Press "Enter" to skip to content

Haba dang hap shaniah ha kiwei ban pynïaid ïa ki kam

La jan dap 50 snem ka jingioh jong ngi ïa la ka jong ka Jylla bad hapdeng ki jingïaid lynti lah ban ïohi ba ngi dang sahdien shibun eh ha ki jingtbit bad jingkotbor ban trei ïa ki kam ki jam bapher bapher khamtam ha ka liang ban kyntiew ïa ka roi ka par ha ka Jylla.
Hapdeng ka jingïaleh ban ïakhun pyrshah ïa ka jingpang COVID-19, ka Sorkar Jylla ka la rai ba kan hap phai khmat ruh sha ki kam ki jam ban kyntiew ïa ka ïoh ka kot bad kiwei kiwei pat ki kam ki jam ki ban pynim ïa ki paidbah nongshong.
Ym lah ban len ba ka jingkhang khyrdep (lockdown) ha ka jingïaid lynti ban ïada ïa ka jinglah ban saphriang ka jingpang COVID-19, ka ïoh ka kot ka la hiar shibun eh ha ki ar bnai tam bad ki longïing ki mad jingeh shibun eh naba kim ïoh ïa ka leit ka wan ka kamai kajih kaba thikna.
Kumta ka Sorkar ka la rai ki company shimet, ki company na ka Sorkar bad ki contractor ki lah ban wanlam ïa kita ki nongbylla ba tbit (highly skilled labourers) ha ki jait kam bapher kiba ki samla jong ngi kim pat don jingtbit ne jingkotbor ban trei.
Hangne ngi lah ban sngewthuh ba pleng ngi dang hap shaniah ha kiba nabar Jylla wat ha ki bynta jingtreikam khamtam ha ki kam Operator ne Technical. Ka la mih ka jingpyrshah na ki seng bhalang halor kane ka rai ban wanlam ïa ki nongbylla na shabar Jylla.
Ki seng bhalang ki pyrshah namar ka dang dei ha ka por ka jingïakhun ïa ka jingpang COVID-19 bad kumba ïohi ka Jylla jong ngi kan shah hiar thma ha ka jingpang COVID-19 tang da ka jingwan kiba na shabar.
Ka Sorkar ka dang don ha ka lynti kaba eh ha kaba ïa dei bad ka jingpynbit jingpynbiang ïa ka jingwan phai ki samla pule bad kiwei pat (kiba dei ba ka Jylla) kiba sahkut shabar Jylla na ka daw ka jingkhang khyrdep (lockdown).
Ka Sorkar ka la kdew shai ba ki nongbylla kiba wan na shabar Jylla ruh kin hap ïaid bad bud pyrkhing ïa ki kyndon ka tnad ka Koit ka Khiah kumba la pynap ïa ki samla pule bad kiwei (kiba dei na ka Jylla) kiba la wanphai na kylleng kylleng ka Ri India.
Hynrei ki seng bhalang ki la pynpaw ba kim lah ban shaniah ïa ka jingwanlam ïa ki nongbylla na shabar Jylla haduh katno kan long kaba shngaiñ ym tang kane ka por ïakhun pyrshah ïa ka COVID-19. Khamtam na ka por sha ka por ki seng bhalang ki ïai ïa khih pyrshah ban pyrkhing ïa ka jingwan rung ki bar jylla.
U Bah HS Shylla ryngkat ka kynhun jong u ki la pynpaw ba ka Sorkar Jylla ka shah jem eh ha kaba ïa dei bad ka jingdawa pyntreikam ïa ka Inner Line Permit (ILP) ïa kaba ka Sorkar Jylla ka la shim ba lada yn pyntreikam kan dei kata ka atiar ïada ïa ka jingwan rung kyrthlep ki mynder.
Hynrei haba pyrkhat ïa ka rai ka Sorkar Jylla ban shah ban wanlam ïa kita ki high skilled labourers ka pyni shai ba ka Jylla hi kam don kita ki briew ba tbit balade ban pynïaid ïa ki kam. Hap shaniah ha kiwei na ka bynta ka pliang ja jong ngi ruh??
Ka Sorkar ka dei ban peit mat nangne sha khmat da kaba ïaleh ban thaw ïa ki lad ki lynti ban pynshlur ïa ki khun samla trai Ri trai muluk ba kin nang bad tbit ha bun ki liang namar katkum ka jingiohi imat ha jan baroh ki jait kam dang hap shaniah hi ha ki nongbylla bad nongtrei bar jylla.
Kumta ka Sorkar ka dei ban don ka plan kumno ban lam lynti ïa ki samla ban kham kiew sha khmat ha ki bynta jingtreikam bapher bapher naduh ki kam Operator, Technician bad kiwei bad ba ka pisa yn ym wan bam jem ei da ki ba na shabar.
Ka Jaidbynriew ka dei ban sngewthuh ruh ba ka jingtbit nalade bad ka jingbym ñiew poh ha ki bynta jingtreikam kan dei ka ILP kaba kham khlaiñ ban ïada ïa ka jingwan rung kyrthlep ki mynder ha ka Jylla. Lada ym pat nang ban ai ka jingshakri ynnai pat kwah long kynrad.
Ka khaïi pateng ka dei kawei kaba kum ka Jaidbynriew ka dei ban teh lakam ha kaba da ma ngi hi ngi dei ban ym ailad ban kan poi sha kti kiba na shabar ka Jylla. Kumta ki samla kynthei shynrang kim dei eh ban shu hun ban long tang kum ki nongbylla kuli hapoh ka jingpynïaid kiba na shabar Jylla.
Kaba khatduh ym kaba kut, ki khun samla ki dei ban minot bad buh thong ba ki dei ban lah ban leh ïa ka kam kaba ki don jingangnud ban nym ailad palat ïa kiba na shabar namar ban shu kut tang ha ka khynra ïa ki nongbylla bar jylla kan nym ïarap eiei ruh lada ym don ka mon ban trei hi dalade.
Ka Sorkar kan hap peit bniah ba nangne sha khmat ki bynta jingtreikam kiba kumno ki khun samla ki donkam ban pyntbit la ka dei ha ki kam ban pynïaid ïa ki jingtei building, ki karkhana, ki company bad ka dei ban mang tyngka ban ai ka jinghikai ïa ki.