam SC kan sa pynlong ïa ka phutbol tournament.