Press "Enter" to skip to content

Dep screen ka Sorkar ïa palat 20 hajar ki briew

Shillong, Lber 25: Ki bor Sorkar ka Jylla kila dep ban khmih bniah (screen) ïa palat 20 hajar ngut ki briew haba ïadei bad ka jingpang COVID-19 hapoh ka Jylla baroh kawei kat haduh hynne ka janmiet sngi balang por 3 baje.
Ki bor Sorkar kila phone ruh ïa palat 13 hajar ngut ki briew kiba wan rung sha Jylla na shabar ban lap ïa ki briew kiba don ïa ki dak jingpang kumba batai shaphang ka COVID-19.
Kat kum ka kyrwoh na ka Ophis u Myntri Rangbah ka Jylla, la ïathuh ba ki briew bala dep ban khmih bniah kila kot ïa ka 20,486 ngut bad napdeng kine, haduh 15938 ki dei kiba la khmih ha Byrnihat, Ri-Bhoi District bad 1005 ngut ha Umroi Airport.
Ha East Jaiñtia Hills, ki jaka ba khmih bniah ïa ki briew ka dei ha Ratacherra bad Saitsama ha kaba la dep ban khmih haduh 324 ngut ha Ratacherra bad 5 ngut ha Saitsama.
Ha West Jaiñtia Hills, la buh ïa ka jaka khmih bniah ha Umrangsoo bad ha Dawki. Ha Dawki la dep ban khmih bniah haduh 1123 ngut hynrei ha Umrangsoo ym pat shym la khmih satia iano iano ruh.
Ha North Garo Hills, ki jaka ba khmih ki dei ha Dainadubi bad Bajengdoba bad ha kine ki jaka la khmih ïa 262 bad 283 ngut.
Ha South West Garo Hills la khmih bniah tang ha Garobadha bad haduh hynne ka sngi, la khmih haduh 1148 ngut ki briew ban pynthikna la ki dei kiba don jingpang COVID-19 ne em.
Katba ha West Garo Hills, la khmih bniah ha Phulbari, Trikikilla ki bym pat shym la khmih briew haduh mynta bad ha Dalu-Killipara kaba la dep khmih ïa 262 ngut.
Ka National Centre for Disease Control (NCDC) lyngba ka Integrated Disease Surveillance Programme (ISDP) kala dep ban khmih ïa 136 ngut ki briew kiba wan rung ha Jylla Meghalaya.
Ka Ophis u Myntri Rangbah ka Jylla ka pyntip ba haduh mynta, ym pat don satia na ki nongshongshnong ki ban don ïa ka jingpang COVID-19 bad ka Sorkar kala pyrshang kat kaba lah ban pynneh ïa kane.
“Ka lynti kaba biang eh ban iada ïa ka jingpur jong ka jingïapang ka dei da kaba shong khop ha Ïing bad kham pynjngai na ki para briew la kumno kumno ruh ha ka jingjngai ba 1 meter” ong ka kyrwoh na ka Ophis u Myntri Rangbah.
Haba pyntip ba ka Sorkar kala buh ïa ka online Self Declaration -http://meghalayaonline.gov.in/covid/login.htm bad buh ruh ïa u nombor 108 ban phone ne pan jingshai, ka Ophis u Myntri Rangbah ka ong “Ka jingïathuh hi (self declaration) ka long kaba donkam haba phi dang shu wan na shabar khamtam na ki jaka ba shah ktah ha ka jingpang”.
“Lada ngi lah ban bud janai ïa ki lynti jingiada, ngin lah ban ïaid lait na kane ka khep ba jynjar” kala ong.