Press "Enter" to skip to content

La pynjari biang da ka Section 144 CrPC ha South West Khasi

Mawkyrwat, Lber 25: Na ka daw jong ka jinglong jingman ka Ri bad ka pyrthei baroh kawei bad na ka jingsaphriang jong u COVID-19 (Corona Virus) bad kum ka lad jingiada, ban sngewthuh, ban tip kham bniah, ban bud ryntih ïa ka jingïajngai parabriew (Social Distancing) bad home quarantine khnang ba kane ka khlam COVID-19 kan ym saphriang hapoh ka South West Khasi Hills District, da kaba ïa bud ryntih ïa ki kyndon bad jingbthah ba la ai da ka Sorkar Meghalaya lyngba ka tnad Health & Family Welfare Department.
Ka kong Isawanda Laloo, IAS, District Magistrate, South West Khasi Hills District, Mawkyrwat lyngba ka kyndon aiñ katkum ka Section 144 Cr.P.C bad ka Regulation 3 jong ka Meghalaya Epidemic Diseases, COVID-19 Regulations, 2020 mynta ka sngi ka la pynjari ‘CURFEW’ mardor ha baroh kawei ka South West Khasi Hills District naduh mynta ka sngi ka 25 tarik u Lber, 2020 haduh ka 6:00 baje mynstep jong ka 28 tarik u Lber, 2020.
Kane ka hukum kan ym kynthup ïa ka District Administration & Treasury, Security Forces bad Medical Teams kiba don duty, Wholesale & Retail Pharmacies, Police & Armed Forces, Fire & Emergency Service, MeECL, Food & Civil Supply Department, Public Works Department (PWD), Public Health Engineering (PHE) Department, Telecommunication, Banks and ATMs, Petrol Pumps, Health Services, LPG Deliveries, bad kiwei ki lad jingshakri ba donkam eh.
La ong ruh ba kane ka hukum kan ym kynthup ruh ïa ki kali ba kit ïa ki tiar ba donkam eh (essential commodities), Security Forces, Medical Equipments & Goods bad kiwei ki jingdonkam ba kyrkieh. Watla katta ruh ki dribar bad ki nongbud ki dei ban bud ryntih ïa ki jingbtah na ka bynta ka Medical Screening kumba la buh. Lada don kino kino ki jingdonkam ba kyrkieh eh ki trai kali ki dei ban leit shim permit na ka ophis jong ka Deputy Commissioner.
Ïa ki kyndon ban pynjynsur ha ki jaka ïew ynsa pyntip hadien da kawei pat ka order. Lada don ki nongshong shnong kiba shem lanot bad kiba donkam palat ïa ki marbam mardih ne ki jingdonkam ha ïing ha sem ki lah ban phone sha u District Logistic Control Room number 6033162973. Kane ka hukum kan treikam halor ki hukum ba la ai mynshuwa bad kan treikam noh shisyndon.