Press "Enter" to skip to content

Shah jied u Rohit ban ïoh pdiang ïa ka Khel Ratna, u Ishant, Shikhar & Deepti ïa ka Arjuna

Mumbai, Jymmang 30: Ka Board of Control for Cricket in India (BCCI) ka la dep ban jied ïa saw ngut ki rangïalehkai kriket ka ri ba kin pdiang ïa ki khusnam ïalehkai jong ka ri. Kitei ki saw ngut ïa kaba ka BCCI ka la dep ban jied ki kynthup ïa u Rohit Sharma uba la shah jied ban pdiang ïa ka Rajiv Gandhi Khel Ratna Award 2020, katba ïa u Ishant Sharma, Shikhar Dhawan bad ka Deepti Sharma la jied na bynta ban pdiang ïa ka Arjuna Award.
Dang ha kine ki khyndiat sngi la paw ha ki tyllong ba ka Deepti ka lah ban shah jied ban khur ïa ka khusnam Arjuna na ka jinglah jong ka ban ïalehkia ha kine ki ar aïom ba lah dep.
Ka BCCI ha ka kyrwoh khubor ba ka la pyllait hynne ka sngi kala ong, “Ka tnat ïalehkai jong ka sorkar pdeng ka la btah ban jied ïa ki nongïalehkai ban pdiang ïa ki khusnam da kaba peit naduh ki jingïalehkai jong ka 1 tarik u Kyllalyngkot 2016 haduh ka 31 tarik u Nohprah 2019.”
U Rohit Sharma, vice-kapten ka kynhun ïalehkai ka ri u dei u rangïalehkai ba tbit bha ha ka jingkamai ron, ha kaba u la shah jied ruh ha ka ICC kum u ODI Cricketer of the Year 2019. U Rohit u la kylla long u rangïalehkai ba nyngkong tam ha ka history jong ka pyrthei ban khur haduh san tylli ki century tang ha ka jingïalehkai World Cup.
Udei ruh uba nyngkong ban khur saw tylli ki century ha ka T20I bad udei ruh uba nyngkong ban khur ar tylli ki spah ron ha ka jingïalehkai Test.
U Shikhar Dhawan u la bat ïa ka rekod kum u rangïalehkai ba stet tam ban kamai spah ron ha ka jingïalehkai Test bad udei ruh u rangtied ba la jop haduh arsien ïa ka golden bats ha ka ICC Champions Trophy. U dei ruh u rangtied ba stet ban kynjoh sha ka 2000 bad 3000 ron ha ODI bad ba ar napdeng ki nong India ban kamai stet ïa ka 4000 bad 5000 ron ha ka ODI.
U Ishant Sharma udei u rangïalehkai dang khie ba mih madan ha baroh lai tylli ki jingïalehkai kriket, u dei u rangkawang bol bad bat ruh ïa ka rekod ban khur bun tylli ki wicket shabar na ka dewbah Asia. Ka Deepti Sharma kaba dei ka top-class all-rounder, kadei kawei na ki thei ïalehkai ka ri India ban bat ïa ka rekod ha ka jingheh kamai ron ha ka WODI bad ruh ban shim 6 wicket ha ka WODI.
Na ka liang u Sourav Ganguly President ka BCCI u la ong, “Ngi da peit bniah bin pa bin bad pynshong nongrim ha baroh liang hashuwa ba ngin shim ïa ka rai ba khadduh ban jied ïa kitei ki saw ngut. U Rohit Sharma u la dei hok ban ïoh khur ïa ka Khel Ratna na ki jingtbit ïalehkai bad uba don ruh ka sap nongïalam.
“U Ishant Sharma udei u rangïalehkai ba la kham rangbah napdeng ki nongïalehkai ha ka Test bad noh synñiang shibun ïa ka kynhun kum u No. 1 ha ka jingïalehkai Test. Haba ki rangkawang bol ki don hapdeng ka jingmynsaw u Ishant u ju ïarap na bynta jong ki man ka por.
U Shikhar udei u rangïalehkai ba ju kynjoh beit sha khlieh ha ka jingkamai ron bad ka jinglah ban ïalehkai jong u ha ki lympung ïalehkai ka ICC ka la long kaba pynsah kynmaw. Ka Deepti kadei ka all-rounder kaba tbit bad ka jingnoh synñiang jong ka sha ka kynhun ka la long kaba khraw.”
U Jay Shah, Secretary ka BCCI u la ong “Kam don kawei pat ka burom kaba khraw lait na kaba mihkhmat ïa ka ri bad ka jingjied ban khur ïa ki khusnam kadei na ka jinglah bad trei shitom jong phi ha ki jingïalehkai. Ha kine ki san snem ba lah dep, u Rohit Sharma ym tang ba u la kiew tang ïalade shimet, hynrei u la ïalam ruh ïa ka India sha ki kyrdan ba shalor.
Hapoh ka jingïalam jong u kum u kapten ba shipor na ka jingbym don u Virat Kohli, ka India ka la jop ïa ka Asia Cup kaba la long ha UAE, ka Nidahas Trophy ha Sri Lanka bad jop ruh bunsien ïa ki jingïalehkai ha la ïing. U Rohit udei u breiw uba biang tam ha ka kynhun bad udei ruh u nongai buit ïa ki rangïalehkai dang khie. U dei hok ban ïoh ïa katei ka khusnam kaba khraw jong ka ri.