Press "Enter" to skip to content

Shimkhia ka DC ban pyntreikam ia ki jingbthah ban ïada ia u Coronavirus

Nongpoh, Lber 25: Ban pyntreikam ïa ka pakhang shnong ba la pynjari da ka sorkar jylla bad ruh na u Myntri rangbah ka ri India, ki bor District ka Ri Bhoi ki dang iai bteng ba shim khia na ka bynta ban shim ïa ki lad jingïada na ka jingpur u Coronavirus bad ha Ri Bhoi District la tehlakam naduh ka jingmih ki paidbah sha ki jaka paidbah bad ruh ka jingmih ki Kali paidbah sha ki surok kaba long shi bynta ban ïada na ka jingsaphriang u khniang jingpang Coronavirus.
Kum ban pynkynmaw, ka sorkar jylla ka la khot pakhang shnong haduh 5 sngi kata naduh ka 24 tarik u Lber haduh ka 29 u Lber, 2020 bad la pynlait tang ha ka 26 tarik u Lber bad na ka liang u Myntri Rangbah ka ri, u Narendra Modi ruh u la pynjari ban khang ha baroh ka ri kata haduh 21 sngi, kaba dei hi ka jingshim khia ki bor sorkar kumno ban ïada na ka jingpur sted u khniang jingpang ba la tip kum u Coronavirus lane u COVID-19.
Haba ïa kren bad ka Deputy Commissioner ka Ri Bhoi District mynta ka sngi ha ka ophis treikam jong ka ha Nongpoh, ka Kong R.M Kurbah ka la ong ba kum ka bor District ka dang kyrpad jur ïa ki paidbah ban kin ai kata ka jingiatrei lang bad ki bor sorkar na ka bynta ban ïada na k ajingpur sted une u khniang jingpang bad na ka liang ka bor District ruh ka la shim khia kumba la btah da ka sorkar ban thaw ïa ki lad jingiada bad ban iada na ka jingpur utei u khniang jingpang ka sorkar ka donkam ka jingiatrei lang ki paidbah ka District bad ka jylla hi baroh kawei.
Ka la ïathuh ruh ba ba na ka liang ka bor District ka la shim khia ruh ban tehlakam na ka bynta kito ki briew kiba wan na shabar ka jylla ba ki dei ban test shuwa lane ki dei ban register ia lade lyngba ka Online website ba la buh da ka sorkar Meghalayaonline.gov.in/covid bad haduh mynta ki la bun hi kiba la sngewthuh bad ki la register ia lade ha ka website bad na ka liang ka Medical surveillance committee kan suk ban buddien bad ruh ban pynshai katkum ki kyndon ba ki de ban leh hadien ba ki la wan rung sha ka jylla na ki jylla ne ki ri ba shabar.
Ha kawei ka bynta, ka la ong ruh halor kane ka pakhang shnong ka sorkar jylla bad wat ka sorkar kmie ba la mana ban shong ha la ki ing ki sem, na ka liang ka bor District ruh ka la shim khia ban tehlakam da kaba btah ban kem ne bat ïa kito kiba mih shabar ne wat ki kali paidbah kiba khlem da ioh bor na ka sorkar.
Haba phai sha ka jingpakhang shnong ka sorkar kmie haduh 21 sngi ban shim ia ki lad jingiada na ka jingpur u khniang jingpang Coronavirus, ka deputy Commissioner, ka Kong R.M Kurbah ka la pyntip ruh wat ha kaba ia dei bad ki maram mardih ruh lyngba ka tnad supply la shim khia bad ka jingbhah ia ki marbam lyngba ka PDC la dep pynlait haduh u bnai Lber sha baroh ki shnong ki thaw ha ka District lyngba ki Wholesaler ne Dealer bad ia kaba sah pat ka bor District kan dang shim khia shuh shuh nangne shakhmat.
Ka la pyntip ruh ba lada don kino kino ki kam ba kyrkieh bad kiba ym lah ban kiar kaba dei ka kam iap kam im jong ki paidbah, ki paidbah lada ki donkam ki lah ruh ban phone ha kine ki herlpline number 1077 or 03638232028.
Namarkata, ha kane ka pakhang shnong ka sorkar, ka DC ka Ri Bhoi ka Kong R.M Kurbah ka la kyrpad jur ïa ki paidbah ne ki shnong ba kin ai kata ka jingiatrei lang bad na ka liang ka bor District ruh ka la shim khia ba kino kiba ïaleh pyrshah kin shah kem ne sha pynshitom katku ki kyndon ka ain, ka la bynrap.