Press "Enter" to skip to content

Kyrpad ka JYDS ïa ka Sorbar ban buria ïa ka bai nong jong ki nongbylla sngi

Jowai, Lber, 25: Ka Jaiñtia Youth Development Society kum kawei na ki kynhun kaba peit ïa ka khiah ka shon jong ki paidbah baduk ba rangli ka la kyntu ïa ka sorkar Jylla ba kan pyrkhat sngew synei lem ïa ki nongbylla sngi kiba shu im kamai jakpoh mynstep bad thied khaw da miet ki bym pat register kyrteng ïalade bad ka tnat Labour jong ka sorkar jylla, halor ka jingduh bylla namar ka jingkhang ïa ka leit ka wan jong ki paidbah nongshong shnong ka jylla kum shi bynta ban ïakhun ïa ka thma pyrshah ïa u khniang jingpang coronavirus.
U President jong ka Jaiñtia Youth Development Society u Samla Damanleki Lathong haba pynpaw ïa kane ka jingsngewkhia u la ong ba ka jingpynbna jong ka sorkar jylla ba kan buria shi hajar tyngka shi taiew ïa ki nongbylla sngi kiba la pynrung kyrteng ïalade hapoh ka Meghalaya Building and Other Construction Workers’ Welfare Board (MB&OCWB)jong ka tnad Labour ka sorkar jylla ka long kaba dei ban ai jingïaroh hynrei u la kyntu pat ïa ka Sorkar jylla ban wad ïa kiwei pat ki lad ki lynti ban pyrkhat lem ïa ki nongbylla ki bym don ka jingnang jingtip ban leit register kyrteng ïalade ha ka tnat Labour.
Ha kajuh ka por u la ong ba ka Seng ka kyrpad ruh ïa ka Sorkar lyngba ka tnad Pulit ba kan peit bha ïa ki briew ba pynher ïa ki khubor lamler (fake News) kiba pynlamwir ïa ki paitbah khamtam kum ha kine ki por ba ka pyrthei baroh kawei ka ïakhun thma pyrshah ïa u khniang jingpang coronavirus.
“Ngi kyrpad ruh ba ki briew kiba bam kwai kim dei bynthiew kat shaba lap khang ba ngin lah ban lehkhuid bad ban lait na kane ka jingpang kumba ka Sorkar ka ladep pynbna lyngba ka tnad ka Koit ka Khiah namarba kane ka dei ka kamram jong ngi baroh ban shim halade ïa ka jingkitkhlieh,” u la ong.
“Ngi kyrpad ruh ïa kito ki samla ba wan pule nabar ka jylla bad nabar ri ba kin ïai shah bad ban bud ïa ki kyndon ba la bthah ka Sorkar ban lait na ka jingtieng jingsmiej jong ki paidbah,” u la bynrap.