Press "Enter" to skip to content

Mynsaw u rangbah ba shah tynrah ha u masi

Uwei u briew uba la tip kyrteng u Kretis Skhemiew u la mynsaw da ka jingshah tynrah noh ha u masi myn hynnin ka sngi (24/3/20) hapoh ka Shnong Nongshluid bad la pynkit noh mar mar shapoh Mawsynram CHC ban ioh ïa ki lad jingsumar kiba kham kloi ha kaba ïadei bad ka koit ka khiah. Utei u nongpang ba la mynsaw u dei ruh napoh shnong Nongshluid kaba hap hapoh ka Mawsynram C&RD Block bad ruh hapoh ka jingkhmih jingpeit napoh Mawsynram CHC jongka Jylla Meghalaya.
Kaba sngewsih kalong ba hynnin ka sngi ynda kiba ha ïing kila poi hapoh Mawsynram CHC ka jubab kaba kila ioh kalong ba ymlah ban sumar namar ba ymdon doctor bad la phah noh kloi kloi ban pynkit shapoh NEIGRIHMS Hospital, Shillong na ka bynta ki jingsumar kiba donkam. Kiba haïing jong utei u nongpang haba ki tip ba hakum kine ki sngi kiba baroh kawei ka Jylla kadon hapdeng ka curfew lyngba ka jingïada kaba kyrpang na bynta baroh ki nongshong shong hapoh ka Jylla halor u COVID-19 (Corona Virus), kila pyrshang ban pan da ka kali kit nongpang (Ambulance) kaba don hapoh Mawsynarm CHC ban pynkit ïa utei nongpang shapoh Shillong hynrei na ka liang jong ki nongtrei jong katei ka CHC ruh kila kyntait ban ai ïa ka Ambulance da kaba jubab ban ong ba ka Ambulance ka la duh noh namar ba kamlong ban ïaid. Kumta ruh na ka liang jong kiba haïing mar mar ki la shimwai noh da ka Sumo napoh Mawsynram ban pynkit ïa utei u nongpang khlem da salia shuh namar haba shem kum kitei ki jingjia hynrei wat la katta ruh katkum ka jingïathuh jong ki bahaïing ki la ong ba kadon ka jingshah bat ha lynti bad shah tohkit ha ki pulit haba ki iohi ba ïaid ka kali tourist ha kum kane ka por hynrei wat la katta ruh ki pulit kila pynlait haba ki iohi ba katei ka kali ka kit nongpang.
“Hadien ba utei u briew uba la mynsaw u la ioh ïaka jingsumar kaba donkam lyngba ka NEIGRIHMS Hospital Shillong, hynne ka sngi napoh katei ka Hospital ruh ki la pynlait noh ïa u ban leitphai noh sha Shnong namar ki la iohi shai ba kam lei lei shuh ka jingmong kaba don hapoh ka met jong u lyngba ki jingsumar kaba ki la dep ai ïa u,” ong u Bah Banshai Marbaniang uwei na ki nongtrei mon sngewbha ha ka thaiñ Mawsynram. Na ka liang jong nga kum uwei na ki nong treimon sngewbha napoh ka thaiñ Mawsynram haba nga iohsngew ïa kaba kum katei ka jingjia nga dap da ka jingsngew lynngoh kaba khraw ban iohsngew ïa kaba kum katei ka jubab kaba la mih napoh Mawsynram CHC haduh ba kan wanrah pynban ïaka jingkulmar jingmut kaba khraw khamtam ïa ki paidbah kiba donkam ïaka jingïarap lyngba katei ka CHC bad nga da pynrem jur ïa ka jingbymlah jong ki nongtrei jong katei ka CHC ban shim khia ne wat ban ai ka jingsumar kaba paka wat tang ïa i jingjia ba mynsaw iba rit tam.
Ka jingkylli kaba mih mynta kalong ba shaei ki don ki doctor kiba la dep ban thung hapoh katei ka CHC lyngba ka tnat jong ka koit ka khia jong ka Sorkar Jylla khamtam ha kum kine ki sngi kiba baroh ngi ïa kynduh jingeh khamtam ha ka leit ka wan. Balei katei ka Ambulance jong ka Mawsynram CHC kaba don ïa u number ML 01 7874 kaba dang thymmai bad kaba dang shu dep ruh ban register ha u bnai June jong u snem 2019 hapoh jong u Director, National Health Mission (NHM) jong ka Sorkar Jylla ka la duh noh ne ymlong shuh wat ban pynkit nongpang bad balei ba lada kalong kumta, hato na ka liang jong ki nongtrei kim lah seh mar mar ban shimkhia ban pyntip shapoh ophis na ka bynta ban ioh lad ban pyndonkam biang iaka. Shano ruh ka Ambulance 108 kadon mynta haba iohi ba don kum kitei ki jingjia, hato ki nongtrei jong katei ka CHC kim lah seh ban bthah da kaba pynkitnoh da ka Ambulance 108?. Kane kan wanrah pynban ïa ka jingduh jingmyntoi kaba khraw ia ki paidbah nonghong shnong jongka thaiñ baroh kawei haba phai ha ka liang jong ka koit ka khiah.
Haba phai khyndiat ïa kaba la dep noh haba iohi ïa kawei pat ka Ambulance jong ka Mawsynram CHC kaba don ïa u number ML 01 6032 kaba dei napoh ka ophis jong u DHS – cum – Jt. Mission Director jong ka Sorkar Jylla, la shu ieh khongreng haduh kat mynta kine ki sngi naduh ba la dep ban jia aksiden naduh u snem ba la leitnoh khlem da lah ban leh eiei shuh ne wat ban pynbha pat ïaka haduh ba ka la long ka jingduh nong kaba khraw bad duh jingmyntoi ïa ki paidbah nongshong shnong jong ka thaiñ Mawsynram haduh kine ki sngi wat hadien ruh ba la ioh pat da kawei ka Ambulance hapoh katei ka CHC.
Watla ym iohlad ban ïakynduh ïa ki bor ba dei peit jong ka tnad ka koit ka khiah jong ka Jylla, hynrei nga kyntu jur ïaki ba kin shimkhia da kaba thawlad kumno ban wanrah ïa ka jingmyntoi da kaba ïarap ïa ki paidbah jong katei ka thaiñ khamtam ha kaba ïadei bad ka koit ka khiah kum ha kine ki sngi kiba baroh ngi tipshai ba balei ngi donkam ïa ka koit ka khiah. Bad ha kawei ruh ka bynta ba lada katei ka CHC kamlah ban ai ïa ka jingshakri sha ki paidbah nga sngew ban ong ba kam don jingmyntoi ban plie ïa ka bad ruh na ka liang jong ka tnad ka koit ka khia jong ka Sorkar Jylla kan sngewbha ban khang shuwa ïa ka shipor khamtam lada ymlah ban pynbiang ïa ki nongtrei naduh ki Doctor, Nurse bad kiwei kiwei katkum ka jingdonkam haba don ka jingdawa na bynta u paidbah jong katei ka thaiñ.
Na ka liang jong nga, nga ai khublei ruh ïa u MLA jong ka Mawsynram Constituency Bah H. M. Shangpliang uba la kloi ban shimkhia wat hapdeng ipor iba lyngkot da kaba ïarap ïa katei ka longing kaba la ïakynduh ïa kane ka jingjia bad ruh nga da kwah eh ba na ka liang jong u kum u nongmihkhmat jong ka thaiñ un shimkhia lem ban khmih ïa ka jingtreikam jong ka Mawsynram CHC khnang ba ki paidbah kin nym ïa kynduh jingeh na ka por sha ka por.