Press "Enter" to skip to content

Ha u Naitung lah ban sdang biang ka La Liga khlem nongpeitkai

Barcelona, Lber 01: Ka lympung ïalehkai phutbol ba pawkhmat team ka Spain, ka La Liga ka lah ban sdang biang ïa kane ka samoi 2019-20 ha u Naitung mynta u snem hynrei khlem nongpeitkai, ong u heh kawei ka tnad pyni paidbah ïa ki jingïalehkai kane ka league.
U la ong ba ha ka jingshisha ka la don ka jingthmu ban ban pynsangeh noh ïa kane ka lympung hadien ka jingkem pang kiba bun ki rangïalehkai phutbol na ka daw ka coronavirus.
Baroh ki lympung ïalehkai ha Spain ki la pynsangeh noh ïa ka jingïalehkai phutbol naduh ka 10 tarik Lber namar ka jingsaphriang sted katei ka jingpang khlam. Ha ka jingshisha u Jaume Roures, CEO ka Spanish multimedia group Mediapro, u la ong ba lah ban bteng beit ïa kane ka jingïakhun khlem nongpeitkai.
“Nga khmih lynti ba ka phutbol kan wanphai biang ha u Naitung hynrei ka jingïalehkai khlem nongpeitkai namar ngi buh thong beit ban pynkut ïa kane ka samoi mynta u snem,” ong u Roures haba kren ha ka radio station Cadena Cope hynne ka sngi.
Ka Spain mynta ka dei kawei na ki artylli ki ri ka dewbah Europe kaba shah ktah jur na ka coronavirus hadien ka Italy bad tang ha ka sngi ba-ar ki don haduh 849 ngut kiba khlad bad haba kheiñ kyllum lang baroh kiba ïap ki long 9,053 ngut.
Tang hadien khyndiat kynta ba ki bor pynïaid ka Olympic ki la pynbna ba ka Tokyo Games 2020 yn sdang noh naduh ka 23 tarik Naitung u snem thymmai. Ka Japan ka la mad ïa ka jingdohnong kaba khraw hadien ka jingpynsangeh noh mynta u snem ïa kane ka lympung.
Ki rangïalehkai ka Valencia, Espanyol bad Alaves ki la ïoh ïa u khñiang jingpang bad na ka liang u Roures u la ong ba lada dang bteng ka jingbit jingpang ki rangïalehkai khlem artatien hap pynkut noh ïa ka samoi mynta u snem.
“Lada ki pleïar ki dang ïoh thymmai ïa ka jingpang coronavirus haduh ka 20 tarik u Naitung, khlem artatien ngi hap ban pynbna ba la pynwai noh ïa kane ka samoi 2019-20,” ong biang u Roures.
“Ngi hap shimkhia bha ban pyntikna ba kane ka jingpang kam jia shuh. Hynrei lada ka dang teng, ka phutbol ka la kut noh.”
Ki don sa 11 tylli ki jingïalehkai kane ka La Liga kiba dang sah bad ka Barcelona ka don hakhliehduh ka miej kheiñ poiñ da kaba tam tang 2 poiñ ïa ka Real Madrid.
Ki bor pynïaid ka La Liga ki la kam ba ka jinglut ha kaba pynlong ïa kane ka league mynta u snem ka long 700 million euros ($772 million) bad na kata ka daw ki kwah beit ban bteng ban pynkut noh ïa ka.