Press "Enter" to skip to content

Ka jingthmu ban wanrah biang ïa ki nongbylla bar jylla

Hadien ba ka sorkar India ka la nang pynkylluid ïa ka jingkhang dam na ki jingpyrkhing ban lait na ka jingsaphriang ka jingpang Coronavirus, ka sorkar Meghalaya ka la rai ban wanrah biang ïa ki nongbylla bar jylla ban trei ha ki kam kiba ki trai jylla kim pat lah ban trei. Kaei kaba ym shai na kane ka rai jong ka sorkar jylla ka long, la kine ki nongbylla kiban wanrah nabar jylla kidei kiba la ju don shane kiba la leit phai noh por ba ka don ka Lockdown ne kidei kiba dang wanrah thymmai?. Ha kiwei pat ki jylla jong ka ri India, la ïohi ba da ki lak ngut ki nongbylla kiba leit bylla sha kiwei pat ki jylla (Migrant) ki la leit phai noh sha la shnong, ha kaba ki la ïaid da ka kjat da ki bun bun sngi. Hynrei na Meghalaya ym shym la ïohi khubor eiei ban don ki nongbylla kiba leit phai noh sha la shnong. Katba u Myntri Rangbah Symbud dang shen pat u la ong ba ki don haduh kumba 13 hajar ngut ki nongbylla kiba la leit phai sha la shnong.
Ñiuma, ka sorkar ka la ong ba ki nongbylla bar jylla kiban phah wan kin long tang ha ki kam kiba eh ne ki kam kiba ki trai jylla kim pat lah ne kim pat nang ban trei. Khang ban lait na ka jingpyshah na kiba bun ki liang, ka sorkar kadei ban kham pynshai ha kiba kum kine ki jaitkam ne kiei ki jaitkam ba ki trai jylla kim pat pat nang ban trei ne pat lah trei. Ka daw ka long ba naduh ba la jia kane ka jingpang Coronavirus, ki shnong ki thaw ki la bun briew lypa da ki paid nongshongshnong kiba dei ki trai jylla, namar ha jylla ruh ka don ka jingwanphai noh sha la shnong. Ym tip haduh katno kine ki nongbylla kiba na shabar, ka sorkar ka thmu ban wanrah bad la ka donkam shisha ne em ban wanrah nongbylla kiba na shabar.
To lada don shisha kita ki kam kiba kiba don hangne kim lah ban trei ne kim nang ban trei, balei ka sorkar kam peit na kine ki hajar ngut ki trai jylla kiba wanphai pat sha la ka jong ka jylla, namar kiba bun napdeng jong ki, ki la leit ki training ne ki la leit trei ruh shabar jylla ha kiba bun ki jaitkam. Ha ka jingshisha kane kadei ka kabu ïa ka sorkar ba kan wad ïa ki sap ki talent jong ki samla trai jylla kiba la wanphai pat sha la ïing ba kin trei ha kita ki kam kiba ka sorkar ka ong ba ki trai jylla kim pat lah trei. Kan long ruh ka lad ban aikam aijam ïa ki ha la ka jong ka jylla, khnang ba kin nym donkam ban leit shuh shabar jylla, haba ki la ïoh ïa ka lad ka lynti ban trei ha la ka jong ka jylla.
Ha kajuh ka por kane kan plie ruh ïa ki khmat jong ka sorkar ba tang na ka bynta i kam Operator, I kam Technician balei ban da donkam ban wanrah nongbylla na shabar jylla? Haw to kane kam dei ka lad ka kabu ba ka sorkar kan plie noh ïa ki Institute kiban lah ban ai training ïa ki samla ka jylla ban trei ha kine ki kam, la ka long ha ki Government Sector, ki Public Sector ne ki Private Sector. Kane ka la die ban long ka kabu ïa ka sorkar ban tem ïa ki jingïakhih kiba na ka por sha ka por halor ka ishu nongbylla bar jylla., kaba hateng hateng ka la ktah ïa ka suk ka saiñ bad ka ïoh ka kot jong ka jylla. Kadei ruh ka lad ba ka sorkar kan pynkhuid ïa ki kam sniew(Crime) kiba borabor la ju lap katkum ka Report na ki Pulit ba ki nongbylla bar jylla ki ju leh ïa ki kam sniew ha kane ka jylla. Nangta kan ïada shibun ruh ïa ka jingshongkha khleh, kaba ka jylla ka ju mad ïa ki jingïatao kiba khluit, haba ka KHADC ka wanrah ïa ki aiñ kiba kum kine.
Ai ba ka sorkar kan lum jingkheiñ shuwa haduh katno jait ne katno tylli ki don kai kam kiba ki trai jylla kim pat lah ban trei. Hadien kata pynbna paidbah ïa kita ki kam, ïoh don kiba ki trai jylla ki la lah ban trei ne don napdeng kine kiba wan phai nabar jylla ki la lah ban trei. Kane kan ïarap shibun ban ïa kaba shu pynbna kyrkieh ban wanrah biang ïa ki nongbylla bar jylla ha kita ki kam, khamtam ha kaba kum kane ka por ba dang jur ka jingïakhunïa ka thma pyrshah ïa ka jingpang Coronavirus.