Press "Enter" to skip to content

Hap pynshai u CM ba bakla jubab u Myntri ka koit ka khiah ha Assembly

Ym don Incinerator ha Civil Hospital, Shillong

Shillong, Jymmang 21: U Myntri Rangbah ka Jylla, U Conrad K Sangma, u la hap ban pynbeit hi ïa ka jubab ba ka Jylla Meghalaya ka don tang kawei ka Incinerator (ki kynja mashin ba thang ïa ki tiar bym pyndonkam shuh na ki jaka ai jingsumar ne ki bio-medical waste) kaba la buh ha NEIGHRIMS.
“Nga kwah ban pynshai ba ka Shillong Civil Hospital kam don ïa ka Incinerator hynrei ngi dang ïaleh ban pynioh noh ïa ki Incinerator ha Shillong, Jowai bad Tura)”, la ong u Myntri Rangbah. Ha ki snem 2001-2002 la buh ïa ka Incinerator ha Civil Hospital Shillong hynrei ka la duh noh. Ïa mynta ïa ki tiar bym pyn donkam shuh la thang ha Crematorium ha Jhalupara. Kane ka jingpynshai ka la long jia hadien ba u Myntri Sorkar Jylla ba dei peit ïa ka tnad ka Koit ka Khiah, u Bah AL Hek u la jubab ba ka Incinerator ba tang kawei hi ha ka Jylla ka don ha Civil Hospital, Shillong.
U Myntri Sorkar Jylla u la jubab ïa kane ha ka kynta kylli jingkylli (question hour) ka dorbar mang tyngka ba bteng jong ka Ïing Dorbar Thawaiñ ka Jylla Meghalaya, ha ka sngi palei, ba la kylli da u nongthawaiñ ka Mawphlang, u Bah SK Sunn uba la kylli ïa ka dor jong ki Incinerator ha ka Jylli.
U MLA ka NCP na Gambegre, u Saleng A Sangma, u la ong ba ki ki PPE Kits bad ki tiar ki tar ba la pyndonkam da ki nongtrei ka tnad ka Koit ka Khiah bad kiwei ki nongtrei ba ha khmat ban ïakhun ïa ka jingpang COVID-19 la shu bret pathar.
U Bah Hek u la ong ba ka Jylla ka dang ïaleh ban ïoh ïa ki Incinerator ba thymmai bad ong ruh ba ka ka Civil Hospital, Shillong ka don ïa kane ka mashin, ïa kaba la pynshai noh da u Myntri Rangbah ka Jylla.
Ha kawei pat ka liang, u MLA ka Congress na Rangsakona, u Zenith Sangma u la kynnoh ba u Myntri Rangbah ka Jylla u la pynkylla kam iohnong sainpyrthei na ka daw ka jingpang COVID-19 bad ong ruh ba u Myntri Rangbah u la thoh ka jingthoh ai khublei ha ki rynsan Social Media ïa ki nongtrei ka National People’s Party (NPP) na ka bynta ka jingtrei jong ki ha ka jingïakhun pyrshah ïa ka khlam COVID-19.
U Zenith u la ong ba kane kan pynduh mynsiem ïa baroh ki nongtrei kiba ha khmat eh ha ka jingïakhun pyrshah ïa ka jingpang COVID-19 ki bym dei na ki seng sainpyrthei. Haba jubab ïa kine ki jingkynnoh, u Myntri Rangbah u la ong ba u dap da ka jingsngewnguh ïa baroh kiba ïa don bynta ha ka jingïakhun pyrshah ïa ka khlam COVID-19.
“Ka dei ka kamram kum u Myntri Rangbah lane u nongïalam seng sainpyrthei ban ai jingïaroh bad jingsngewnguh ïa kam kaba la pyndep. Nga la ai khublei ‘online’ ïa ki riewshimet, ki kynhun treimon sngewbha bad kiwei kiwei kiba don bynta ban ïakhun pyrshah ïa ka khlam COVID-19 bad kiba kloi ban ïarap para briew na ka jingïakynduh jingeh na ka daw ka jingkhang khyrdep ban ïakhun ïa kane ka jingpang. Kam dei ka por ban ïa peit kum ka mat ïa kren iohnong sainpyrthei”, la ong u Conrad.
Ha ba jubab, u MLA ka Rangsakona u la buh jingkylli kylla ïa ka jingthmu u Bah Prestone Tynsong, Symbud Myntri Rangbah ka Jylla mynba ka seng Congress ka la tyrwa ban leit buh ïa ki nongbylla na kiwei pat ki Jylla ne jaka bad kiba la shah kyntaid ban leh ïa kata.
U Symbud Myntri Rangbah u la long uba kloi ban kyntaid ïa kane bad ong ba ka seng Congress ka la pyni dak ban ïarap ïa kiba sahkut ha ka Jylla ban leit phai sha la ki jaka sah ne ki Jylla jong ki katba ka Sorkar Jylla ka dang ïaleh ban wanlam nyngkong shwa ïa ki briew kiba sahkut ha kiwei ki Jylla sha la ka jong ka Jylla.