Press "Enter" to skip to content

Kubur u CM ba khuid ka Wah Umkhrah bad Umshyrpi na ka Lockdown

Shillong: U Myntri Rangbah, u Conrad Sangma, u la kubur ba namar ka jingkhang khyrdep mynta la ar bnai, ka la don shisha ka jingkhuid ha ka wah Umkhrah bad Wah Umshyrpi. U Conrad, ha ka sngi palei, u la ïathuh hapoh ïing dorbar ba ka jingkhuid ka wah Umkhrah ka la kiew da 50 percent bad ka wah Umshyrpi pat da 30 percent.
“Ym dei ba ngi kwah ban bteng ka jingkhang dam, hynrei lada ka bteng kumne, ka jingkhuid kine ki wah kan nang kiew shuh shuh”, la ong u Myntri Rangbah.
Shuh shuh, u la ong ba ki paidbah kidei ban shim shibun ki jinghikai kiba bha na kane ka jingjia ka jingwan ka khlam, namar ki don shibun kiei kiei kiba bha na kane ka jingwan ka khlam bad ka jingkhang dam.
Lah ban kdew hangne ba kiba bun ki nongshongshnong jong ka nongbah Shillong, ki la kdew ïa ka jingkhuid bad ka jingsngur ka um ha Wah Umkhrah naduh ba la pynjari ïa ka jingkhang dam. Ka daw ka long ba kiba bun ki dukan ki khangh. Ki paidbah ruh kim ïoh lad ban mih shabar bad kane ka la long kum ka jingkyrkhu ba na sha lyndet ïa kane ka wah kaba ju bna nam ïa ka jingkhuid naduh ki por mynshuwa.
Na ka liang u Myntri Rangbah u la kyntu ia ki paidbah ban pynneh pynsah ia kane ka jingkhuid jong kine ki Wah ha nongbah Shillong bad kumjuh ruh ban kiar na kaba bret ia ki jaboh jabaiñ ha kitei ki wah khnang ba kin iai neh kane ka jingkhuid ym tang ha kane ka por ba don ka jingkhang dam hynrei kan iai neh baroh shi lynter bad kan wanrah ia ka jingitynnad jong ka nongbah Shillong.