Press "Enter" to skip to content

ïasnohktilang ki rangïalehkai phutbol ban ïarap ïa ki lanot eriong ‘Amphan’

New Delhi, Jymmang 28: Ki rangïalehkai phutbol ka ri India ki la wan shakhmat ban ïasnohktilang na ka bynta ban ïarap ïa ki lanot kiba la shah ktah na ka eriong Amphan kaba la khyrwit ïa ki bynta jong ka West Bengal bad Odisha.
Kitei ki rangïalehkai ki don kumba 38 ngut ki la rai ban ai jingïarap sha kito ki briew kiba la shah ktah.
Kitei ki rangïalehkai kiba la don ka mynsiem arap para briew ki kynthup ïa u Subrata Paul, Mehtab Hossain, Arnab Mondal, Subhashish Roychowdhury, Sandip Nandy, Pronay Halder, Pritam Kotal, Shouvik Ghosh nalor kiwei.
“Ka jingieit jong ki paidbah ka la pynkiew ïa ka jingïalehkai phutbol. Ngi sngew ba ka la dei sa ka por jong ngi ban siew kylliang sha kito baroh kiba don ha kitei ki jaka kiba la shah ktah ha katei ka eriong Amphan. Ka jingim briew ka long ban ïarap iwei ïa iwei pat ha kiba kum kine ki por kiba jynjar. Nga kyntu ïa baroh ba phim wan shakhmat bad ban kner ki jingïarap,” ong u Subrada Paul.
Ki la don katto katne ki rangïalehkai kiba la thmu ban leit jngoh da la ki jong ki khmat sha kitei ki jaka kiba la shah ktah bad ban ïarap ïa kito ki briew kiba donkam shisha ka jingïarap, ïathuh u midfielder u Halder.
“Nga la ïoh sngew ba ki briew ki la duh noh ïa la ki ïing ki sem. Ki don kiba la shah pynjulor noh ki jaka rep ha kaba ka jingpynlut bad ka jingtrei shitom jong ki baroh shisnem ka la shu syrwa ei. Katno katne napdeng jong ngi, ngin sa leit sha kito ki jaka kiba la shah ktah bad ban pyrshang ai ki jingïarap sha kito ki briew kat ïa kaba ngi lah ei,” u la ong.
“Kane kadei ka sien ba nyngkong ba ngan ïohi kum ïa kane ka jingshah pynjulor ha ka eriong. Nga kyrpad ïa iwei pa iwei ban wan shakhmat ban ïatreilang bad ïarap ïa kito ki briew kiba la shah ktah eh na katei ka jingpynjot eriong.”
U Mondal kapten barim ka kynhun ka ri u la kyntu ïa ki paidbah nongshong shnong jong ka ri kynthup ïa kiba na West Bengal ban wan ïasnohktilang ha ka jingïakhun pyrshah ïa ka khlam Covid-19 bad ruh ïa ka eriong Amphan.