Press "Enter" to skip to content

Ka Sorkar ka la pynkhreh, ym donkam ban khuslai ïa ka bam : Dy CM

Naduh 9 AM-5 PM plie dukan mar bam:

Shillong, Lber 27: U Bah Prestone Tynsong, Symbud Myntri Rangbah ka Jylla, u la ong ba ka Sorkar Jylla ka la long pynkhreh bad ki paidbah nongshong kim donkam ban khulsai na ka bynta ki marbam bad ki jingdonkam.
Haba kren ha ki lad pathai khubor ha ka nohphai sngi thohdieng, u la pyntip ruh ba ha ka smgi saitjaiñ (mynta ka sngi) ki dukan marbam katkum ki dukan ba la dep ithuh da ka Sorkar kin plie naduh ka por 9 baje mynstep tad haduh ka 5 baje janmiet.
“Ngi la don pahuh lypa ki mar bam bad ki jingdonkam”, la ong u Bah Prestone. U la pyntip ruh ba ka jingsam khaw bad kiwei ki mar jingdonkam da ki dukan ration (Fair Price Shop) na ka bynta
u bnai Lber la dep sam bad ka jingmang lypa ban ïoh mar bam na ka bynta u bnai Ïaiong ruh ka la sdang.
“La kyntu ruh ïa ki nongdie ba kin phah ïa ka jingmang bad ka jingsam kan dei ha ka taïew ba ar ha u bnai Ïaiong”, u la ong.
U la ïathuh ruh ba ka Sorkar Jylla ka la thoh sha ka Food Corporation of India ban pyllait ïa ka jingbhah na ka bynta u bnai Jymmang bad Jylliew.
Ha kaba ïa dei bad ki paidbah kiba shim jingbam na ki ïew paidbah, u la ong ba ka Sorkar ka la shim ïa ki sienjam ban ïakhun pyrshah lada ka don ka jingduna.”Kum ka Sorkar ngi la don ka bynta ban jam sha khmat ban wanlam khaw na ka Jylla Punjab bad Haryana,” u la ong.
Ha kawei ka liang, u Pravin Bakshi , ophisar ka tnad Food and Civil Supplies u la pyntip ba ka jingdon ka marbam ha ki kudam FCI jong ka Jylla ka long 22850 metric ton bad kaba la don lypa ka long 13998.21 metric ton. “Ngin nym don jingkhuslai na ka bynta u bnai Ïaiong ,” la ong u Bakshi.
U la ong ba ka hapoh ka non- National Food Security Act (NFSA), 5% ka buffer stock ka don lypa lada long kumno kumno ruh. U Bakshi u la ong ba ka Sorkar Pdeng ka la mynjur ban ai ar shah ïa ka jingïoh khaw hapoh ka National Food Security Act.
U la pyntip ba ka Sorkar Pdeng ka la mynjur ban ai arshah u khaw hapoh ka shim AAY na ka 35 kg sha ka 70 kg na ka bynta ki lai bnai ban wan bad hapoh ka PHH u wei pa uwei u nongïoh myntoi un ïoh 10 kg u khaw na ka bynta lai bnai ban wan.
U Symbud Myntri Rangbah u la pyntip ruh ba ki dukan mar bam kin plie ha ka sngi saitjaiñ (mynta ka sngi) naduh ka por 9 A haduh ka por 5 PM. U la kyntu ïa ki paidbah ba kin ïaleh ban pynjngai iwei na iwei pat ha ki jaa thied mar bam.