Press "Enter" to skip to content

KA UPPER SHILLONG HA KI SNGI BA LA LEIT NOH

U Spiton Kharakor

Ka Upper Shillong ka long ka shnong kaba don shathie na ka wah Umshyrpi bad sha sepngi na ka Wah Umjasai. Ka don marjan bad u Lum Shillong harud ka Surok National Highway No. 40 jong ka Shillong Dawki-Tamabil bad surok Sohra, Mawsynram bad Nongstoin. Ki Shnong kiba don ha ka thain Upper Shillong ki long (1) Lummawbah (2) Nongkseh (3) Umlyngka (4) Nongumlong (5) Laimer (6) Sawmer (7) Sanmer (8) Mawklot (9) Nongpyiur (10) Umdiengpun ne Hynniewmer.
Ki shnong ba kham rim napdeng kitei ka dei ka Nongkseh , Umlyngka, Nongumlong, Mawklot, Nongpyiur bad Umdiengpun. Ki kyrteng thymmai kum ka Laimer, , Sawmer, Sanmer ki long ki shnong kiba dang shu mih ynda la shna ïa ka surok ïaid kali kulai ïaid kali motor sha Sohra. Ki trai bri trai jaka naduh Lai mer shaneng haduh Sanmer ki dei ki kur Kharkongor, Thawmuit, Kharbudnah bad jait Nongkhlaw.
Ha ki snem 1861 ter ter ka sorkar Phareng ka la thied jaka ha Armer bad Sanmer , Hynriew Mer bad Hynnñiew Mer Upper Shillong ha kaba la shna ïa ka Umlong Cantonment ha Armer. Ha kane ka len shpai u trei kam u Heh duh jong ka Indian Army u Lt. General uba ki ong u dei u General Officer Commanding ka dong shatei lam mihngi jong ka India. Ia ka Headquarters jong u la tip da ka kyrteng “101’ . Haduh ka snem 1947 shwa ba ki phareng kin mih na India, la tip ïa katei ka jaka trei u heh shipai G.O.C kum ka Braemer Estate”.
Ka Indian Air Force ka don ka Headquarters ha Hynniewmer. U khlieh duh ka Eastern Air Command u dei u Air Vice Marshal bad u pynïaid kam ïa ki Liengsuin ïaleh thma nangne na Upper Shillong. Katba lah ban kynmaw katei ka Headquarters ki Air Foce ka sdang treikam naduh ka snem 1964 ei ei, kata hadien ba ka Ri India ka la shah hiar thma ha ki China ha u October 1962. La tei ïa ka Upper Shillong Helipad jong ki Military ha ka snem 1963.
Haba la pynlong ïa ka Shillong kum ka Nongbah ka Ri Assam ha ka snem 1874, ka Upper Shillong ka la sdang na ki shnong kiba rit kiba dang khyndiat briew bad ki la nang heh nang heh suki suki. U Viceroy jong ka Ri India u la wan khmih ïa ka Shillong ha katei ka juh ka snem 1874, da kaba shong da ka jhad naduh Calcutta lyngba ka Wah Padma bad ka Wah Brahmaputra. U la hiar nyngkong ha Guahati, nangta u la wan sha Shillong da ka surok G.S. Road haduh Shillong. Ym tang katta, u la wan jngoh ïa ka thain Upper Shillong de. U la ai jingmut, ba khnang ban pynitynnad ïa kato ka thain naduh Armer haduh Pomlum dei ban shim jaka noh da ka Sorkar. Ki bor sorkar Assam ki la leh ïa kata mardor. La shimti noh shibynta ïa ka jaka jong ki briew bad la thaw ïa ka ‘law sorkari ne kita ki Govt. Protected forests naduh Laitkor, Riat Laban, Upper Shillong haduh Pomlum ha ki ranab ba marjan bad u Lum Shillong. Ngim lah ban tip lada ym dei ba wan jngoh u Viceroy ka Ri India sha Shillong, hato ka Upper Shillong ka lah ma ban ïoh ïa ka burom kum ka jaka ba itynnad ha kaba ki ‘er iwbih kin ïai suhsieng ban ring mynsiem ïa ka oxygen na ki law diengkseh jong ka.
