Press "Enter" to skip to content

Pyrshah ka SCCCOMETF ba wan kit dewïong na Assam ai jingthoh sha u CM

4 bnai lynter sahkut 820 ki trok kit dewiong ha NGH

Shillong, Jymmang 13 :Ka Seng State Coordination Committee of the Coal Owners, Miners, Exporters, Transporters & Dealer’s Forum (SCCCMETDF) mynta ka sngi ka la dep ai jingthoh sha u Chief Minister halor ka jing sngew pyrshah ïa ka jing wanrah ïa u dewiong na ka jylla Assam sha Meghalaya (East Jaintia Hills District) ban pynbiang ïa ka jingdonkam ki kharkhana dew bilat.
Ka daw ba kongsan ba ka Forum ka pyrshah ïa ka jingthmu jong ka sorkar jylla ka long ba ka jylla Assam ka kynrei bha ïa ka jingpang Covid-19 bad ruh ba u dewiong u don hapoh jylla bad balei pat ban nang donkam ban wad dewiong na shawei. Kane ka jingleh ka sorkar jylla ka pynlyngngoh bad ka lam ruh ban pynrem ïa kane ka jingthmu.
Na ka 32 lak metric ton kumba la kam ka sorkar jylla ba don u dewiong uba la dep sei ha ka ïing bishar Supreme Court ha u snem 2019 bad na kane ka jingdon u dewiong, ka NGT ka la dep ai jingbit ban pynïaid ïew kumba 2 lak ton katkum ka hokum ba la pynmih ha u bnai Lber 2020 bad ka Forum ka dawa ba dei ban pyndonkam shwa da une u dewiong ba la ïoh jingbit bad ym ban wanrah dewiong pat na shabar.
Ka Forum ka kyrshan borbah ia ka seng Synjuk ki Waheh Shnong bad ïa ki seng bhalang kiba bun kiba ïakhih pyrshah ïa ka jingthmu ban wanrah ïa u dewiong na shabar jylla ha ka East Jaintia Hills District bad ka Forum kan ïai don ryngkat bad ki tad haduh ban da jop ïaka thong.
Ha kawei pat ka khubor, ki seng bhalang na ka North Garo Hills ba kynthup ïaka GSU, FAF, AAYE, GSMC, PJAC ki pyrshah jur ïaka jingthmu ka sorkar ban pynïaid noh ïa ki 820 tylli ki trok kit dewiong kiba la sahkut mynta la saw bnai lynter ha ka surok bah NH-62 naduh bala pyntreikam ïaka jingkhang dam da ka sorkar pdeng ban ïakhun pyrshah ïa ka khlam COVID-19.
Ka sorkar jylla hadien bala ïoh ka hukum na ka ïing bishar High Court jongka jylla ha ka 6 tarik mynta u bnai, ka la pynkhreh ban pynïaid noh ïa kitei ki trok kiba sahkut ha katei ka surok bah la saw bnai mynta ryngkat bad u dewiong. Ka jingthmu ka long ban pynïaid lut ïa ki trok hapoh ak 16 tarik mynta u bnai.
Kiba bun kine ki trok ki dei kiban leit sha Dudhnoi, Krishnai, Kavaitary, Jogigopha, Bongaigoan, Dhubri hapoh Assam. Kine ki jaka baroh mynta ki dang hap ha ka Red Zone namar ki dang bun kiba ïoh ïa ka jingpang khlam COVID-19. Ki seng bhalang ki la pynpaw ba lada pyllait ïaki trok ban ïaid khlem pep kin don ki briew ki ban wan rung na kitei ki jaka sha ri lum Garo namar kitei ki jaka ki dei kiba jur bha ka khlam ha Assam.
Kumta ki la kyntu ïa ka sorkar ba kam dei ban rai kyrkieh ïa kane ka kam hynrei ban bishar bniah bha namar ïoh kine ki trok kin long kum ki nongwan kit ïa ka jingpang khlam sha ri lum Garo ynda ki la wan phai na kitei ki jaka.