Press "Enter" to skip to content

Ba don ki ïew sorkar, kmen ki nongrep ba lait na ki khajna bunjait

Baroh shi katta la ju ïa kren ba ka jingkhang ïa ka Ïewduh ka la wanrah ka jingduhnong kaba khraw haduh katta katta ïa ki nongrep jong ka rilum Khasi bad Jaiñtia halor ka nongrim ba ym don shuh kiwei pat ki jaka long ïew ba kin lah ban leit die ïa ki mar rep jong ki. Hynrei hadien da ka jingshimkhia jong ka sorkar jylla la ïohi ba jan man ki shnong ki la don kita ki ïew nongrep kiba kylla long ka jingkyrkhu ym tang ïa ki nongrep hynrei khamtam eh ïa ki paidbah ha ki shnong ki thaw ki bym kot bor ne donlad ban leit thied hi ha kum kane ka por ba ki kali kamai kim pat ïoh ban mih laitluid ban kamai.
Lada phai pat sha ki nongrep, ka jingailad jong ka sorkar ban plie ïa kum kitei ki ïew nongrep ha man la ki jaka ka la pynkmen haduh katta katta ïa ki. Lah ruh ban kdew ba ki paidbah ba sah ha ki thaiñ Pynursla, Laitlyngkot, Mawjrong, Mylliem, Mawphlang bad Sohiong da kaba suk ki lah ban leit die ïa ki mar rep jong ki ha madan Umdiengpun kaba ha 7 Mer. Kane ka jaka nalor ba ka suk ka jaka pynieng kali ka iarap ruh ïa ki nongrep namar ka bai kali ka la duna bun bha ban ïa kaba ki leit shaduh Ïewduh.
Kawei pat ka jingïohnong ka long ba ha kitei ki ïew ba la buh da ka sorkar ki nongrep ba wan die kim donkam satia ban siew ïa ka bai rung ïew lane kata ka khajna ïew kumba ki ju hap ban siew ha Ïewduh. Kawei kaba ki nongrep ki kham ïohnong eh kadei ba ki la lait na ka jingshah ot kilo kaba kum ki nongrep ki ju ud ju nam man ka por. Ka sur ki nongrep kaba ki pynpaw ka long ba ki sngewsuk lada ka sorkar ka ailad beit ba kin bteng ïa kitei ki ïew wat hadien ba la kut ka lock down. Kadei ka jingshisha ba lada uwei uwei u nongrep u ba wan die phan lada u shah khate 10 kilo u mar rep na ka 100 kilo man ka sngi kaba mut ha ka shi taïew ka jingduh nong ka la long shaba palat liam.
Hynrei bapli haba ka lad kam plie ki hap ban shu khñium hala marwei namar yn ym don ba pynsngap ïa ka jingeh jong ki. Sngew iahap ruh ïa ka jingong jong ki ba ka bha ba ki lah ban die 20 tyngka shi kilo u jhur ha ki ïew ba buh da ka sorkar ban ïa kaba leit die ha Ïewduh watla ka dor ka kham heh khyndiat . Lada kheiñ kadei shisha namar ha ki ïew sorkar lada ki lah ban die 100 kilo ka pisa kaba mih 2000 tyngka kadei beit ka jong ki. Katba lada ki die ha Ïewduh Nyngkong shwa ka bai rung ïew, nangta sa ka shah khate 5- 10 kilo shi byrni bad sa kiwei kiwei.
Kumta, lada shim na kaei kaba ki pynpaw, la sngewdei ban ong ïa ka sorkar ba kadei ban pynneh shwa ïa kitei ki ïew nongrep ha kito ki jaka ba la buh namar ka jingïoh nong kadei ïa ki nongrep hi. Katba ha Ïewduh pat kiba shah khniot dor dei ki nongrep bad kiba ïohnong dei ki nongkhaii heh spah. Kane kadei ruh ka por kaba biang eh ïa ka sorkar ban bishar bniah halor ka jingïoh nong duhnong jong ki nongrep ym ban shu sngap tang ïa kaei kaba ki nongkhaii ki ong.
Ha kawei pat ka liang ka jingkhangdam ïa ka Ïewduh ka la long ka jingduhnong kaba khraw ïa ka Hima Mylliem kaba dei ka nongpeit nongkhmih. Lada tang kiba don dukan ki la poi haduh 5000 tylli ka mut lada kheiñlang lei sa bad kiba shong madan kan kot beit sha ka 6000 – 7000 tylli. Kumta lada ka Hima ka lum tang 10 tyngka shi sngi na kitei ki dukan ka khajna ka la poi 60,000 – 70,000 tyngka shisngi bad lada khein ha shibnai ka la poi sha ka 18,00,000 – 21,00,000 tyngka. Kane ruh kadei ka jingkheiñ kaba rit bad lehse ki lah ban shim bun shah na kane ruh khamtam ïa ki dukan ba heh.
Khlem pep ka jingkhang dam ha kine ki arbnai tam ka la ktah jur ïa ka pla tyngka jong ka Hima bad lada iai bteng kan buh jingeh wat ban siew ïa ka tulop jong ki nongtrei ha ka Hima kynthup ïa ki nongap ïew.
Hynrei, dang shen pat la ïohi ba u Syiem ka Hima Mylliem hi u pynpaw ba kim pat kwah ban plie ïa ka Ïewduh halor ka nongrim ba kan dang eh bha ïa ki ban khang ne tehlakam ïa ki paidbah ba wan die ne thied hapoh Ïewduh. Kumta, na bynta ka jingmyntoi lang jong baroh, ka sorkar kam pat dei satia ban plie ïa ka Ïewduh lane ïa ka Khyndailad katba ki samla ba don shabar jylla kim pat wanphai lut.