Haba ka Sorkar phareng ka la ïoh jaka ha Upper Shillong ka la nang kwah shuh shuh haduh u kliar lum Shillong syndon. Ia kane, u Rajah Melay Sing ka Hima Mylliem (Kñi tymmen jong u Pa’iem Latho Manik Syiem ) um shym la shah satia ne kohnguh. U la ong ba u Lum Shyllong u dei u Lum Niam, kumta ym lah ban don ne long trai khyndew dano dano ruh. U la sait ïa la ki jong ki kti, ba um lah ban die ïa u lum niam jong ka Jaid Bynriew sha ki kti jong ka Sorkar Phareng. (la sot na ka kot “From Residency to Raj Bhawvan – A History of the Shillong Government house” ) ha ka lynnong “Acquisition of Land”ne jingshim jaka ka Sorkar, page 25-26.
Ki Sngi bad ki por ki la nang ïaid ha ki shalyntem jong ka por. Ka Upper Shillong ruh ka la nang ïai kylla dur katkum ki juk. Ha ka por synshar phareng ki sahep bad ki mem ki juh ban shong ban sah ha Upper Shillong kum ka jaka ba pyngngad. La ïathuh ba don haduh 14 tylli ki ïing bangla naduh lai mer haduh Sawmer shiteng ba sah ki phareng.
1. Ka Iing Bangla Rong Jyrngam kaba dei ka jong u Sahep Gilfelen ba don ha Nongkseh ha syndah Iing I Kong Alvareen Lyngdoh. Ha kane ka ïing la wan sah pyngngad sah sumar pang shipor U Prime Minister ba nyngkong jong ka Assam ha ka snem 1937 bad 1943 haduh 1946 . Kane ka ïing ka dang sah kumto haduh mynta.
2. Ka ïing Bangla jong u Sahep John Edmund Haffield uba dei u trai jong ka “Chesnut Lodge” ba don bun ki diengsohot Phareng. La sin kyrteng ïa une u shep Irish kum u Sahep Pyngkding, namar u long uba sngaid. Ha kane ka ïing bad ka jaka jong u la ïeng mynta ka st. Paul’s Seminary ha 3rd Mer.
3. U Sahep Melish u dei u trai jong ka Farm dieng soh u ba shongkha ïa I Kong Niak Nongkhlaw. Kane ka Farm ka la duh noh mynta. La tip ïa ka mynta kum ka Riatsohkhlur ba la dep die lyngkhot lyngkhot sha ki Khar Nepali bad katto katne ngut ki Khasi de.
4. Ka “Meath Home ka dei hapoh ka jingsumar u Haidu Sahep na Calcutta. Man la ka por lyiur u ju wan ïalam kai ïa ki khun Sahep khun men na ri Dkhar ban pynsah hangne ha ïing haduh ka snem 1946-47 ei ei. Ki Nongtrei jong ka Meath Home ki sah ha ka jaka ba don ka Bormanik College namar ka dei ka jaka jong ka Meath Home. Katba ki syiem Tripura kim pat tei ïa ka Tripura Castle” ha Cleave Colony, la ong, ki la ju sah ha katei ka Meath Home. Ha kane ka jaka ki don ki kor ki bor ba ba thew ïa ka jingsdang bad jingïaid lynti u Khmi ne u Khynniuh jumai jong ka Ophis “India Meteorological Departemnt” ha 3rd Mile.
5. Ka ïing Bangla jong u Sahep Robert Edmund Haffield ha 3rd Mile ka sah kumjuh kumba ka long . Ia une u Sahep Irish ki sin u Sahep raikhoh bad u shongkha bad I Kong Kriksibon Kharkongor. U long uwei na ki sahep ba kham don kham em jong ka Upper Shillong.
6. Ka ïing Syiem Nepal mynshuwa ka dei ka jong uwei u sahep ba ju shna ïa ki pleit ne plate lyngba ka ïing factory jong u. U ai kyrteng ïa ka ïing da ka “Wilton Hall”. Hadien la thied da uwei u Syiem khynnah ka Nepal kaba u ju leit uju wan bad u sah shipor ar por bad ka Mahadei kliar jong u. Ki ong ka khun jong u ka la die noh ïa ka Bangla bad jaka puta sha ka Office jong ka Indian Institute of Geometism bad ka leit sah noh ïalade sha Calcutta. 7. Ka ïing Bangla jong u Sahep Mawatt la ai kyrteng da ka “Pine Ridge”. La die mynta ïa kane ka Bangla sha ki Khasi.
