Press "Enter" to skip to content

Ka jylla Meghalaya kam donkam ban shaniah ïa u khaw na kiwei ki jylla

Lada ka sorkar ka don ki Polisi ba biang ha ka kam rep

Nongpoh, Jymmang 21: Kumba long haduh mynta ka jylla Meghalaya wat lada ka dei kawei na ka jylla kaba bun bha ha ka jingdon ki pynthor kba ha man la ki District, hynrei ïa u kba u khaw ki paidbah ki dang hap ban shaniah na kiwei ki jylla ka ri bad lada ym poi u khaw na kiwei ki jylla ka ri sha kane ka jylla la thikna ba bun ki paidbah ka jylla ki hap ban shah thngan.
Ïa kane ka bynta ba ka jylla Meghalaya ka hap ban dang shaniah ïa u khaw na kiwei ki jylla ka la paw pyrthei ha kane ka jingwan lynshop kane ka khlam COVID-19 lane ba la tip paidbah kum ka khlam Coronavirus.
Ngim lah ruh ban len ba ka jylla Meghalaya ka don shibun ki riew khraw pyrkhat bad ki riew proh jabieng kiba trei na ka bynta ban kyntiew ïa ka bha ka miat, ka shongsuk ka shongsain bad ka roi ka par, hynrei lada phai pat ha kane ka bynta kaba dei shaphang ka kam rep ka kam riang ñiar kiba mih shakhmat ban ngam jylliew ban thaw ïa ki lad ki lynti ban lait ki paidbah na ka jingïap thngan haba wan kano kano ka nem sniew kumba ki paidbah ki la mat mynta ha kane ka jingwan lynshop ka khlam COVID-19.
Ki jingshisha ruh ki paw la jin ba u khaw um wan na kiwei ki jylla kiba la shalan sha kane ka jylla Meghalaya la thikna ba ki paidbah ka jylla ki hap ban mad ïa ka jingïap thngan bad donbok haduh mynta u khaw u dang wan na bar jylla ha kaba ki paidbah ki dang lait na ka jingiap thngan da ka jingisynei kiwei ki jylla ka ri India.
U Nongthoh Khubor u Mawphor, u la buddien halor kane ka bynta kaba dei shaphang ka kam rep kam riang ka de hadien ba u la lap ba ka jylla Meghalaya ka dei kawei na ka jylla kaba don bun ki pynthor kba la da phai ha Ri Bhoi District, Jaintia Hills bad wat ha Garo Hills bad phewse ka jingdon ki pynthor kba kam pat lah ban bsa ïa ka jingdonkam jong ki paidbah kaba dei na ka daw ba ka sorkar kam pat lah ban thaw kita ki polisi ba paka kumno ban kyntiew ïa ka kam rep ka kam riang bad ruh kaba long ka lad ban kyntiew ïa ka ioh ka kot jong ki paidbah nongrep ka jylla.
Kaba kham sngew phylla ka long hadien ba ka sorkar Meghalaya ka la pyntreikam ïa ka Aquaculture Mission ban kyntiew ïa kata ka kam ri dohkha ha ka jylla, hynrei kiba bun ki pynthor kba ki la kylla sha ka pung dohkha bad kaba kham sngewlyngngoh ruh ka long ba wat ki paidbah ka jylla ym tang ba ki shaniah ïa u khaw uba wan na kiwei ki jylla, hynrei wat ïa ka Dohkha ruh dang hap ban shaniah na kiwei ki jylla ha kaba ka jingpynlut ka sorkar da ki phew klur ban kyntiew ïa ka kam ri Dohkha kam shym la poi sha ka thong ba ka sorkar ka angnud.
Haba tih bniah halor ka kam rep ka kam riang ha ka jylla, ka jylla Meghalaya ka dei kawei na ka jylla kaba don ïa ka khyndew kaba sboh bad ka jinglong ka mariang ruh ka ïa dei bha na ka bynta ban rep khaw rep kba bad ka daw hi kaba haduh mynta ba ka jylla kam pat lah ban pyndap ïa u khaw katkum ka jingdonkam ki paidbah ka dei namar ba ki nongrep ki dang bud ïa ka rukom rep ba la ialam da ki longshuwa man shuwa bad ym ka rukom rep kaba long katkum ka juk stad ba mynta lyngba ki kor ki bor bad ki buit saian lane ki bor technology.
Ka daw kaba la pynlong ïa une u Nongthoh Khubor u Mawphor ban buddien halor ka kam rep ka kam riang ha ka jylla bad khamtam ha kaba ïa dei bad ka kam rep kba, ka dei halor ka nongrim ba kum ka sorkar ka hap ban pyrkhat kyrpang lyngba kane ka jingwan lynshop ka khlam COVID-19 bad kan poi ka por ba lada ka nem sniew ka wan ban lynshop kiwei ki jylla ne ki ri kin nym lah shuh ban shalan marbam bad ha kata ka por la thikna ba ki paidbah kin iap na ka jingshah thngan na ka daw ka jingthylli ka kpoh khlem ka bam ka dih.
Haba ïa kren halor ka kam rep ka kam riang, ngim lah ban len ka sorkar ka pyrshang hi ban phai khmat sha ki Nongrep lyngba ki skhim bapher bapher bad bunsien pat katba nang rep katta nang syrdep na ka daw ba ki rukom rep ki nongrep kam dei satia katkum ka juk stad ba ha kiwei kiwei ki jylla bad ki ri ki la rep da ka juk stad ba mynta ha kaba ki lah ban pynmih khaw ym tang ban bam ïa lade bad ki lah ruh wat ban shalan sha kiwei ki jylla ne ki ri ka pyrthei.
Namarkata, kum ka jingai jingmut sha ka sorkar Meghalaya, kane ka jingwan lynshop ka khlam COVID-19 ka dei ban long ka jingpynkyndit bynriew ba kumno ka hap ban pyrkhat na ka bynta ban bit ban biang (Self Sufficiency) ki paidbah ha ka jylla ha kaba ïa dei bad u khaw u kba uba long u jingdonkam ba hakhmat eh ki paidbah bad la jin ba ka sorkar kan shim khia ka jylla Meghalaya ka dei ka jylla kaba biang ka mariang bad ba ka khyndew ka sboh bad kaei kaba donkam ka sorkar ka hap ban thaw ki polisi ba paka kumno ban kyntiew ïa ka kam rep kaba ba ki pynthor kba ki don da ki phew hajar Akar la ka long ha Ri Bhoi Disrict, Jaintia Hills, Garo Hills, West Khasi Hills bad wat ha East Khasi Hills jong ka jylla Meghalaya.