Press "Enter" to skip to content

Cyclone Amphan: Ïap 72 ngut ha West Bengal, nang kiew sha NE

Kolkata, Jymmang 21: Haduh 72 ngut ki briew kila ïap ha West bengal na ka jinglynshop jong ka ‘Eriong Amphan hynne ka sngi palei kaba la iaid lynti na Bangladesh, Odisha bad mynta la pyntip ba kane ka eriong kala iaid lynti sha phang ka thaiñ Shatei Lam Mihngi ka Ri.
“Kat haduhba ngi ïoh pdiang ïa ki jingtip, 72 ngut ki briew kila ïap hapoh Jylla na ka ‘eriong Amphan. Artylli ki District ka North bad South 24 Paraganas kila shah pynjulor lut ploin” ong ka Mamata Banerjee Myntri Rangbah ka West Bengal.
Ka Banerjee kala kyrpad ïa u Myntri Rangbah Duh ka Ri, u Narendra Modi ba un wan iuhkjat bad jngoh ïa ki lanot jong kine ki District ba shah ktah bad ban ai jingiarap ruh ha kaban tei thymmai ïa kine ki jaka naduh na sdang. Ka Myntri Rangbah kala pynbna ruh ïa ka song jingiarap ba T. 2 lak haduh T.2.5 lak sha ki longïing jong ki briew ba ïap.
“Ngi hap ban tei thymmai biang ïa kine ki District naduh kaba sdang. Ngan sa kyrpad ïa ka Sorkar Pdeng ba kan ai ïa baroh ki jingiarap sha ka Jylla” ong ka Banerjee hadien bala wai ka jingïalang shong bishar kam bad ki Heh Ophisar ka Jylla.
Ka Banerjee ka pyntip ba kan sa hiar jurip shen sha kine ki jaka bad kan sa pynsdang ruh ïa ki jingtei thymmai. Ka ong ba ka North bad South 24 Paraganas bad ka Kolkata kila shah ktah jur bha bad kine ki jaka kim shym la don bor ding elektrik shuh naduh hynnin ka janmiet nalor ki telephone bad mobile ruh kumjuh.
Ka Sorkar Pdeng kala phah biang sa 4 kynhun ki National Disaster Response Force (NDRF) sha Kolkata ban iarap ïa ki lano halor ka jingkyrpad jong ka Sorkar West Bengal bad kine ki kynhun kin sa poi hynne ka janmiet da ki liengsuiñ Indian Air Force, ong u SN Pradhan u Khliehduh jong ka NDRF.
Kat kum ka jingpyntip jong ki bor Sorkar, la ong ba kane ka eriong kala poi iaid lynti mynta sha ki Jylla jong ka thaiñ Shatei Lam Mihngi bad la bthah ruh ïa ki Jylla ba kin long kiba la pynkhreh. Hangne ha Meghalaya, la maham ba ka lah ban don ka jingjur slap ha kine ki 12 kynta ban wan bad na ka liang ki bor Sorkar ka Jylla kila maham ia ki nong shong shnong ba kin nym tur kulmar sha ki Wah kiba don ha Jylla.