8. U Sahep Berkeley u trei kum u Sahep Bishar Magistrate bad u dei u Trai jong ka “Raj bari”. U shong marwei bad um don khun don kti. Ki ong u la thoh WILL lut ka Spah ka phew bad jingdon jingem sha ki nongtrei ïing jong u. Kawei ka jait syiem kynthei, Manipuri ka ba ïoh lok sahep bad ka la sah ha katei ka ïing. Ia u khun jong ka la sin kyrteng da u Raj Kumar. Ka kyrteng ba pura jong u ka long u Mr. Edward Lawrence Mcculloch . Une u Sahep u la khlad noh ha ka snem 1958. U dei u kparad jong I kong Jenifer Diengdoh.
9. Ka “Evergreen Cottage” ka dei ka ïing bangla kaba don ha Sawmer shiteng. Mynshwa ka dei ka ïing jong ka Mrs. Townsen, bad hadien pat la leit sah sa u Bahu William ha katei ka ïing. U World Renouned Naturalist u Sahep E.P.Gee u sahep shong khynraw u la sah marwei ha katei ka ïing bangla haduh ka snem 1966-67 ei ei. U la lum ïa ki syntiew ki skud bad la thung ha katei ka Bangla. U la shondur wat ïa u khla katba u dang ang shyntur wat najan bha khlem jingsheptieng ei ei. Shipor la shim wai ïa katei ka ïing da ka Ophis MeSEB ban siew bill Electric ha ka thain Upper Shillong.
10. Ka don sa kawei ka ïing Bangla kaba don jngai na ka surok bah ha syndah ka ‘lawsorkari kaba la jer kyrteng da ka “Rose Cottage, kaba la tei ïa kato ka ïing bangla kaba heh,naduh ka snem 1929. Hangne ju shong ju sah u Sahep John Batram Ram haduh ki sngi ba un da khlad na ka pyrthei. Ki nong Sawmer ki sin ïa u kum u Sahep Rem, uba ju sngewtynnad ban shong kulai dangstep dang step naduh Sawmer haduh ‘Law Jynriew haneng Fire Brigade Laitumkhrah, lyngba ka lynti kodom kulai ne ka Bridle’s Path ka lynti ïaid kulai”. I kmie jong u Rangbah Manoj i Kong Rose Mary Mawlong i sah mynta ha kane ka Bangla u Sahep Rem hyndai.
11. U Sahep dih smuk ba ri syiar ha Sawmer shiteng u dei u Mr. Carother. Une u sahep u shong kha ïa ka Kharkuli kaba na Silchar Barak Valley jong ka Assam. Ynda la ïap utei u sahep, kane ka lok ka la leit phai sha la shnong bad ka die noh ïa ka ïing bad ki jingdon jingem jong u.
12. U Mr. Blake jong ka Ri Scotland u la tei ïa ka ïing Bangla ha Sawmer shiteng. U la ïapoi kha bad I Kong Nelsi Kharshiing. U la die noh ïa ka bangla ïing ha ki Syiem Charkari jong ka Uttar Pradesh. Jait ba dei ki Syiem te ki im bad leh kmen sadhai bad ki ri ïa ki ksew da ki dorjon. Mynta sah sa tang jingkynmaw. Kine ki Syiem ki la die ïa ka, bad la thied da uwei u Khasi badon baem na Shillong.
13. U Sahep Ernest Montgomery Wood u la long uwei na ki sahep ba paw khmat ba ju sah ha Upper Shillong bad la ki khun ki kti ha “Sunny Side”. Une u Sahep u la ïapoi kha bad I Kong Mini Swer bad ïoh hynriew ngut ki khun ki kti, kawei ka dei ka kynthei bad san ngut ki shynrang. Ki la die noh ïa ka iing jong ki sha ka Catholic Mission ha ka snem 1953. U Khun rangbah jong ki u dei u Brigadier Ronald Earnest Wood Swer. Une u la rung kum u Military Officer ha ka Indian Army. Ha ki snem 1943-45 u la leit thma sha ka Ri Burma pyrshah ïa ki Japan. U la bat ïa ka kyrdan Brigadier jong ka Assam Regimental Centre haduh ba un da shong thait. Haduh mynta dei tang ma u marwei napdeng ki Khasi uba la ïoh bat ïa ka Rank kaba saw ha ka Military order jong ka Indian Army ban ïalam ïa ki shipaiïia ka Brigade baroh kawei kum u Brigadier jong ka.
