Press "Enter" to skip to content

Coronavirus : Sngewbha seh burom bad shong khop ha la ïing kyntu ka sorkar

Shillong, Lber 25 : Ka sorkar ka kynpad ïa ki paid nongshong shnong baroh ban sngewbha ban burom bad shong khop ha la ïing ha kine ki 21 sngi jongka “ Lockdown” namar ka jingpyntreikam ïa kane kam mut satia da kumwei pat hynrei kadei ka jingthmu ban khanglad ïa ka jingpur u khniang jingpang ba shyrkhei u Coronavirus sha kane ka jylla.
Haba karen ha ki lad pathai khubor u Dy Chief Minister ka jylla u bah Prestone Tynsong u la ïathuh, ka kynhu myntri kaba la ïa kynduh mynta ka janmiet ha ïing u myntri rangbah ka jylla u Conrad K Sangma ka la rai ban kyntu jur sa shisien ïa ki paidbah ban sngewbha ban shong ha la ïing lasem ha kine ki 21 sngi namar ka sorkar ka sngewsih ban ïohi bad tip ba ki dang don kiba pynkheiñ bad kiba ïa mih ban ïaleit kai, leit ïalehkai sha surok, ïa leit bam khana ha kum kine ki por.
“Namar kine ki 21 sngi ki dei kiba donkam haduh katta katta ban sumar bha ban lait na kane ka jingpang khlam ba shyrkhei tam kaba la ktah ïa ka pyrthei baroh kawei. Balei ba ka sorkar ka kyrpad ïa ki paidbah ban sumar bad shong ha la ïing namar kam kwah ban ïohi ba wat tang iwei ruh in ïoh ïa kane ka jingpang namar lada bakla tang tiak ka la pur sted bad la eh ban ïada ha kane ka jylla ruh kumba ka la jia ha kiwei kiwei ki jylla ne ki ri ka pyrthei” ong u Dy CM.
U la ong shuh shuh “ Nga da kyrpad rit ïa ki bor synshar shnong, ki nongïalam jong ki niam bad Balang bapher bapher, ki nongïalam sengbhalang, ki seng longkmie, seng samla shnong ba kin sngewbha ban ïatrei lang bad ka sorkar kumba ki la ju ïatrei baroh shi katta khnang ba ngin lah ban ïada na une u khniang jingpang uba shyrkhei tam ha ka pyrthei”.
“ Hooid ngi dang donbok haduh mynta ba da ka jingïada jong U Blei ngim pat don iwei ruh iba la ïoh hynrei lada phai mynta sha kane ka thaiñ ka la sdang pur ha Manipur bad ha Mizoram bad kane ka long ka dak ba ka la nang jan bad kumta donkam ban da sumar bha da kaba shong hala ïing lasem bad ban ym ïajan than ruh para briew” ong biang u bah Prestone.
U la ong ruh ha ka jingshisha ki sorkar kam kwah ban leh da ka bor hynrei lada ki paidbah kim sngap bad ïai pynkheiñ beit da kaba ïaid sha surok khlem da donkam, ïa lum shi jaka ne ïa leit shangkai sngewbha, ka sorkar kam banse ban leh da ki bor jongka aiñ kata ban kem bad pynshitom ïa kito kiba pynkheiñ kat kum ki kyndon aiñ bad kane kan long ha kine ki sngi ban wan.
Balei ba pynbna da ka curfew ka long kum ka jingmaham ïa ki paidbah ba lada ki don ki bym kohnguh yn kem bad set phatok namar kam myntoi ban leh ynda ka la jia hynrei dei ban leh shwa ba kan jia. Namar ka sorkar ruh kam khwah hi ïa kane ka lockdown hynrei la leh pat na ka bynta ka jingbha jong baroh lang ban lait na kane ka jingpang ba shyrkhei tam jong kane ka juk ba mynta. “Kumta sa shisien nga da kyrpad rit ïa ki paidbah ban sngewbha ban shong ha la ïing bad nga da kyrpad rit ïa ki bor synshar shnong ne ki Dorbar Shnong ban ïatrei lang bad ka sorkar ban peitngor lang ïa kane ym ban ïalehkai ïa kane ka jingpang kaba shyrkhei tam namar kaba kongsan tam ruh ka long ban shim ka jingkitkhlieh ha la marwei marwei hi ban ïada ïa lade” pynkut u Deputy Chief Minister.