Press "Enter" to skip to content

Buh ka Shnong Pyndengrei ïa ka Isolation centre ban ïada na u khñiang COVID-19

Nongstoiñ, Lber 25: Kum shi bynta ban khanglad na ka jingsaphriang u khñiang jingpang Corona virus, ka Dorbar shnong Pyndengrei ka la pynbna ba ka shnong ka la buh ïa la ka jong ka Isolation Centre hapoh Auxilium Care and Support Centre Pyndengrei, na ka bynta ban pynshong pynsah ïa ki khun shnong khun thaw kiba dang wan na shabar ka Jylla.
Ïa katei ka Isolation centre la ai sngewbha da ki bor pynïaid jong ka Balang Catholic Pyndengrei, hapoh ka jingpeit jong I Sister Mary Passi bad kumba long mynta, ki don lai ngut ki khun shnong jong ka shnong Pyndengrei, kiba la sah ha katei ka jaka hadien ba ki la wanphai shnong nabar ka Jylla.
I Sister Mary Passi I la ïathuh ruh ba na ka liang jong ki, kin ai tang ka kamra bad ki jingthiah kumba 10 tylli, ka jaka leit shabar bad ka um. Hynrei kiba ha ïing jong kito kiba dang wan na shabar jylla, kin hap ban pynbiang hi ïa ki mattress, ki jaiñ kup bad ka bam.
Shuh shuh I la pynpaw ruh ba ïa katei ka jaka la wan ban jngoh ruh da ka Dr. M. Bareh DM&HO, ha kaba ka DM&HO ka kular ba na ka liang jong ka tnad ka koit ka khiah, kan sa wanrah ïa ki jingda khmut (face mask) bad ïa jingsait kti (sanitizer).
Katba na ka liang jong u sordar ka shnong Pyndengrei u Bah M. Marweiñ haba ïakren bad ki nongthoh khubor, u la ong ba katei ka jaka sah ka dei na ka bynta jong kito ki khun shnong kiba trei ne kiba pule shabar kiba dang wan poi ha kine ki khyndiat sngi, hadien ka jingsaphriang jong ka khlam Corona Virus ha ka ri baroh kawei, da kaba phah sah shuwa kumba 14 sngi ha katei ka jaka kan wanrah ka jingshngaiñ ïa ka shnong ka thaw.
U la kyntu ïa ki paidbah ba kim dei ban sngewthuh bakla ha kaba katei ka jaka sah, kam dei ka jaka sah jong ki nongpang Corona. Hynrei ka dei tang ka jaka sah kaba 14 sngi ïa uno ne kano ka samla kiba wan na kiwei ki jylla, khamtam ki jylla kiba la shah ktah ha kane ka khlam bad ban pynthikna ba ki briew hapoh ka shnong kiba trei shabar ki kit lang ne em ïa utei u khñiang.
Shuh shuh u la ïathuh ruh ba kiba bun ki khun shnong kumba 100 tam ei ei ki trei bad ki pule shabar bad don ki longïing kiba ym lah ban phah sah la ka jong ka kamra namar ka jing khapngiah haïing hasem. Kumta ka shnong kam banse ban pynbiang la ka jong ka jaka sah ban ïada na katei ka khlam corona virus.