U Brigadier R.E.W. Swer u la ïapoi kha bad ka mem French Phareng. U la khlad noh ha ka snem 1984 ha Ri France .
14. U Mr. Hall u long sa uwei u sahep, ba ki nong Sawmer ki dang kynmaw ieid ia u, kum u Sahep Upper Shillong ba don ka main Sahep. Une u la ia poikha bad I Kong Kre. Ha kane ka bangla jong u la wan sah khadduh sa u Sahep R.F. Twist uba ju trei kum u Garden Tea Manger sha Ri Dkhar haduh ki por synshar phareng. Une u dei u Sahep European uba la sah khadduh bad im ha Upper Shillong haduh ka sngi ka jingkhlad noh jong u ha ka snem 2007. La tep ia u ha u lum jingtep ‘Law diengmet jong ka Sawmer.
Haba ngi ialap khana ia ka Upper Shillong ha ki sngi ba la leit noh, ngim sngewdei ban klet ia ka Nur-um kaba tuid shar shar naduh Sangmein haduh ka Farm thung soh u Sahep Melish bad Kong Niak Nongkhlaw ha Riat Sohkhlur kaba tuid lyngba ka Farm Hynriewmer sha Sanmer, Sawmer, tuid lyngba ka Phyllaw Syntiew ha Meath Home(Lai mer) haduh Farm thung soh.
La ai kyrteng ia katei ka Nur-um kum ka Upper Shillong Aqweduct ba la tei ia ka naduh ka snem 1938-39 ei ei. U Sahep Edward Lawrence Mcculloch u ju khmih bha ia katei ka Aqweduct tad haduh ba un da khlad noh ha ka snem 1958. Ka la long ka jingmyntoi ha kito ki por ban saitjain sait nep, thung jingthung bad ri jingri da ka jingdon katei ka Aqweduct. Lai snem hadien ba la khlad u Sahep Mcculloch kata ha ka snem 1961, katei ka nur-um ka sdang duh noh bad kam shym poi um shuh sha Laimer.
Ka Upper Shillong ka la iaid lyngba ki jingsuk bad jingpalei ha ki sngi ba la leit noh. Kawei ka jingsyier ia ka Upper Shillong ka long ka jingkhapngiah kali naduh Umshyrpi haduh 101 haduh Laimer man ka sngi. Sa tang arsnem ka surok National Highway na Tura-Nongstoin kan poi haduh Hynniew Mer. Te ka jingkhapngiah kali kan lah ban poi shaduh Lai Mer haduh Umshyrpi man ka sngi.
Tang kane kawei ngi kyntu ia ki bor ba dei khmih ia ki surok P.W.D, ban shna kyrkieh sa ka Upper Shillong Bye pass na Sawmer shaduh Lawsohtun Block –VI lyngba ka Bridle’s path ne lynti iaid kulai hyndai. Bad kawei pat ka surok dei ban shna na Sawmer sha Sohbir, Sohtyngab, Nongumlong haduh Wah Umiam. U Rangbah Nit Shabong Ex-MLA ka Meghalaya ula iohi jngai ia ka jingdonkam ba na Upper Shillong Umlyngka, dei ban pyniasoh da ka surok kali sha Shiliangum Lum Diengiei, khlem da hap iaid shuh na Mawlyndep-Umbir-Ri Bhoi lada wan sha Shillong. Ka Upper Shillong ka donkam eh ia ki Scheme Urban Development namar ba ka la long lypa ka shnong khapsor ba don jingkyrmen. Ki Ministers, ki MLA’s Meghalaya bad u Opposition Leader ka Meghalaya Legislative Assembly ki la wan thied jaka shongiing sha Upper Shillong mynta, ban long ki nongshong shnong ba hadien jong ka shnong Upper Shillong.