Press "Enter" to skip to content

Sah sa tang 1181 spah ngut na ka 3060 hajar ngut ki bar jylla kiba sahkut ha East Jaiñtia Hills

Khliehriat, Jymmang, 21: Na ka daw ka jingshah khang khyrdep kaba na ka daw u COVID-19 ki la don mynshwa haduh 3060 hajar ngut ki briew kiba na ki jylla bapher bapher kiba sahkut sah ha East Jaintia Hills District,katba katkum ka kaiphot ba la ioh lum mynta ka sngi na ka tnat Distric Task Force East Jaintia Hills District la ong ba mynta ki don sa tang 1181 ngut,namar kiba bun ki la leit phai noh sha la ki jong ki jong ki jylla na ka daw ba ym don kam don jam shuh hapoh ka District naduh ba ka sorkar ka la pynbna ïa ka jingkhangdam kaba long na ka daw ban ïada na ka jingsaphriang u khñiang jingpang COVID-19.
Katkum ka kaiphot ba la ioh lum,kiba bun ki dei ki Assamese kiba la leit phai noh sha la ka jong ka jylla ha kaba mynshwa ki don haduh 2189 ngut katba mynta pat ki don sa tang 200 ngut,ki Bihari pat ki don mynshwa 224 ngut mynta ki don 454 ngut,ki Bengali ki don mynshwa 50 ngut mynta ka jingdon jong ki ka kiew haduh 146 ngut,katba ha kiwei kiwei ki jait bynriew pat ka don ka jingkiew bad ka jinghiar kaba ym da palat eh haduh katta katta,katba ki Nepali pat ki don beit kumjuh hi 456 ngut bad ki Arunachal Pradesh kiba don 18 ngut ki dang sah hi baroh 18 ngut.
Na pdeng kine ki 1181 ngut kiba la register kyrteng hapoh ka tnat District Task Force,tang 524 ngut ki standard migrants kiba dang hap ban pynbiang bam ka District lyngba ka District Task force,katba ïa kiwei pat la pynbiang bam da ki trai ba ju ai kam ai jam ïa ki bad don ruh kiba pynbiang hi da lade,katba katkum ka kaiphot ba mynshwa pat (11/5/2020) na pdeng ki 3060 ngut ki don haduh 1621 ngut ba pynbiang bam ki bor District.
Ki jaitbynriew kiba la leit phai lut ki dei kiba na Tamilnadu (1) bad na Jamu-Kashmir (1).
Ia mynta hi,ki la don sa tang ar tylli ki jaka ba la buh ïa kine ki standard migrants ha East Jaintia Hills,ha kaba la buh ïa ki ha Indoor Stadium Dkhiah East bad ha Lahaleiñ,ka shnong kaba don ha khappud bad ka ri Bangladesh,ïa kine kiba don ha Lahalein la shim jingkit khlieh da ka National Border Construction Company ban peit bad ban pyndap bam ïa ki.
Kan sa nang don ka jinghiar ha ka jingdon ki briew kiba na bar jylla (Standard Migrants) ha East Jaintia Hills District ha kaba ki don kiba la nang mih ban leit phai noh sha la ki jong ki jylla jan man la ka sngi ha kaba ki bor District jong ka East Jaintia Hills District ki la pynbiang ruh ki bos bad ki sumo ïa kito kiba kwah ban leit phai noh sha la ki jong ki jylla.