Press "Enter" to skip to content

Ka jingpang coronavirus ka jingpang ba shna u briew ban ïoh test tower 5G: Amir Khan

U khlur ïakura Boxing ka Britain, u Amir Khan u la kam ba kane ka khlam jingpang coronavirus ka dei kaba la shna da ka kti briew shibynta ban ïohlad ban test bad ban pynïeng ïa ki tower 5G. U Khan 33 snem ka rta u la kren shai ïa kane hapoh ka Instagram ha kaba u ngeit ba kane ka jingpang ka la pynlamwir mynta wat ïa ki saïantis kiba ym tipshuh ïa ka daw kane ka jingpang.
Katkum ka jingïohi u Khan u la ong ba kane ka jingpang ka dei kaba la shna da ka kti briew ban khanglad ïa ka jingbun briew.
U Khan u la ong ba u peit ïa bun tylli ki video sawdong ka pyrthei bad u la ong ba jingpynïeng ïa ki 5G tower kan nang wanrah jingma shuh shuh ïa ka koit ka khiah.
U Khan u la ong ruh kumne: ‘Ngam tharai ba kane ka jingpang ka wan na China. Ka dei ka khubor lamer. Ki briew ki la ong ba kane ka jingpang ka mih na ka jingbam ïa ki lymbit bad bseiñ bad ka bih ka khlehlang. Kumno ka lah ban neh? Hato phi tharai ïa kane? Ngam tharai ba kan long kumta.
‘Nga sngew ba ki jingïakren ka dei beit mynta tang shaphang ka Coronavirus– nga la ngiah sngap.Hato kam dei namar ka jingthmu pynïeng ïa ki 5G tower? Ka dei beit ka jingpang ba shna da u briew ban pynurlong ïa kata ka tekhnoloji ba thymmai bad balei ki kwah test ïa kata ka 5G. Lehse ka lah ban long ban pynduna ïa ka jingbun briew khamtam haba la ong ba kane ka jingpang kan ktah ïa ki briew ba la kham rangbah. Haba phi peit ïa kitei ki tower kiba la pynmeh ding bad la bthah ïa ki briew ban nym mih napoh ïing.’
U Khan uba dei na Bolton mynta u la ai sngewbha ïa ka iing saw mala jong u ban pynlong kum ka jaka sumar ïa kiba pang coronavirus.
Nalor u Khan kiwei pat ki riewpawkhmat kiba artatien ïa ka jingkhie kane ka jingpang ki kynthup ïa u aktor Woody Harrelson bad nongbishar ka Dancing on Ice, u Jason Gardiner kiba pynpaw ïa kane ka juh ka sur.