Press "Enter" to skip to content

COVID-19 : Ka jingshah ktah ki paidbah ha ki bun rukom

Ka jingsdang jong ka khlam Covid-19 na ka ri China bad kaba pur pat sha kylleng ki ri jong ka pyrthei ka la pyntriem bad pynsuhjer hi ngain ïa u khun bynbriew ha kane ka snieh pyrthei. Kat haduh mynta,dang artatien ban pynkoit ïa kane ka jait jingpang ne ka khlam China wat hapdeng ka jingstad jong kane ka juk mynta.
Kiba bun kim pat lah satia ban shemphang balei kane ka khlam thymmai ka khie kynsan kynsan khlem poi pyrkhat. Naduh hyndai kulong kumah, u Blei u ju ai ki jingpynshitom ïa u khun bynriew da ki jait jingpynshitom bad jait jingsympat ba harrukom khamtam eh hadien ba la jyllei eh ka jyrsieh bad jingthala ba laiphew jait ha kane ka pyrthei. Ki rukom ai jingsneng u Blei ïa ka jingleh thala jong u khun bynriew ha kane ka pyrthei ki long la ki jong ki jong ki rukom jingpynshitom.
Ka jingkhang slem (long lockdown) ka Sorkar India bad ka Sorkar Meghalaya ban ïada ïa ka koit ka khiah ki paidbah nongshong shnong ka lah ban wanrah pynban sha ka jingïap thngan (starvation) ïa ki paidbah khamtam ïa kiba rit kiba ria bad ki duk ki suk. Haduh 21 sngi ki nongbylla kim ïoh leit trei leit ktah bad khlem ïoh kamai kajih shuh ki duk ki suk, khlem artatien kin ngat ha ka jingïap thngan kaba shyrkhei bha bad kane kan wanrah ka nem sniew(famine) kaba shyrkhei kum ha ki por mynshwa.
Thnem hi puk ka jingsam khaw ha kiba bun ki bynta jong ka rilum Khasi bad Jaiñtia. Mih ki sengbhalang bad ki kynhun bapher bapher bad wat ki riewshimet kiba don ka mynsiem ban ïarap lem ïa longiing kiba duk. Ha kum kane ka por, kham ñiar eh ban kham ïoh sngew ba ki Nongmihkhmat paidbah ki mih shakhmat ban ïarap ïa ki paidbah ha ki Constituency bapher bapher. La shu ïohsngew thohmut thohmat hangne hangtai. Jin lada dei ha ka por shwa ban long ka elekshon ka jingsam khaw ka jingsam marbam ka pahuh bad ki paidbah kim donkam hi ruh ban shet ja ha iing.
Kiba shah ktah mynta ha kane ka jingkhang khyrdep kaba 21 sngi ki dei hi ki duk ki suk bad ki nongrep. Mynta ki nongrep ki lynniar kliang namarba u jhur uba mih na rilum u remdor katba uba wan na Assam pat u hiar dor. Kane ka jingeh kaba ki paidbah nongrep ki ïakynduh mawsiang lada kin pynïaid iew ïa ki marrep ha kane ka por.
Ym tang katta, ki khynnah pule ruh ki ktah bha mynta u snem namar mar ïa plie skul sdang ka Curfew nangta sa ka eksamin Secondary School Leaving Certificate (SSLC) bad sa ka jingkhang khyrdep ïa ka ri baroh kawei baroh shi bnai tam. Mar ïa plie skul sa ka eksamin shiteng snem, kumno ki nonghikai kin pyndep ïa ki course/lynnong ba la buh ban pyndep baroh shi snem. Sa tang ba ka Sorkar/MBOSE kan pyrkhat kyrpang noh ban pynduna noh ïa ki lynnong mynta u snem na ka 10 Chapter ba ju leh sha ka 7/8 chapter lym kumta sngewsynei ïa ki khynnah ban shu pyndep rukom ïa ki lynnong khlem sngewthuh ki khynnah.
Kumba ka long mynta ka ktah bha haduh katta katta ïa ka treikam treijam jong ka Sorkar mynta u snem la ka long ïa ka Sorkar Pdeng ne Sorkar Jylla. Nalor ba ka Sorkar ka ud duna pisa lypa, sa kane ka jinglong leilei kan nang pynhiar bha ïa ka ïoh ka kot bad ka kamai ka kajih. Kumno ka Sorkar kan treikam khlem ki nongtrei? Kumno kin treikam na ing khlem ai kam lypa kiba heh Ophisar)? Kumno kin ai homework ki nonghikai ïa ki khynnah haba kiba bun ki khynnah ki leit shong muja sha la ki shnong jong ki?
Ka jingkylli mynta ka long, hato ka long hi ban ai Homework tang iwei ne ar i khynnah khlem ïoh ryntih? Kata lei lei kan nang pyndkoh shuh shuh ïa ki khynnah bym kot bor ban leh da ki online/internet. Ka Sorkar ka dei ban thawlad bha lym kumta kan kylla pynban ka jingtim wat lada mut ïa kaba bha ruh. Ki paidbah ki ïa kynduh jingeh bha shisha ha kine ki por namar ban ïaid shakhmat ruh ym long, ban randien ruh ym shah ka kam.
Ha,oid, ki paidbah ruh ki dei ban sngewthuh ban ïai shah hynrei ka Sorkar ruh kan hap pyrkhat lem bad puson bha ban nym ktah than ïa ki paidbah lym kumta kane ka jinglong kan ktah pynban syndon shaba kham jngai bad kham shyrkhei shuh shuh nangne shakhmat.
Kum kine ki jingeh kin nang mih shuh shuh lehse nangne shakhmat namarba ka jinglong jingman jong ka pyrthei na ka jingpur jong u khniang jingpang Coronavirus ha ka ri India ka la jur bha katba nang ïaid na ka sngi sha ka sngi. Donbok ba ka jylla Meghalaya kam pat don wat tang uwei ruh uba ngat ha une u khñiang jingpang. Ka long kaba donkam bha ïa ka Sorkar Meghalaya ba kan teh pyrkhing bha ïa ka rung ka mih jong ki briew kiba nabar shapoh ka Jylla namar yn ym lah ban tip mano uba kit khñiang jingpang bad mano uba khuid ba suba.
Ka jingai jingmut jong ka Dorbar Shnong Nongrim Hills, Shillong sha ka Sorkar Jylla kum kawei na ki lad ban ïada ki paidbah na ka jingpur jong u khñiang jingpang Coronavirus ka long kaba donkam bha. Kawei na kine ki jingai jingmut ka long ruh ban pyrkhing bha ïa ka rung ka mih laitluid ha ki shnong ki thaw da ki briew kiba nabar. Namarkata, kan jin da la bha shikatdei eh ïa ka Sorkar ban buh da ki lad jingïada ïa ki paidbah ha manla ki shnong ki thaw jong ka Jylla lada ka Sorkar ka angnud ban ïakhun thma pyrshah ïa une u khñiang jingpang namar ban ïakhun ïa ka thma ka donkam ban ker kynroh ïa la ka iing.