Press "Enter" to skip to content

Shaei kane ka ‘lockdown’ kan ïalam ïa ka jylla???

Ka jingkhangdam ïa ka Ri kumjuh ïa ka Jylla mynta la kumba arbnai duna ei ei khlem artatien ka la ktah ïa ka ïoh ka kot jong palat 80 – 90 persen ki nongshong shnong jong ka jylla khamtam eh kito kiba im da kaba bylla kyndoi jakpoh ne kiba shu im da kaba bylla sngi ne die ïa ki mar khutia mutia. Kaba kham isynei eh mynta ka long ruh ïa kito kiba ju im da kaba shong die jingdie ha Ïewduh namar katei ka ïew haduh mynta kam pat plie satia.
Na kaei kaba ngi ïohi mynta ka long ba ki nongrep da lei lei kin ym ïap thngan namar ka sorkar ka la plie ïa ka lad ka lynti na ka bynta jong ki ba kin lah ban leit die ïa ki jhur ki jhep lane ïa ki mar rep jong ki ha kito ki ïew kyrpang ba la buh. Tangba kawei ka jingeh kaba ki nongrep ki kynduh ka long ba man ki jaka ba ki leit die kin ym lah satia ban die lut hynrei tang mar shiteng eh namar ba duna ki nongthied. Katkum ka jingiathuh jong ki, ka daw ka long ba ka jingbym don ïa ki ‘car pass’ kadei ka dawbah kaba khanglad ïa ki nongshong shnong na kiwei pat ki jaka ba kham pajih ban leit sha kitei ki ïew. Kumta halor katei ka bynta, donkam ïa ka sorkar ban peit ba man la ki shnong kiba la kham heh ka jingbun briew ba kadei ban shah ban don kawei ka kynja ïew kaba kham heh khnang ban pynsuk ïa ki nongshong shnong.
Kawei pat ka bynta kaba ka sorkar jylla khamtam na ka tnad Food and Safety lane na ka tnad ka Koit ka Khiah ka jylla ka donkam ban peitngor bha ka long ïa ki marbam khamtam kito kiba hap ban shu shet lypa. Kumba ka long hi, ka sorkar ka ju ailad lai ne saw sngi ïa ki dukan heh ba kin plie bad hadien pat sa ailad sa ïa ki dukan rit ba kin die pateng sha ki paidbah. Dei ha kum kine ki sngi ba la ju ïohi ba ki paidbah ki ju shet bun ki jait jingbam bad leit die pat ha ki ïew ki hat ne ki jaka ba long ïew. Kaei kaba sngew shong nongrim ban buh jingkylli ka long ba hato ïa kito ki jingbam ba ym lah shuh ban die ki paidbah ki bret noh lane ki buh beit haduh ban da plie ïew biang.
Lada jia ba ïa kitei ki jait jingbam ki ieh tad haduh ban da long ïew biang kan buh ha ka jingeh kaba khraw bha ïa ki paidbah ha ka liang ka koit ka khiah khamtam ïa kito kiba dang lung ka met. Kane kadei ka por ba ka tnad kadei ban shimkhia bha ban leit jurip man ki jaka ne ki dukan ba die jingbam ïoh kumno kumno ki die ïa ki jingbam ba la sah.
Kaba kham sngewsyier mynta ka long kaei kaban jia pat ïa ki jaiñ ne ki juti snieh kiba don ha ki basa jaiñ ha Ïewduh. Lada jia ba ka um slap ka ïoh rung ha kitei ki dukan khlem pep ki jaiñ ne ki juti snieh kin pyut lut bad kan sa mih ka jingsma kaba shyrkhei bha kaba lah pat ban ktah kylla ïa ka koit ka khiah jong ki paidbah. Ha kum kane ka por, na ka liang ka Hima Mylliem ka la dei ban ailad ïa kito ki trai dukan ba buh ïa kitei ki jait tiar ba kin leit sei noh khnang ba kan long ka jingiada lypa na kaei kaba lah ban jia hadien habud.
Ki dang don ruh bun kiwei pat ki jait tiar ha ki basa bapher bapher hapoh ïewduh kiba donkam ban sei noh khnang ba ki paidbah kin lah ban die noh lym kumta ka jingduh nong kan long ïa ki hi namar ym lah ban tip shaei kane ka jingkhangdam ïa ka jylla kan ïalam, la kan kut noh ne kan iai bteng haduh ba ka Ri baroh kawei kan da khuid phar na utei u khniang jingpang ba shyrkhei uba syllad naphang lin wat ïa ki ri ba khlaiñbor ha ka pyrthei.