Press "Enter" to skip to content

Dawa ka KSU ban pyrrkhing ki bor Disrtict ia ki jingbthah ban lait ka jingpur u Coronavirus

Nongpoh, Lber 27: Hadien ba ka sorkar jylla kumjuh ruh ki bor pynïaid district ka Ri Bhoi District ka la ailad ïa ki paidbah ban leit thied ïa ki marbam mardih bad kiwei kiwei ki jingdonkam da kaba ailad ban plie ïa ki dukan die marbam mardih ha kylleng ki jaka jong ka Ri Bhoi District, hynrei kane ka jingailad ïa ki paidbah ban mih sha surok ka la wanrah pynban ïa ka jingtieng jingsmiej pynban ïa ka imlang ka sahlang tang namar ka jingbym burom da ki paidbah ïa ka jingbthah ba la pynmih na ka por sha ka por.
Kane ka jingbym burom bad ka jingbym kohnguh da ki riew paidbah ïa ka jingbthah ka sorkar ka la long halor ka jingbym kohnguh ki paidbah ban ïa jngai I wei na I wei pat haba ki leit ban ïa thied jingthied na kino kino ki dukan ne ki jaka die ïa ki marbam mardih bad kane ka lah ban buh jingma pynban ïa ka imlang ka sahlang halor ka jingïohlad ban saphriang pat u jingpang Corona Virus lane COVID 19.
Halor kane ka jingshem, na ka liang ka KSU Byrnihat Circle mynta ka sngi tang mar ïa ïoh jingtip halor ka jingplie ïa ki dukan die marbam mardih, ki nongïalam lem bad ki dkhot ka seng ki la leit ban mih sha ki katto katne tylli ki jaka die marbam mardih bad ban shem pat ïa kum kane ka jingpynkheiñ jong ki paidbah halor ka jingbthah ka sorkar na ka por sha ka por ha kaba ïa dei bad ka jingpynïajngai u wei na u wei pat kaba long kumba 1 meter eiei.
Ha kane ka jingleit ban jurip da ki nongïalam ka KSU, Byrnihat Circle la lap ruh ba ka la don ka jingshimkabu da ki nongdie jingdie kiba la pynheh ïa ka dor ka mur jong ki mar ki mata bapher bapher khamtam ki jhur ki jhep ha kaba kane ka jingshim kabu da ki nongdie jingdie ka la buh jingeh shikatdei ïa kito ki longïng ba duk ba rangli ki bym kot bor ban thied ha ka dor ba la buh da ki nongdie jingdie.
Haba pyntip sha ki Lad pathai Khubor, na ka liang u Bah Wanphrang Mawthoh, President ka KSU, Byrnihat Circle, u la pynpaw ba ka seng hi ka dap da ka jingsngewbynniaw kaba jur ban sakhi ba ki paidbah hi kim shem la shimkhia ban kohnguh ïa ka jingbthah da ka sorkar jylla na ka bynta ka jingïada ïa ka jingsaphriang jong u jingpang ba shyrkhei ba la tip kum u Corona Virus u ba lah ban ïada tang na ka jingpynïajngai na u wei u briew sha u wei pat.
“Kumba la sakhi mynta ka sngi, ba ka sorkar jylla kumjuh ki bor ka district ki la ailad ïa ki paidbah ban leit thied ïa ki mar ki mata sha iew sha hat, hynrei kane ka la wanrah pynban ïa ka jingbym shngaiñ ïa kiba bun balang tang namar ba ki riew paidbah kim shem la burom satia ban kohnguh ïa ka jingbthah kaba na ka por sha ka por, ban ïa ieng jngai I wei na I wei pat, kane ka pynpaw ba ki paidbah kim shimkhia lane ki kheiñ sting ïa kane ka jingpang Corona Virus kaba la pynkhih win ïa ka pyrthei hi baroh kawei”, pynpaw u Bah Mawthoh.
U Bah Wanphrang Mawthoh kum u nongïalam ka KSU, u la pynpaw ruh ïa ka jingsngewkhia kaba jur halor ka jingmih pyrthei pat sa ki riew shimkabu ïa kum kane ka jinglong jingman jong ka pyrthei da kaba pynkiew dor jubor ïa ki mar ki mata, ki marbam mardih bad ki jhur ki jhep kaba ktah shikatdei ïa ki paidbah khamtam kito kiba wan na ka longïng baduk ba rangli, ha kane ka jingshem ba mynta ka sngi, ki dkhot ka seng ki la leit ban ai jingmaham kaba tyngeh ïa kito ki nongdie jingdie kiba la die palat pud ban ïa ka dor ba la buh ryntieh.
Halor kane, na ka liang ka KSU ka la kyrpad jur ïa ki bor district kumjuh ruh ïa ki bor pulit ka Ri Bhoi ba kin peit pyrman bha bad ruh ban shimkhia ban buh da ki briew jong ka aiñ kiban pyrkhing ïa ka jingpynkheiñ lane ka jingbym burom jong ki paidbah ïa ka jingbthah ka sorkar ha ka liang ka jingpynïajngai I wei na I wei (Social Distancing) ha ki iew ki hat lane ki jaka die ïa ki mar ki mata bad kumjuh ruh ban peit pyrman ïa ka jingpyrshang ban shimkabu da ki nongdie jingdie kiba shim kabu halor ka dor ka mur jong ki mar ki mata bad ban pynshitom ïa kum kine ki riew shimkabu, bynrap u Bah Wanphrang Mawthoh.