Press "Enter" to skip to content

“ Ïa ka Ram jongphi la dep siew palat ïa ba la dei ban siew ”

weekly column
“Ki Symboh ka jingim”

Ka dkhot Bible na bynta mynta ka sngi
“Nga, ma nga hi, nga long uta uba pyndam noh ïa ki jingryngkang jong me na ka bynta ïa lade hi; bad ngan yn kynmaw ïa ki pop jong me” Issiah 43:25

nga ngeit ba kan long ka khubor Babha, kaba kyrpang na ka bynta jong phi mynta ka sngi! Wat lada ma nga bad ma phi ngi hap ban siew ïa ka dor sha U Blei, ïa kata ka ram jong ka pop kaba ngin ym lah da lei lei ruh ban siew, hynrei U Jisu u la siew na bynta jong ngi ïa kane ka ram. Shah shkor bha, paralok baieit jong nga, namar kaei kaba U Jisu u long bad ka dor bah jong uta uwei u briew, ka dor kaba u la siew naka bynta jong ki pop jong ngi, ka la long palat ban ïa kaba ngi dei ban siew. Baroh ki nongpop lada lum lang ïa ka dor jong ki yn ym lah ban tam ïa ka dor jong une uwei u briew. U la siew kham palat eh ban ïa kaba la dei ban siew bad ba ngin ym donkam shuh ban siew ïa kane ka ram ha kata kaba ngi ym lah ban shemphang shuh sa shisien pat!
Shah ngan ringdur ïa kaei kaba nga mut. Mutdur, ba phi la shim ram ba T. 50,000/-(sanphew lak) na u Nongairam bad kumta ka por ka ïaid, bad phi shem ba phim lah shuh ban siew dep ïa ka ram. Bad ha kawei ka sngi, u paralok uba uba riewspah bha (billionaire) u la ïoh sngew shaphang ka jingdap ram jong phi bad u la siew T. 1,000,00,00/- (Shi Klur tyngka) sha u nongshahram ban pynkhuid ïa ka ram jongphi, u la siew palat ïa kaba dei; ban pynthikna ba phin ym shah ban khia shuh ha kata ka ram ha ka jingmut jingpyrkhat bad ha ka dohnud jong phi lano lano ruh, bad ba uta u nongshah ram ïaphi um don daw ei ei shuh ban pyndik ïaphi ba phin siew ïa kata ka ram jong phi.
Kane ka dei kaei kaba U Jisu u la pyndep na ka bynta ki pop jong phi da kaei kaba u la leh halor ka diengphna. Ka dor ba u la siew ka la pynkhuid lut ïa baroh ki pop ba ka jingim jong phi baroh kawei- na ka bynta kaba la dep, kaba mynta bad ruh ka ban sa wan – shi sien na ka bynta baroh phar! (Hebrew 9:26,) namar ka ktien U Blei ka ong………… ba la map noh ïa ngi na ki jingryngkang jong ngi baroh (kiba la dep, kaba mynta bad ki ban sa wan ruh) (Kolosai 2:13) Lehse ha ki por kiba la leit phim shym la don kata ka jingshemphang ïa kata ka jingpura jong kane ka gospel jong ka jingaiei, hynrei mynta, phi lah lah ban ïoh kem ïa kane ka jingshisha ka khubor babha. Mynta ka shong ha phi ban ngeit ïa kane ka khubor. Phi lah ban jubab da ka jingbymngeit, da kaba kylli, “Hato phi la tikhna? nga la don ïa kane ka ram la slem bah, bad mynta phi ïathuh ïa nga ba la dep ban siew lut ïa kata ka ram baroh?” Ne phi lah ban pyrta, “Hallelujah!” bad leh kmen halor kane ka jingai sngewbha ba phim dei hok ban ïoh, kaba la siew dep pura ïa ka ram jong ka pop halor ka diengphna!
Paralok, namar kaei kaba u Jisu u la dep ban siew ïa ka ram jong ka pop jong phi halor ka diengphna, phi tip kaei phi leh man ka por ba phi shah ïa kata ka ram ba kan wan dawa biang iaphi ha ka jingsngew jongphi? Man la ka por ba phi snoh biang pat ïa kata ka jingsngewpop kaba la dep jongphi, phi la ibein noh ia ka dor kaba u Trai Jisu u la dep ban siew dep na ka bynta jong phi. Ka long kumba phi ong: “em kam pat biang”. Ka long kumba phi ong em “tang” kaei kaba U Jisu u la leh halor ka Diengphna kam pat biang satia. Hato phi tip kaei kaba jia? Phi ibeiñ ruh ia uta uba la pdiang ia kata ka ram jong ka pop ba la dep ban siew naka bynta jong phi. Ba man ka por ba phi pyrshang ban siew dep ia kata ka ram kaba la dep siew lypa, phi pyrshang ban ong ba U Blei um pat hun bad kaei kaba U Jisu u la dep ban siew na ka bynta jongphi wat hadien jong ka jingshisha ba U Blei, u la hun palat ia kaei kaba U Jisu u la dep ban siew kham palat. U Jisu u long u khun uba ieit eh jong U Blei. Kumno ka lah ban long ba phin ong ba kata ka Jingknia jong u kam pat biang!?
Hato ka don jingktah ne em? lada phin pynrem ialade bad shah ia ka pop jongphi ban bat ia ka jingmut jingpyrkhat jongphi wat hadien ba U Jisu u la dep ban siew kham palat ia ka? Hooid, ka long kaba ktah jur, namar ba nalor jong ka jingbym burom ia kaei kaba U Jisu u la leh halor ka diengphna, kata ka jingiai bat ia ka pop kan pynlong iaphi ba phin nang jngai na U Blei bad kan wanrah hapoh jong phi ia ka jingpynrem, ka jingpang, jingshitom, jingnoh mynsiem kiba dei ka jylli jong ka pop!
Paralok, U Jisu, uba dei u khun U Blei, u la dep ban siew na ka bynta baroh ki pop ba dei ha ka jingim jongphi- shisien na ka bynta baroh! Ngeit ia ka khubor babha bad tur sha jan jong u Nongpynim jong phi mynta ka sngi! Ka ktien U Blei ka pynbna sha phi ba phi lah ban ioh “ Ka jingshlur ban rung sha ka jaka ba kyntang da ka snam jong U Jisu “ (Hebrew 10:19) Mynta ka sngi, hakhmat jong kano kano ka jingeh kaba phi lah ban donkam ia ka jingiarap, phi lah ban tur shajan jong U Blei da ka dohnud kaba shisha da ka jingngeit kaba skhem, ha kaba synreit ia ka dohnud jong ngi na ka jingiateplem ba sniew, kata ka jingsngew jong ka pop bad pdiang ia ki jingisynei bajem, ka jingaiei, bad ka jingiarap na ka bynta baroh ki jingdonkam (pule Hebruew 10:22, 4:16)

