Press "Enter" to skip to content

Khmih lynti ki paidbah ban sdang pyntrei noh ïa ka surok Riangdo sha Athiabari

Nongstoiñ, Jymmang 21: Ka jing pynslem jong ka sorkar ban pynbit pynbiang ïa ki jingdon kam ha kaba ïadei bad ka jingthmu ban pyntrei ïa ka surok na Riangdo haduh Athiabari kaba jngai tang kmba 37 kilomitar, ka la pyn pisa jingmut ïa ki paidbah nongshong shnong ka thaiñ Nongtrai, khamtam eh ïa ki paidbah jong ki shnong kiba katei ka surok ka ïaid lyngba.
Kumban shu pynkynmaw ba ki don haduh 13 tylli ki shnong ba katei ka surok ka ïaid lyngba kata naduh Domprut, Riangsieh, Thangtngaw, Nongrynñiaw, Porsohsan, Mawjaiñ, Umsohpieng, Myndo, Nongkyndang, Nongpdeng, Nongdiengkaiñ, Kamriangchi, Athiabari bad Umsaitwait.
Katei ka surok ka dei ka kaba donkam haduh katta katta namar ba ka ïew Hahim (Byrhat), ka ïew kaba hap ha Assam ka dei ka ïew khappud kaba heh tam na ka bynta kiba bun ki shnong na West Khasi Hills. Nalor kata kumba 16 kilomitar na Hahim ka don ka ïew Boko kaba ki paidbah naduh ki thaiñ Nongtrai haduh ki thaiñ Muliang ki sngew jan bha namar ki mar ki mata ruh ki long kiba jem dor bha.
Hynrei haba phai ha ka jinglong jingman jong katei ka surok, la don kumba lai snem tam haduh mynta ba ka jinglong jingman jong ka, ka la jot rathai bad la dap tang da ki thliew ki syar, kat haduh ba ka la buh ha ka jingeh kaba khraw ïa ki paidbah nongleit nongwan bad ki ba leit ïew leit hat.
Halor ka jingsniew jong katei ka surok, na ka liang ki riew rangbah shnong katei ka thaiñ ki la ong ba ka sorkar ka la phah ïa ki briew jong ka ban pynlong ïa ka jingpynsgew paidbah haduh lai sien lai wat. Kumta ki la khmih lynti ba lehse hadien katto katne por ka sorkar kan sa sdang noh ban pynbha ïa katei ka surok. Hynrei sngewsih haduh mynta ym shym la ïohi dak ei ei.
Ki la ong ruh ba hadien ka jingther jong u lapbah ha kine ki sngi, katei ka surok ka la nang sniew shuh shuh namar ka jingtwa khyndew ha man la ki jaka. Kumta ha kaba ïadei bad ka jingsniew jong katei ka surok, ki rangbah jong katei ka thaiñ ki la kyntu ïa ka sorkar ba kan pynshai la kan shna ne em ïa katei ka surok ne kan shu iehnoh kumto kumba ka long mynta.
Ki la ong ruh ba lada yn shu ieh kumto, ki paidbah nongleit nongwan ki la shem jingeh khamtam eh haba don kiba pang ba shitom, nalor ba katei ka thaiñ ka kynrei bha ki jingpang kum ka Malaria bad kiwei kiwei ki jait jingpang.