Press "Enter" to skip to content

Donkam ban bishar bniah shwa ban ïeng pyrshah

Ha kaba ïadei bad ka jingshimrai jongka sorkar ban shah ban wanrah ïa ki nongtrei bylla na shabar ka jylla kiba long tang ïa kito ki jait kam ba ki trai jylla jong ngi kim pat lah ban trei, ka donkam ïa ki seng bhalang bapher bapher ne ïa baroh ban ïa bishar bniah bha shwa ban ïeng pyrshah.
Balei ba ong kumne ka sorkar ka la dep pynshai lypa ba tang ïa kito ki nongbylla ne kita ki highly skilled labour kiba trei ïa ki kam kiba ki trai jylla jong ngi kim pat lah ban trei yn shah ban wallam da ki tnad sorkar, ki kompani ne ki kontraktor. Kane ka jingwan rah ruh dei ban ai certificate da kito ki tnad sorkar kata lada jia ba ka PHE lehse ka donkam ïa ki briew ki ban peit ïaki mashin ban pum um lada sniew, kan hap ban ai certificate sha ka Deputy Commissioner bad hadien ba la bishar bniah yn sa ai ïa ka permission ban wanrah ïa ki. Nalor kane lehse ki don ki kompani ba ki machine jong ki ki sniew, ne ki don ki kor ki bor jongka PWD kiba sniew kiba hap ban wanrah ïa ki briew na shabar ban shna ïa ki, kumta ki hap ban ai certificate ba kin ïoh ïa ka permission. Ym dei ba ka sorkar ka la shah ban wanrah ïa ki nongbylla sngi kat ïa kiba don hynrei tang ïa kito ki kam ba ki jong ngi kim pat lah ban trei ne shna. Hynrei wat la katta ruh la dep kren shai ba haba ki wan rung sha ka jylla ki hap ban bud pyrkhing ïa ki protocols ne ki jingbthah jongka sorkar jylla kata ba kin hap ban leit test bad leh shwa ïa ka jingset slung ne quarantine ba 14 sngi shwa ba kin ïoh ban leit sha la ki kam ki jam jongki. Namar ka sorkar ruh kam kwah satia ba ka jingwan kine ki briew kin pynpur ïa une u khniang jingpang ha kane ka jylla.
Ki seng bhalang ki dei ban sngewthuh ba ka sorkar ruh ka shim khia bha ban ïada na kane ka jingpang bad na kata ka daw kam pat shah ïa ka jingrung jingmih na kiwei ki jylla sha kane ka jylla Meghalaya. Kumta haba ïa kane ym pat shah kita ki nongbylla kin ym ïoh ban wan rung lait noh tang kito kiba la kdew haneng bad kitei ruh kim da bun ngut eh ki ban wan sha ka jylla.
Hooid ym lah ban len donkam ban peit ïa ka bha ka miat jong baroh ha ka jylla hynrei shwa ba ngin pynpaw kano kano ka jingpyrshah la donkam ban bishar bniah, tohkit bniah bha bin pa bin ym ban shu ïeng pyrshah kat ïa kaba don. Ka daw ba ka sorkar ka hap ban pyrkhat ban shah ba kito ki high skilled labour ba kin wan namar ba ki kam ki jam ki la sdang kum ki kam karkhana, ki kam shna surok , ka jingplie ïa ki show room ne ki jaka die kali bad kiwei kiwei ki jaitkam ruh. Kumta haba kine ki kam ki la sdang ki don ki kam ba ki briew jong ngi kim pat lah ban trei lut. Kum ka jingpyndait ïa ki machine ha kino kino ki jaka, lah ban ong ba ym pat don ki briew jong ngi kiba na kane ka jylla kiba la lah ban leh ïa kitei ki kam hynrei donkam ban wan ki briew na ki kompani ban leh ïa kiba kum kita ki kam. Nalor kata dang don sa kiwei kiwei ki kam kiba ym lah ban len ki briew jong ngi kim pat lah satia. Hynrei ïa kiwei kiwei ki kam ba ki briew jong ngi ki lah ban leh ne trei ka sorkar kam pat don jingthmu hi ban shah ba kita ki nongbylla kiba na bar ka jylla kin wan.
Ka sorkar haduh mynta ka bunkam ban ïakhun ïa kane ka thma khlam COVID-19 bad la tip shai ba kam kwah satia ban pynpur ne pynsaphriang ïa une u khniang jingpang ha kane ka jylla. Dei na kata ka daw ka ïai ïatrei lang bad ki bor synshar shnong ban peit bad teh lakam ban ym don kino kino ki briew kiba na bar ka jylla ki ban ïoh rung sha kane ka jylla Meghalaya.
Nalor kane wat ïa ki khun samla pule bad kiba trei sha kiwei ki jylla kiba dei ki briew la jong haba ki wan sha ka jylla ki hap ban leit beit sha ki Isolation ne Quarantine Centre ban pyndep ïa ki test bad dei tad hadien ba la dep ïa ka RT-PCR Test ba sa shah ba kin leit phai sha la ïing ne ki shnong ki thaw ban pyndep ïa ka quarantine ba 14 sngi. Ka daw ba ka sorkar ka leh haduh katne ka dei namar ba kam kwah ba kane ka jingpang kan sa phriang ha ka jylla. Kumta ban shu ong ba ka sorkar ka thmu ban wanrah ïaki nongbylla na shabar ka jylla kam mut ba ïa baroh ki jait kam hynrei tang ïa kito ki kam kiba ki jong ngi kim pat lah ban trei tang ïa kita kiba ka sorkar ka thmu ban wanrah ïa kita ki nongbylla ne kita ki highly skilled labour ha ka ktien phareng.