Press "Enter" to skip to content

COVID-19: Tang u shabuk uba lah pynkohnguh ïa ki nongpynkheiñ aiñ

Ka jingpan jingïatreilang jong ka Sorkar Jylla na ki paidbah nongshong shnong ka Jylla ban shong khop ha la iing ha ki 21 sngi ba la pynjari ïa ka jingpakhang shnong da ka Sorkar India na ka bynta ban ïada na ka jingsaphriang jong u khñiang jingpang Corona Virus lehse kan long pynban ïa ki katto katne ban ym sngewthuh haduh katno ka Sorkar ka la shimkhia ban shim ïa ka jingkitkhlieh ban ïada ïa ki mynsiem briew bad ïa ka jingim jong ki phew lak ngut ki briew ha ka Jylla.Ha kum kine ki sngi, ki dang don hi ki paidbah kiba saitlah bad kiba mutlop ïa ki hukum ka Sorkar bad kiba nud pylleiñ pylleiñ ban ïaleh pyrshah da kaba mih khnang shabar ryngkat ki daw kiba laiphew jait. Ka long thik kum u khynnah skul u bym neh ban shong hajuh ha ka por khreh kot.
Ka jingmih lymbrum jong ki paidbah ha kine ki sngi baladep hadien ba ki bor synshar District ki la pynjynsur ïa ka Curfew ka pynpaw shai ba ki paidbah kim pat sngewthuh haduh katno ka jingtriem bad ka jingshyrkhei jong u khñiang jingpang Coronavirus uba la dkhat haduh 40 hajar ngut ki mynsiem briew ha kylleng ki ri jong ka pyrthei kat haduh mynta bad da ki lak ngut ki briew ki la ngat ha une u khñiang jingpang uba la pynsyier mynsiem haduh katta katta ïa ka jingim jong kiwei pat ki bym pat ngat ha u COVID-19.
Ka jingpynsaphriang jong ki paidbah lyngba ka Social Media ïa ki khubor halor une u khñiang jingpang ka long pynban tang kum ka tamasa bad pynlong kamkai namarba ka jingsngew btai ban shong iing katba ki 21 sngi ka jingpakhang shnong jong ka Sorkar kam pat kut satia. Imat kiba bun hi na ki paidbah kim da sngewthuh than ïa ka jingshyrkhei jong kane ka jingpang nabar ki dang don ki riew saitlah hukum wat haba la pynjari syndon da ka Curfew ha baroh ki District jong ka Jylla. Ka Sorkar Jylla ka la dei ban pyndonkam noh da u shabuk katba ka jingpyntreikam ïa kane ka 21 sngi ban khang ïa ka leit ka wan ha ki shnong ki thaw namara ki riewsaitlah hukum kin riej ban mih na la ïing ban leit khwai doh sha wah, ban leit saitjaiñ, ban leit shang lorni kylleng ka Sor bad kylleng ka shnong ka thaw da kaba aidaw pat ïa ki Volunteer Shnong bad ïa ki Pulit da kumne da kumtai. La dei ban ai jingïaroh ïa ki Pulit jong ka West Khasi Hills kiba la pyntreikam pura ïa ka iktiar ba la pynkhamti ha ki da kaba kem syndon bad pynshitom ïa ki riewpynkheiñ aiñ kiba nud ban leh kamkai kat ïa ka kam ïap kam im wat hapdeng ka jingmana ba ladep pynbna da ki tynghung lyngba ki Dorbar Shnong ha ki shong kiba pher bapher.
Kat haduh mynta hi la shem ba ka jingdumok jong u Symbud Myntri Rangbah ba dei ban kem bad set along ïa kiba pynkheiñ aiñ ha Meghalaya ha kine ki 21 sngi kam pat treikam namarba ba ki dang don ki katto katne ki riewshimkabu kiba leh pyrshah ïa ki Adong Shnong bad ki jingmana ka Sorkar. Imat ïa mynta hi ban shu kren da ka ktien kam biang satia hynrei ka Sorkar ka dei beit ban pyndonkam da u shabuk namarba ki don ruh ki riewshimkabu kiba leit pan ïa ki Curfew Pass na ki Deputy Commissioner ban ïoh pyndonkam bakla. Kin don beit ki riewshim kabu kiba pyrshang ban thaw da ki lad ki lynti ban ïoh ïaid sahuh khlem nong sharai.
Kat haduh mynta hi ha kiba bun ki jylla jong ka ri India ki Pulit ki kawut lathi ïa ki nongpynkheiñ aiñ hynrei ha Meghalaya ki Pulit ki dang kren tang da ka ktien ïa ki nongpynkheiñ aiñ. Imat ki paidbah ki ap haduh ba u COVID-19 un da poi haduh tyngkong iing te kin sa ai ka jingïatreilang bad ka Sorkar Jylla namarba ka jingjem shaba palat jong ka Sorkar ka pynlong pynban ïa ki paidbah ban shim kabu bad ban leh ïa ki kam kiba long beaiñ. Ban shu pyrkhing ïa ka leit ka wan lehse kan ym biang, hynrei ki Pulit ki dei ban da kem bad ban pynshitom da kaba set along wat tang shi taiew ruh kata hi ka la pynthngad thiaw shi jingim ïa ki nongpynkheiñ aiñ.Kat haduh mynta hi, u khñiang jingpang Coronavirus um pat iuhkjat ha Meghalaya bad shen ka por kam slem shuh ba une u khñiang jingpang un poi ha tyngkong iing lada kum ki paidbah ngim ïatreilang bad ki jingbthah jong ka Sorkar bad lyngba ka tnat ka Koit ka Khiah. Lada ki paidbah ki dang ïai leh mynthi bad leh mutlop ïa ki jingmana jong ka Sorkar lehse kan long ruh tang ka kamkai lada ka Sorkar ka pynlut ruh da ka pisa ban siew ïa ki bai pynbna lyngba ki lad pathai khubor ïa ki jingmana bad ki jingpynsngewthuh paidbah shaphang ka jingshyrkhei jong une u khñiang jingpang.
Peit ka nuksa ha ka ri Italy, ha USA bad ha kiwei kiwei ki ri jong ka dewbah Europe mynta ki mad ïa ka jingkthang mynsiem namarba ki paidbah nongshong shnong kim salia ban ïaleh bad ka jingim namarba naduh kaba sdang kim shym la ïada ïalade na u COVID-19 uba la saphriang sha ki bahaing hasem bad sha ki marjan marpa bad uba la wanrah pat ïa ka jingïam briew ha kiba bun ki longïing kiba ngat ha kane apot sep sngi.
Na kata ka daw, kum ki nongshong shnong kiba don ka jingkitkhlieh ïa ka ri bad ïa ka jaidbynriew ngi dei ban long kiba adkar ïa la ka jingim bad ngi dei ruh ban sdang shwa nalade shimet ban long kiba kohnguh ïa ki jingbthah jong ka Sorkar kaba long kum ka kmie kaba peit ïa ka bha ka miat jong ki nongshong shnong khnang ban ïada ïa ka jingim jong ki phew lak ngut ki paidbah ha ka Jylla.