Press "Enter" to skip to content

Soi kontrak u Redeem Tlang ban ïalehkai na ka FC Goa mynta ka aïom

Panaji, Jylliew, 01: U rangïalehkai phutbol jong ka jylla Meghalaya u samla Redeem Tlang mynta ka lah sngi u Blei u la long u rangïalehkai ba nyngkong eh ban ïasoi kontrak bad ka FC Goa mynta ka bynta ka aiom ïalehkai ka ban sa wan.
Une rangïalehkai uba dei u nongshong shnong jong ka nongbah Shillong bad uba dang 25 snem ka rta u la mih ïalehkai nyngkong eh na ka kynhun Shillong Lajong bad u la ïoh mih madan ruh ha ka lymgpung ïalehkai I-League kaba la long ha u snem 2013.
Hadien u la ïohlad ban pynpaw pyrthei ha ki lympung ïalehkai baladep na ka Shillong Lajong, u Redeem Tlang u la leit pynïasoh bad ka Highlanders (NorthEast United FC) ha u snem 2018.
U Redeem Tlang uba dei u nongïalehkai Wing, u la mih madan ban ban ïakhun nyngkong eh na ka NorthEast United ha ka aiom ïalehkai jong u snem 2018/19.
Ha ka aiom ïalehkai ba ladep, la sakhi ba une nongïalehkai Wing u la ïoh ban thep haduh 3 tylli ki Kol ha ka lympung ïalehkai ISL kaba long kawei na ki lympung ïalehkai kaba shongshit bha ha India.