Press "Enter" to skip to content

Kyntur pud ka Assam ha ka shnong Moishaldanga, West Garo Hills, ujor ka GSU

Shillong, Jymmang, 21: Ka Garo Student’s Union mynta ka sngi Palei ka la pynpaw pyrthei ïa ka jingkyntur pud jong ka Sorkar Assam sha ka shnong Moishaldanga kaba hap hapoh ka West Garo Hills jong ka Jylla Meghalaya.
Ka Meghalaya ka ïasam haduh 884.9 kilomitar ka khappud bad ka Assam bad kine ki dei ki jaka kiba ka Meghalaya bad ka Assam ki dang ïakajia pud haduh mynta mynne.
“Ha ka jinghiar tohkit jong ka GSU, ngi la ïoh jingtip ba ha ka 18 tarik mynta u bnai ka kynhun ba la ïalam da u Lad Mondol bad u Nurul Islam na South Salmara District ba la synran lang da ki Pulit Assam na Kalapani bad ki Pulit CRPF na Singimari ki la wan rung shapoh ka shnong Moishaldanga, Meghalaya kaba jngai kumba 3-4 kilomitar na ka shnong Pipulbari, Meghalaya bad kam jubor haduh 68 Bigha ka khyndew ba ka dang hap hapoh u pud u sam jong ka Jylla Assam,” ong u President ka GSU, u Tengsak Gabil Momin ha u kyrwoh ba la phah mynta ka sngi.
“Katkum ka jingïoh jingtip, ïa kane ka kynhun la phah da u Saibar Rahman, ADC ka South Salmara District,” la kynnoh une u nongïalam ka GSU.
“Ka hamasaïa ka la pur stet ba haduh 40 bigha ka khyndew la dep bhah sha ki 20 ngut ki briew (ha ka dor 2 lak shi bigha) na ka jylla Assam bad ïa ka jaka kaba dang sah yn sa sam noh shen. Ki Ophisar na ka jylla Assam ki la pynkhreh ruh ban tei ïa ka Post katkum ka jingïoh jingtip. Uba donkti halor kane ka kam la suba ba u dei u Abul Hanif u long kum u ‘dalal’ ban leit pyni jaka khnang ban ïoh jingmyntoi shimet,” la kynnoh ka Seng.
Katkum ka jingïathuh jong une u President ka GSU, kane ka jaka ba la wan kam be-aiñ da ka Assam ka dei ka nongkynti jong ki lai ngut ki nongshong shnong jong ka jylla Meghalaya kiba don ruh ïa ki Dulir khyndew ba la ïoh na ka Garo Hills Autonomous District Council (GHADC) bad kiba la siew ruh ïa ka khajna. Hynrei haba kine ki trai jaka ki la pynshisha ïa ki dulir ba ka jaka ka hap sha ka jylla Meghalaya hyrnei, ki ophisar ka Assam ki la kyntait da kaba ong ba kine ki dulir ki dei kiba shu thok.
Ka Seng ka la kynnoh ruh ba kane ka jingleh jong ka Sorkar Assam ka dei beit ka jingshim kabu kaba la thmu lypa kum ha kane ka por ba dang don ka jingkhang khyrdep ha ka ri baroh kawei. “Ngi don ïa ki dur bad ki video kiba pynshisha ba u DC, u ADC, u Lad Mondol, ki Pulit bad ki pulit CRPF ki la wan hiar sha kane ka shnong,” la kam ka GSU.
“Ka GSU ka la dawa ïa ka Sorkar Meghalaya ba kan tuklar mardor halor kane namar lada ka Sorkar kam leh eiei mynta ka kynti khlempep kan wan jia kum ha Langpih bad ha Rongsai, Meghalaya,”ong une u nongïalam ka Seng.