Press "Enter" to skip to content

Hadien ar phew snem la pynbna paidbah ïa ka Bataw PHC da u myntri sorkar A.L.Hek

Khliehriat Rymphang 24: Ka jaka ai jingsumar ha shnong Bataw ka,ka Bataw PHC kadei kaba la dep tei bad pyntreikam mynta la kumba ar phew snem,katba la wan ban pynbna paidbah pat kum ka Public Health Centre (Officially) myn ha ka 22 tarik mynta u bnai da u myntri sorkar u bah A.L.Hek,uba dei ruh u myntri ba peit ïa ka tnat jong ka koit ka khiah,kane ka PHC ka dei kaba ju ai ka jingshakri ïa ki khat phra tylli ki shnong kiba don ha ki thaiñ khappud ha East Jaintia Hills District.
U bah A.L.Hek,myntri ka koit ka khiah,haba kren kum u kongsan u la kyntu ïa ki paidbah jong ka thaiñ ba kin shim ïa ka kabu ban wan sha kane ka jaka ai jingsumar,khamtam ki kynthei kiba kha khyllung khnang ba kane ka jaka ai jingsumar kan nang kiew ha ka jing ai jingshakri ïa ki paidbah bad kyntu ruh ïa ki nongtrei ha kane ka PHC ba kin ai ka jingshakri kaba bha sha ki paidbah jong ka thaiñ khamtam sha kito kiba wan ban kha khyllung ha kane ka PHC,u la batai ruh ïa ki kato katne ki jing ioh jingmyntoi kiba long ki lad ai jingiarap ïa ki longkmie kiba wan ban shim ïa ki jingsumar naduh ba ki sdang ban armet haduh ba kin da kha khyllung ha ki PHC kiba dei ki skim kiba wan na ka sorkar jylla bad na ka sorkar pdeng.
Haba kren halor kane ka phang ba ïadei bad ki lad ban ioh jingiarap na ka Meghalaya Health Insurance Scheme,utei u myntri sorkar u la kyntu ïa ki paidbah ba kin pynrung kyrteng noh ha kine ki skim khnang ruh ban ioh ka lad ban kyntiew ïa ka rukom ai jing sumar kaba paka “Ha kaba na ka liang ka sorkar ruh ka shimkhia bha ban pynbiang ïa ki lad ai jingsumar katba lah na ka bynta ban kyntiew ïa ka koit ka khiah”
U bah Kyrmen Shylla,myntri ka tnat Social Welfare jong ka jylla u la kyntu ïa baroh ki nongtrei kiba trei ha ki jaka ai jingsumar ba kin shim khia ïa ka kam ban ai ka jingshakri kaba bha tam ïa ki nongwan shah sumar,u ka kyntu ruh ïa ki padbah ba kin pyn saphriang ïa kane ka khubr ba ïa ka Public Health Centre ha shnong Bataw la pynbna paidbah da u myntri ka koit ka khiah kumjuh ruh ban ïawer lang ruh ïa ki ba kin wan ban phah sumar ha kane ka jaka ai jingsumar.
Na ka liang u bah Bhalang Suchiang,Wahehshnong Bataw,u la pynpaw ka jingnsgew nguh ïa ka tnat ka koit ka khiah kaba la wan ban plié paidbah ïa kane ka PHC kaba la don mynta la kumba ar phew snem,u la buh ruh ka jingkyntu ïa u myntri sorkar ba un sngewbha ban shim khia lem ban pynbit pynbiang lem ïa ki jingdonkam kiba ïadei bad kane ka PHC khamtam ban pynbiang ïa ki dawai bad ki nongtrei khnang ba kane ka PHC kan dup lah ban ai ïa ka jingshakri kaba paka sha ki paidbah nongshongshnong jong ki khat phra tylli ki shnong ha ki thaiñ khappud kiba dang hap lang hapoh kane ka PHC ha Bataw.
Kiba la ai jingkren ha kane ka sngi ki kynthup ruh u Dr. A. War, Director of Health Service (MI), Meghalaya, Shillong,u bah Skhembor Shadap, President, Southern Border Youth Welfare Association, u bah A. Dkhar, DPM, NHM, East Jaintia Hills District, Khliehriat, Dr. (Mrs). J. Lakiang, District Medical Health Officer, East Jaintia Hills, Khliehriat, Dr. E. Lyngdoh, M&HO, I/C Bataw PHC bad kiwei kiwei.