Press "Enter" to skip to content

Coronavirus : Imat hap shu sympat ban pynkohnguh !!!

Ka Jylla Meghalaya kadei kawei na ki jylla ka Ri India kaba dang donbok shaba palat namar haduh mynta ym pat don satia uwei ruh u nongpang u ban ïoh ïa ka jingpang coronavirus, ka jingpang khlam kaba la pynshyrkhei ïa ka pyrthei baroh kawei kynthup ïa bun ki jylla kiba don ha ka Ri India. Ka Meghalaya kala shimkhia ia baroh ki lad jingiada bad ki jingbthah ban tehlakam ia ka jingpur jong une u khniang bad donbok ruh ba kan iai long ka Jylla kaba lait na kane ka jingpang. Hynrei, imat ban poi sha kane ka thong, ka long kaba i donkam ban pyndonkam sa ia u dieng sympat ban pynkohnguh ia ki nong shongshnong ba kin bud ryntih ia ki jingbthah ym ban pynlong kamkai ne pynlong kam thamula.
Ka Sorkar Jylla kala shim ia bun ki sienjam ban tehlakam ia ka jingrung jong une u khniang jingpang hapoh ka Jylla..kala khang khyrdep ia ki jaka pule, ki jaka jngoh kai, ki jingialum paidbah ha ki lympung bapher bapher ne wat haduh u pud ban pynjari da ki kyndon aiñ ki ban pynshongkhop ia u nongshongshnong ha Iing ha sem ba kin lait na ka jingiabit bad long ki nongpynsaphriang. Ka Sorkar kala pynmih ruh ia shibun ki jingbthah kiba kyntu ia ki paidbah ia kaei kaba dei ban leh bad kaei ka bym bit ban leh kum ka jinghap thet kti da ka sabon man ka por, ban nym pyniajan than para briew bad kiwei kiwei.
Ki Nongshongshnong ka Jylla ki dei ban sngewthuh bad shemphang ba ka Sorkar Jylla kala shim ia kine ki sienjam baroh ym ba kan pynmyntoi ia ka hynrei ban ai jingiada ia baroh na ki jingma jong kane ka jingpang. Baroh ki tip ba ka jing pang Coronavirus kam dei ka jingpang kaba ktah tang shimet, hynrei ka dei kaba iabit bad kaba iabit sted bha bad lada ym lah ban phikir ia kan, ka jingtim kan wan hap ym tang ia kawei ne ka ar ki Longiing hynrei ia ka imlang sahlang bad ka Jylla baroh kawei.
Ka Sorkar India bad Sorkar Meghalaya kala leh ïa kaba dei eh ban ïada ïa ka jingim jong ki paidbah nongshong shnong da kaba pynjari ia ka hukum khang dam ia ki Shnong ki Thaw (Lock Down) kum shi bynta ban ïakhun thma pyrshah ïa ka khlam jong u Khñiang jingpang Corona Virus uba la dkhat ia palat 28000 hajar ngut ki mynsiem briew ha kylleng ka pyrthei baroh kawei.
Watla ka Jylla Meghalaya kam pat don satia haduh mynta ia ki Nongshongshnong ba kit ia une u Khñiang jingpang uba la sar kum ka khlam hynrei ka Sorkar Jylla ka la shim ïa ka sienjam ha ka por kaba biang shwa ba ki nongshong shnong kin ngat ha kane ka jingpang kaba ïabit na uwei sha uwei pat. Ha ka thaiñ Shatei Lammihngi la lap ba kat haduh mynta dei tang iarngut na ka Jylla Manipura bad Mizoram, katba ha iwei ha ka jylla Assam la pynthikna pat kham hadien ba ka dei tang ka jingsuba. Namarkata, ka donkam bha ïa ka Sorkar jylla ban tehlakam bad ban pyrkhing bha ïa ka rung ka mih jong ki briew ba na shabar.
Hooid ka jingpynjari ia ka hukum khang dam ia ki Shnong ki Thaw kala ktah shi katdei eh ia u paid nongshongshnong ym tang ha Meghalaya hynrei ha ka ri baroh kawei hynrei kane ka jingkhang dam ka dei ka sienjam bala shim na ka bynta ka jingshngaiñ jong baroh ki Nongshongshnong ym namar kino kino ki daw. Ka Sorkar India ne Sorkar Jylla kan kloi mo ban shu buria kai ia ka pisa ha ka ban pyndap pynbiang ia ki jingdonkam u paidbah ba manla ka sngi lada kam dei namar kane ka jing pang.Hap sngewthuh ia kane ba ka dei ka dawbah halor ka iap ka im ym tang jong ki shimet shimet hynrei jong ka imlang sahlang, ka Jylla bad ka Ri baroh kawei.
Ka Sorkar kala pynlut kyrhai ka pisa ban ialap paidbah ha ka ban pynsngewthuh ia ki jingbthah bala pynmih bad ki Nongtrei Sorkar jong ki Tnad treikam bapher bapher kila treikam miet la bad sngi khlem shongthait ha kaban pynthikna ba kane ka jingpang kan nym ioh rung satia hapoh ka Jylla. Hynrei long leh nohei kine ki jingshimkhia jong ki bor Sorkar namar u paidbah nongshongshnong ka Jylla u dang pynlong kamkai haduh mynta ia ki jingbthah bad u dang shim ia ka hukum khang dam ia ki shnong ki thaw tang kum ki shuti ban ioh leitkai sngewbha pynban shane shatai.
Kane ka jingpynlong kamkai jong u paidbah kala paw tyngkreiñ na ki video bala pynsaphriang lyngba ki Social Media-kiba pyni ia ki paidbah ba ki iaid ki ieng beit hala ka mon bad ki shang dala ki jong ki kali shaneng sharum khlem ka jingpyrwa. Kane ka jingleh mon ka dei ka daw bah ba la pynbor ia ki Pulit ban hap ai jingsneng-donbok hangne ba ka jingai jingsneng ka dang long tang da kaba shu shah pynkynthih jakoid bad shah pynieng pynshong.
Ka jingbthah jong ka Sorkar ban pyniajngai na ki para briew (social distancing) ruh ka dei kawei ka jingbthah kaba la pynlong kamkai bha da ki paidbah bad ia kane la iohi dang hynne ka sngi ba plie ia ki iew marbam ba kumno ki paidbah ki pynieng laiñ da ki borni bad ki pla khung katba ialade pat ia muja ban iathuh khana bad ia bam kwai iadih duma sahuh bad ki marjan marpa.
Ka Jylla haduh mynta kam pat long satia ka Jylla kaba la khreh ban iakhun ia kane ka jingpang lada kala ioh ban rung khlieh hapoh ka Jylla bad kumba ka long haduh kine ki sngi, ka jingpynkhreh jong ka Jylla ka dang long tang ia ki lad jing iada. Ka Sorkar Jylla da lei lei kan nym lah ban iakhun tang marwei ia ka jingpur jong kane ka jingpang lada kam don ka jingiatreilang jong u paidbah uba hap ban rai mynta la u kwah ban im ha ryngkat kane ka jingpang kaba ap hakhmat ne kwah ban im ha ka sawdong sawkun kaba lait na une u khniang. Ka jinglong jingman kumba ka long ha Jylla, kala dawa ia ka Sorkar Jylla ban leh noh da kaba tyngeh bad ban pyndonkam noh ia ki dieng sympat ba bun jait jong ka ban khyrwit ia kiba pynlong kamkai ia kane ka jingpang wat ban shim ia u pud ban shu set beit ha along khnang ba kin nym long ki jingma ia ka imlang sahlang bad ka Jylla baroh kawei.