Press "Enter" to skip to content

Hato ngi lah ban mutdur sa kiei ki ban jia!

Haba pha sha ki jingjia ha kine ki sngi kiba la mih na ka daw jong ka jingpynkhynñiuh jong ka khlam Covid 19, kum ki briew bun ngin ym lah ban shemphang bad ka long kaei kaei ka bympoi pyrkhat ba da ki lak ngut ki mynsiem briew kin khlad noh na ka daw jong ka jingbymlah ban sumar ne pynkoit ïa kito kiba ngat ha katei ka jingpang. Kane ka jingpang ka la buh ïa ka pyrthei baroh kawei ha ka jingsheptieng kat haduh ba la pynlong ïa ka pyrthei baroh kawei ban khangdam ne lockdown noh ïa ki shnong ki thaw baroh bad bun ki kam ki jam ki la sangeh lut. Kane ka la pynlong ïa ki briew baroh ban hap ban leit phai noh sha la ki jong ki ïing ki sem namar jong ka jingsangeh lut ki kam ki jam baroh. Kane ka wanrah ïa ka jingjia ba kham sngewsih shuh ka long ka jingïap ki briew na ka jingjynjar kaba la mih na kane, kum ka jingïap thngan, ka jingshim ïa la ka jingim bad ruh ka jingkheiñ duh ialade wat ban thiah bad shah tylliap ïap ha ki lynti rel.
Haba peit sha kine ki jingeh, la ïoh sngew ruh ïa ki jingkynthoh jong ki briew ba kiei kiei baroh ki dei bad ki la jia kumba la thoh shaphang kita ki jingjynjar bah ha ka Baibl. Ki khraw pyrkhat ki pynpaw ba kum kine kiei kiei ki jia ban pynkhiah ïa ka mei mariang hi hynrei dei kito ki longïing kiba mad ïa kine ki jingeh kiba sngewthuh haduh katno shisha ka ktah ia ki. Shisha kane ka khlam COVID 19 kam ithuh, niam ne jaitbynriew, duk ne riewspah, hynrei ka syllad lut naphang kat ïa kiba ka ïohlad bad kiba tlot ka bor iada kaba na lade. Khamtam lei kito kiba la heh ka rta ki la kylla long ki sohpdung jong kane ka khlam ha kiba bun ki bynta ki ri bapher bapher jong ka pyrthei. Mynta ki heh jong ka pyrthei ki ktha khlieh kumno ban shem ïa ki lad ki lynti ban pynkhiah bad ïada na kane ka jingpang kaba shyrkhei.
Wat la shisha ki riew paidbah kim lah ban shemphang lut ïa kiei kiei kiba jia ha kaba rieh kumba baroh ki ong ba ka pyrthei mynta ka ïaleh ïa ka thma jong u nongshun bymlah ban ïohi, hynrei ki riew niam bad ki prophet ki kren shibun kiei kiei ha kaba iadei bad kine ki jingjia ha kine ki sngi. Ha kaba ïadei bad ka jingsdang jong kane ka khlam ki bor pynïaid jong ka ri China ki kam ba ka dei ka jingpang ba saphriang na ki lymbit sha ki briew hynrei bun kim lah ban pdiang ïa kata. U President jong ka Ri America (USA) u pynpaw beit ba kane ka jingpang ka dei kaba la sdang hi na ka Laboratory jong ka ri China kaba ha Wuhan bad la don ruh katto katne ki TV Channel kiba kyrshan ia kane ka jingkynnoh.
Kawei na ki Youtube Channel jong u Sid Roth kaba la tip kum ka Supernatural ha ki katto katne ki jingiakren bad ki Prophets ki pynpaw ba ka don ka jingpynpaw ba kynja mynsiem sha ki ha ki jingphohsniew bad utei u khniang Covid 19 u dei uba la seng nongrim na katei ka Lab kaba ha China. Kito kiba ju buddien ia katei ka Channel ki sakhi ia kiba kum kitei ki jingiakren bad ki katto katne ki Prophet. Hynrei kam pher kumno utei u khniang jingpang ula sdang hynrei ka jingangnud jong kiba bun ka long ba kano kane ka khlam kan kut noh bad ba kin lah ban ioh pat ia ka jingim kaba iaid beit kumba ju long baroh shi katta.
Hynrei kumba la kdew haneng ka jingkylli ka ong ruh ba lada kine ki dei kita ki sngi jong ka jingtynjuh sa kiei pat ki jingjynjar bah kiban dang jia. Uwei na ki Prophet ka ri India u Sadhu Sundar Selvaraj u ong ba hadien jong kane ka Covid 19, kin dang don sa kiwei pat ki jingeh kiban kham shyrkhei shuh ban pynkhynñiuh ïa ki briew jong kane ka pyrthei. Kumta ngi sngewthuh ba kaei kaba ki briew ki donkam ka dei ka Jingsuk bad kata ka jingsuk kaba shisha ka long tang lada ngi kum ki briew ngin phai sha u Blei bad sdang ban wad ïa ka jingisynei jong u. Shisha ki sngi ban dang wan ki long ki bymthikna bad ngim tip sa kiei ki jingeh ki ban jia nangne shakhmat namar ba kaei kaba jia mynta ka dei ka bympat ju jia ba yn khangdam syndon ïa ka pyrthei hi baroh kawei!