Ka mat jingpuson mynta ka sngi
Ka jingsiew ba kham palat da ka dor ka snam jong
U Jisu kala sait noh ia ka jingim ha ka pop-
Kaba la dep, kaba mynta bad ka ban sa wan- shisien na ka bynta baroh !
Ka jingduwai mynta ka sngi
Ko Pa, nga Ainguh ia me; ba U Jisu u dei u khun uba me ieit eh, Ka jingknia jong u halor ka diengphna ka la siew palat ban ia kaba la dei ban siew na ka bynta ki pop jong nga ha baroh kawei ka jingim pop – ia kaba la dep noh, kaba mynta bad ka lashai- shisien na ka bynta baroh! Khublei shibun Kynrad, ba ym don kawei pat kaba lah ban pynkylla ia ka jingshisha kaba Me la pdiang hun ia kaei kaba U Jisu u la dep ban siew ia ka dor halor ka diengphna ba ba kan ym don shuh kano kano ka jingdonkam ban ngan dang bah ia kane ka ram jong ka jingsngew pop pyrshah ia Me, sa shisien. Nga leh kmen, ba ngan lah barabor ban wan da ka jingshlur hakhamt jong Me ban pdiang ia ka jingleh sbun bad ka jingpyndap jong Me ia baroh ki jingdonkam jong nga. AMEN
(Dkhot Bible: Roman 4:6-8, 5:1-2, Kolossai 2:13, 1 Ioanis 1:7, Ephesos 1:7, 2 Petros 1:9)