Press "Enter" to skip to content

Donkam ban peit kyrpang ka bor District ïa ka jingshngaiñ ki kynthei ha Ri Bhoi

Ba la dang kynrei u drok bad ki kam sniew:

Nongpoh, Rymphang 24: Kiba bun ki riew kynthei bad ki longkmie ki ju pynpaw ïa ka jingsngewkhia ba ka jingkynrei u drok bad ki kam sniew ka la dei kawei ka bynta ba la pyntieng pynsmiej ïa ki kynthei ki khynnah ha ka leit ka wan bad kum ka bor District ka la hap ban peit kyrpang na ka bynta ka jingshgaiñ ki kynthei ki khynnah.
Ïa kane ka bynta ba la donkam ban peit kyrpang ïa ka jingshngaiñ ki kynthei ki khynnah la ju kren da kiba bun ki riew longkmie bad ki khun samla ha kaba ha kine ki sngi ka jingjur ki kam sniew bad khamtam kito kiba la ngop ha u drok ka la pyntieng kylla ïa ki kynthei ki khynnah.
U Nongthoh Khubor u Mawphor, u la ioh ruh ban ïa kren bad katto katne ki riew kynthei bad ki Longkmie, ki la pynpaw ba kum ki Longkmie ki don hadpeng ka jingtieng jingsyier ym tang ba ki khun jong ki kin ngop ha kitei ki jingdih ba sniew bad ki sngewtieng sngew syier ruh na ka bynta ka leit ka wan ki kynhun kynthei ha kaba ym lah ban tip ioh ki don ki riewsniew kiba pyrshang ban shim kabu.
Kiba bun ruh ki riew kynthei ki la pynpaw ba ka jingtieng jingsyier kam dei satia tang ha ka por mynmiet mynïong bad ka don ruh ka jingtieng jingsyier wat ha ka por ba shit ba shai, namar lada ki kam sniew bad ki samla ki dang ngop ha kitei ki jingdih ba sniew kim salia ban leh ïa ki kam sniew la ka dei ha kano kano ka por ba ki ioh lad.
Kum ki riew kynthei kiba ym kwah ban pynpaw kyrteng, ki la ong ruh kane ka jingkynrei ki kam sniew bad khamtam u drok ka la buh jingma shisha ïa ki khun samla bad bunsien wat ki khynnah kiba lui lui ki shah ialam bakla ha ka jingim. Kaba kham sngewtieng sngewsmiej ruh ha kaba ia dei bad ka jingkynrei u Drok uba la pynjot ym tang ïa ka jingim jong bun ki samla ba lui lui ha ka imlang ka sahlang, hynrei bunsien tang na ka daw ba ki la shah teh bad kyrnih ha utei u jngdih sniew kim banse ban leh ïa kino kino ki kam sniew bad ki kam kiba pynsngewsih ha ka imlang ka sahlang, la pynpaw ki Longkmie.
Namarkata, ban rad dyngkhong ïa kitei ki kam sniew bad khatam ïa u drok la donkam ba ka bor Distict kan shim khia ban thaw ïa ki lad ki lynti kumno ban khanglad ïa kitei ki kam sniew bad na ka bynta ka jingshngaiñ ki kynthei ki khynnah la donkam ruh ba ka bor District bad khamtam ka bor pulit Ri Bhoi kin khap peitngor ïa kine ki kam sniew, la bynrap ki Longkmie.