Press "Enter" to skip to content

Hadpeng ki jingeh kiba bun, hap kynmaw ruh ïa ki jingma

Ka Lockdown ne ka jingkhang dam ka sorkar ïa ki paidbah, ka la nang bteng bad poi sha ka shi taïew mynta ka sngi. Ka jingkhang ïa ki skul, ki kolej ka la nang bteng sa sha ka 15 tarik u Ïaïong. Ka jingkhang ïa ki ïew ki hat ruh ka la nang ïai bteng. Hynrei namar ka jingud jong ki paidbah bym ïoh khaw, ïoh jhur bad kiwei kiwei ki marbam, ka la pynlong ïa ka sorkar ban pynjynsur khyndiat ïa ka jingplie ïa ku dukan, khmatam ïa ka jingdie jingthied ïa ki marbam mardih. Wat la katta ruh, ka dang donka jingud bad ka jingtieng na ka liang ki paidbah ha kylleng kylleng, khamtam sha ki jaka nongkyndong kiba jngai ki dukan die khaw bad kiwei de ki marbam.
Kawei pat ka jingeh kaba ki paidbah ki la ïakynduh ha kine ki shitaïew ba la khang dam, kadei ka jingkhang ban leit na kawei ka District sha kawei pat. Kane ka la wanrah ka jingeh kaba khraw, ha kaba la ïohi ba ki paidbah kiba leit phai na ki jaka bylla la ka long na Sor na na nongkyndong ban leit phai sha la shnong bad sha la ïing. KIba bun ki paidbah kynthup ïa ki samla pule ki nongbylla, ki la ïaid da ka kjat da ki bun kynta bad don ruh kiba la ïaid haduh arsngi lai sngi tang ban poi sha la ïing. Nalorkata ruh ki la ïaid hapdeng ka jingthngan bad ka jingsliang, namar ba ym don dukan ba plie.
Hynrei hapdeng kine ki jingeh, ki ka long kaba sngewdei ba kyntu ïa ki paidbah bad kata ka long lada long kumno kumno ruh donkam ban kynmaw ïa ki jingbthah ki bor sorkar khnang ban lah ban ïada na ka jingsaphriang ka jingpang Coronavirus   Sngewdei ban ïai pynkynmaw ia ki katto katne ki jingbatai ban ïada na kane ka jingpang ka long ba dei ban sait kti bun sien. Haba jyrhoh ne synriah, dei ban kah da ka jain na shyntur ne khmut. Dei ban jngai kumba 3 phut na ki briew kiba jyrhoh ne synriah. Haba don jyrhoh ne synriah ym dei ban khein sting, hynrei ban leit wut wut sha ki Doktor. Nangta la bthah ruh ba kito kiba wan nabar kidei ban shah test ne screen ha ki jaka ba don ki Doktor.
Kine ki jingbthah ki long kiba suk ban leh, hynrei kidei pat kiba donkam haduh katta katta. Katto katne ki jingthoh kiba la paw ha ki Social Media, ki pynpaw ba ka ri Italy kadei ka ri kaba ar hadien ka China, kaba la shah lynshop ha kane ka jingpang. Kane ka jingthoh ka ïathuh ba haba ka sorkar ka ai ïa ïa ki jingbthah kiba kum kitei, hynrei ki briew kim salia bad kim kohnguh. Mynta kane ka jingpang ka la shim ia kiba bun ki mynsiem briew bad ka la sar kylleng ka ri. Ki nong Italy mynta ki babe ba kim shym la kohnguh ïa ki jingbthah.
Kaei kaba la ju ïohi ha kane ka jylla jong ngi, ka long ba ki briew kim ju shimkhia ïa ki jingbthah ka sorkar. Ngi khein sting bad ngi sngew ba kata ka jingpang kam poi sha kane ka jylla, hynrei ka don tang ha kiwei pat ki bynta jong ka ri India. Kumba la ïohi mynta kane ka jingpang, ka pur sted haduh katta katta bad ka long kaba eh shibun ban ïada, lada ki paidbah kim bud ryntih ïa ki jingbthah ki bor ba dei peit ïa ka koit ka khiah. Kane kadei ka por kaba ki paidbah kin hap ban kohnguh lut ïa ka jingbthah ki bor sorkar lane kano kano ka jingbthah ka ban ïada na kane ka jingpang.
La ïohi ruh ba ki don katto katne kiba sngewhok kum ki Khristan, kiba ong balei ym tieng ïa kane ka jingpang haba”ngi don U Blei”. Hynrei ngi klet pat ba ka Ktien U Blei ka ong ruh, “U Blei U ïarap ïa kito kiba ïarap ïalade”. Kine ki jingbthah jong ki bor ba peit ïa ka koit ka khiah, kidei ki lad ba ngin ïarap dalade ïalade ba ngin lait na kane ka jingpang. Mynta lada nalade ngim ïarap eiei bad ngi shu khmih lynti ïa ka jingïada U Blei. Hato ka lah ban long. Haba ngim long kiba kohnguh, hato U Blei, Un ïarap ïa ngi?.
Nakata ka daw kam dei ba ngin khein sting ne sngew khyllew ba kane ka jingpang kan nym ktah ne wan shane. Hynrei dei ban don ruh ka jingkitkhlieh nalade, ka jingkohnguh, ïoh ba ngi babe pat hadien.
Kine kidei ki sngi ba ki paidbah kin mad jingeh, la ka long ha ka leit wan, ka ïew ka hat, ka bylla ka sngi bad kumta ter ter. Hynrei kadei ka por kaba kiba don ha ka bor synshar kim lah ba kiar, namar ba ka jingeh kaba mynta kan wanrah pat ka jingsuk ka jingïada ïa ngi hi ki paidbah hadien habud. Kadei ka por kaba baroh, ngin hap ban pyneh bad pynïar ki jingmut jingpyrkhat, ym ban khih ruma rutit ne ban ngeit lut kat ïa kaba ïoh sngew, hynrei kadei ka por ban pynshongnia shuwa, ha shuwa ban ngeit ne leh. Kadei ka por ba ngim dei ban pyllut por ha ki kam kai, ha ka bam ka dih sngewbha.Hynrei ka por ba peit ïa ka ïing ka sem, ki khun ki kti.