Press "Enter" to skip to content

Leit pan pisa ruh ngin eksamin leit pan ILP ruh ngin eksamin lano yn mih result?

La sngewthait ban ïoh sngew ïa kajuh shi kajuh ka jubab man ba leit ïa kynduh u myntri rangbah bad ka kynhun ïa ki myntri sorkar pdeng ha nongbah Delhi namar ka jubab ka long beit “ Ka sorkar pdeng kan sa shim khia bad bishar bniah bad eksamin ïa kane ka kam”.
Lada u myntri rangbah u leit rah ïa ka shithi ne ka dorkhast ban pan pisa kaba dei ka bhah jongka jylla hi na ka sorkar pdeng lyngba ki khajna, ka jubab ba ai da ka myntri ka tnad kam pla tyngka ka India ka long beit yn sa bishar bniah ïa kane ka kam namar ka Meghalaya ka dei hok ban ïoh. Lada leit Delhi ha kano kano ka por bad ïa kynduh ïa ki myntri ka sorkar pdeng halor kiba bun ki skhim bad projek ruh ka jubab ba ïoh ka long beit kumjuh hi. Ha kane ka kynti kat ka Resolution ba la mynjur da ka ïing dorba thawaiñ ka jylla ban dawa ILP ha kane ka jylla ruh ka jubab ba u Amit Shah myntri kam pohïing ka ri u ai ka long beit ba ka sorkar pdeng lyngba ka tnad Ministry of Home Affairs kan sa bishar bniah bad eksamin ïa kane kane ka kam. Ka jingkylli na ki paidbah ka long eksamin shi eksamin bishar bniah shi bishar bniah lano pat kata ka result .
Ym dei ba pynshit ne tynruh tyllaw ding hynrei ka dei hi ïa ki seng bhalang bad ki paidbah ban sngew pyrshah ne kynthoh har rukom hadien ba ym shym la ïoh ka jubab kaba pynhun ïa ki na ka jingleit ïa kynduh jong u myntri rangbah bad ka kynhun ïa u Amit Shah sha Delhi myn ha ka 19 tarik mynta u bnai. Namar ki paidbah ki dang pyrkhat ba u Amit Shah un ai jingkular ba hadien ba la dep bishar yn sa ai ïa ka rai ban pyntreikam ïaka ILP ha Meghalaya hynrei ka jubab ka long beit ba ka sorkar kan sa shim khia ban eksamin ïa kane ka kam.
Kane hi ka kren shai ba ka jylla Meghalaya ka dang slem bah ban ïoh ïa ka ILP bad lada ym leit tynruh bad leit bud dien lei lei imat ka sorkar pdeng ka lah ban leh klet ban ym pyntreikam hi ruh ïa kane ka aiñ ha kane ka jylla. Kaei kaba kongsan ka long ba kane ka sorkar MDA hapoh ka jingïalam u myntri rangbah ka dei ban ïai leit bud dien beit sha Delhi na kapor sha ka por halor kane ka kam khnang ba ka sorkar pdeng kan pynsted ban ai rai. Namar khlem pep lada kane ka kut noh tang da ka jingkular ktien jong u Amit Shah, kane ka kam kan ym urlong satia hynrei kaei kaba donkam ka long ban ïoh da ka jingthoh ba shen yn sa pyntreikam ïa kane ka aiñ ha ka jylla .
Namar lada ïoh da ka jingthoh ki paidbah bad ki seng bhalang ruh kin hun bad kin nym don shuh kino kino ki jingïakhih ha kane ka jylla ruh hynrei lada ba ym ïoh da ka jingthoh ki seng bhalang ruh ki la byrngem ban sa pynjur ïaki jingïakhih. Haba jur ki jingïakhih shah ktah lut pat ka jylla nadong shadong, naduh ka jingpule ki khynnah skul, ki samla pule, ka jinghiar ka kam jngohkai pyrthei, ka jingthut ka shongsuk shongsain, ka jinghiar ka khaïi pateng, ka jingkiew dor ki mar bam mar dih bad ter ter.
Kumta khnang ban lait na kine kiei kiei baroh kaba kongsan hi ka long ba kane ka sorkar kan leit dawa na u myntri kam pohïing ka ri ban ai da ka jingthoh ba hadien bala dep bishar bniah yn sa pyntreikam ïa ka ILP ha ka jylla.
Nalor kata ïa mynta shipor kat ba ym pat ïoh ïa ka ILP ka sorkar jylla ka la dei ban pyntreikam pyrkhing noh ïaka Meghalaya Residents Safety and Security Act (MRSSA) namar kane ka aiñ ruh ka long kum ka ILP hi. ïa kiba kwah ban wan sha ka jylla Meghalaya ki hap ban register ïa ki kyrteng jongki bad pynpaw ruh katno sngi kin sah ne kin trei bylla . Hadien ba la kut lada jia ba kim pat dep kin dang hap ban sah kin hap ban pynthymmai biang. Nalor kata khnang ban ym jia kino kino ki jingïakhih, ka sorkar ka la dei ban pynsted ka jingtei ïa ki entry bad exit point ne ki khyrdop ki ban peit ïa ka rung ka mih kiwei ki jaitbynriew sha kane ka jylla Meghalaya namar lada kine ki treikam ruh ki seng bhalang lehse kin ïai ap hi ïa kata ka por ban ïoh ïa ka ILP.