Press "Enter" to skip to content

Ka mang tyngka kadei kaba ngi la peit lypa sha ka 10 snem : Conrad

Mynjur ka Assembly ïa ka Budget ba T.17, 375 Klur

Shillong: Ka dorbar thawaiñ jong ka jylla, ka la mynjur ïa ka mangtyngka kaba 17,375 klur tyngka na ka bynta u snem 2020-2021.
Ïa kane ka mang tyngka la wanrah ha u bnai Lber mynta ka snem, hynrei la hap ban mynjur haduh mynta, namar ka jingpynsangeh noh shuwa ïa ka dorbar, da ka jingwan ka jingpang khlam Coronavirus.
U Myntri Rangbah ka jylla, u Conrad Sangma, haba jubab ïa ka jingïatai halor ka mang tyngka, u la ong ba kane ka mang tyngka kadei kaba la pyrkhat lypa na ka bynta ki san bad shiphew snem kiban wan. “Kane kan long kum ka mangtyngka jong ka phew snem “, la ong u Conrad.
Haba pynshai halor kane ka mang tyngka, u Myntri Rangbah, u la ong ruh ka jingshna ïa kane ka mang tyngka, ka la long kum ba ka sorkar ka la tip lypa ne pynkhreh lypa ïa ka jingwan kane ka khlam.
Haba batai khambha halor kane, u hehduh ka pla tyngka jong ka jylla, u la ong ba kane ka mang tyngka, ka la kham pylleit jingmut bha na ka bynta ka koit ka khiah bad ka pule puthi. “Kine kidei ki bynta ba ktah bha ha kane ka jingwan ka khlam bad kane ka jingpyrkhat jong ngi, ka la long kumba ngi la ïohi ïa ka jingwan ka khlam”, u la ong.
Kawei pat ka phang jingtreikam ba kane ka ka mangtyngka ka phai khmat kadei halor ka rep ka riang bad ka thaiñ jaiñ. “Kumba long mynta na kane ka jingpang khlam bad ka jingkhang dam, ngi ïohi ba ngi donkam bha ïa ka rep ka riang”, la ong u Conrad bad bynrap ba sorkar kan peit ba ki nongrep jong ngi, kin ïoh bun ki jingïarap.
Kawei pat kaba u la ïathuh halor kane ka jingshimkhia ka sorkar kadei halor ka jingseng kam la jong ka ban long ka lad kaba khlaiñ bha na ka bynta ka ïoh ka kot jong ka jylla.
Halor kine baroh, u Conrad, u la ong ba ka sorkar kan pyndonkam katba lah ïa ka jingroi ka saïan bad teknoloji. “Mynta khlem ka teknoloji, ngim lah ban treikam”, u la ong bad bynrap ba ka sorkar kan peit ba baroh ki tnad treikam kin pyndonkam da ka teknoloji, namar ka pynsuk bad pynsted ïa ka jingtreikam.
U Myntri Rangbah, u la ai ruh ka jingïaroh ïa ka tnad Communty and Rural Development, kaba la pyntreikam bha ïa ka skhim MNREGS ne ka skhim bylla shispah sngi. U la ïathuh ba ha ka MNREGA, la lah ban aikam haduh 350 lak sngi ïa ki paidbah ha kaba ka pisa kaba la siew bai bylla ka long 1137 klur tyngka.