Press "Enter" to skip to content

Palat spah ïing bym don bam shuh tang ha Mawlai bad Nongkrem

Ailad ïa kiba don dukan ha Iewduh ban sei noh ïa ki marbam:
Shillong, Lber 25 : Ka jingkhang shnong ha kine ki khyndiat sngi ha ka nongbah bad ha ka jylla baroh kawei ka la poi haduh u pud ba ki la don palat spah tylli ki longïing kiba ym don shuh ka bam ka dih, kata ruh tang ha u pud u sam jong ka Mawlai Town Durbar bad Nongkrem constituency.
Katkum ka jingïathuh jong u Rangbah Shnong ka Iewrynghep, Bah Herlambok War na ka liang ka Mawlai Town Durbar mar ia ïoh ïa ka jingtip halor ka jingdon ki longïing ki bym don bam shuh mardor ki la leit ban buddien kylleng kylleng ryngkat ka jingdonlang ki nongïalam shnong.
“Ngi la ïoh pdiang bun bha ki jingujor hadien ba ka sorkar ka pynbna ba khang dam syndon ïa ka jylla baroh kawei. Watla ngim pat ïoh pdiang lut, hynrei lada kheiñ kyllum tang hapoh u pud u sam jong ka Mawlai Town Durbar ki la don palat 100 tylli ki longïing ki bym don bam shuh,” u la ong da kaba bynrap ba bun na kitei ki longïing kidei kiba shu bylla sngi, bylla mynsngi thied bam mynmiet bad katba kin da wanphai ïing ki dukan ki la khang lut.
Shuh shuh u la ïathuh ba halor katei ka jingjia, mardor ki la pyntip ruh sha u Block Development Officer ban leh ïa kaba donkam.
Utei u rangbah shnong u la ong ruh ba kaba ki isyier mynta kadei ïoh ba lada kam don ka jingpynpoi biang por ïa ki marbam ka lah ban poi haduh u pud ba tang na ka jingthngan ki paidbah kim banse ban thom ïa ka sang ruh.
U la kyntu ruh ïa ka sorkar ba lada ka pynpoi ïa ki marbam kadei ban pynpoi ha ki shnong khnang ba ki paidbah kin ym donkam ban leit na kawei ka shnong sha kawei pat ban leit thied bam.
Ha kawei pat ka liang u la kyntu ïa ka sorkar lyngba ka ophis jong ka Deputy Commissioner ba kan ailad ïa kito kiba don dukan ha Iewduh ba kin ïohsei noh ïa ki marbam na ki kudam bad dukan jong ki khnang ba kin ïoh ban die pat ha la ki shnong ki shnong. “Da kaba leh kumta, ki nongdie ruh ki ïohnong bad ki paidbah ruh kin ïoh ïa ki marbam.”
Haba bynrap lang, u Rangbah Shnong ka Kynton Massar, Dr. Marco Mitri u la ïathuh ba ha ka jingkynduh ïa ki trai dukan kiba don ha Mawlai, ki la ïoh jingtip ba ki marbam kiba don ha ki dukan kin ym neh shuh wat tang arsngi ruh.
Kumta, halor kane, u la ong ba ki la bthah ia baroh ki trai dukan ba kidei ban die khutia noh ïa ki marbam ym ban die lut ïa kaba ki don baroh tang ha uwei ne arngut kiba don pisa khnang ba kiba duna ka jingïoh ruh kin ïoh thied lang. Nalorkata, u ong ruh ba ka Durbar ka la bthah ruh ba ki dukan kim dei satia ban die tam na ka dor kaba la buh.
Ka Durbar ka la kyntu ruh ïa ki bor sorkar ba kin pynpoi noh kham kloi ïa ki marbam sha ki shnong khnang ba ki dukan shnong ryngkat ka jingtip ki bor shnong kin ïoh ban die noh pat sha ki paidbah.
Ha kawei pat ka liang u kyntu ïa ki bor sorkar ba kin ai jingbit noh ïa ki dukan rashon kiba la poi ki marbam ba kin sam noh khnang ba ki paidbah ki bym don bam shuh kin ym khuslai ne rit mynsiem.
Shuh shuh u ong ruh ba ki bor sorkar ki dei ban syllok lang bad ki bor shnong ban pynbiang ïa ki marbam ha kito ki longiing ki bym kot bor shuh ban thied ïa ki marbam mardih kaba mih na ka daw ba bun ki nongbylla sngi kim ïoh shuh ban leit bylla.
Lah ban kdew hangne ba tang ha Mawlai Town Durbar ki la don haduh 17 tylli ki Dorbar Shnong ha kaba ka jingbun briew ka la kot lak ngut ki nongshnong shnong.
Na ka liang u MLA ka Nongkrem, Bah Lambor Malngiang u la ïathuh ba katei ka jingkyrduh bam ka la sdang ban ktah wat ka constituency jong u ha kaba bun ki longïing ki la ud. Halor kane, u la ïathuh ba u la dep kren ruh ha ka sorkar ba kumno ka dei ban shimkhia mardor khnang ban teh lakam ïa ka jingsyier bad ka jingkhuslai jong ki paidbah ym tang ha constituency jong u hynrei wat ha ka jylla baroh kawei.
“Na ka liang ka sorkar hi ka la dep shim ïa kaba bha tam bad kumta nga kyntu ïa ki paidbah jong ka constituency bad jong ka Jylla hi baroh kawei ba phim dei ban khuslai ne tieng,” u la ong.
U la ong ruh ba kum ki nongïalam ka sorkar ki la dep tip lypa kaei kaba ki dei ban leh ha kum kine ki por bad kumta, shen na ka liang ka sorkar kan sa pynpoi ïa ki marbam ha ki shnong ki thaw.
Shuh shuh utei u MLA u la kyntu ruh ïa ki paidbah ba kin bud pyrkhing ïa ki jingbthah jong ka sorkar khnang ba kin lait na ka jingsaphriang jong utei u khñiang Coronavirus u ba la pynshyrkhei ia bun ki ri ka pyrthei kynthup ïa kiba bun ki jylla jong ka ri India.