Press "Enter" to skip to content

Ïoh bat ka KSU bad FKJGP ïa ki bar jylla ba wan na Uttar Pradesh

Lap ba pynkheiñ aiñ khlem jingdakhmat bad kiwei ki lad ïada na ka khlam Coronavirus

Nongpoh, Jylliew 02: Ki ar tylli ki seng bhalang na Ri Bhoi ba kynthup ïa ka Khasi Students Union (KSU) bad ka Federation of Khasi Jaintia and Garo People (FKJGP), Umsning Circle hynnin ka miet ki la ioh ban bat kumba 16 ngut ki bar jylla kiba wan na Uttar Pradesh da kawei ka kali khlem kino kino ki lad jingïada bad nalor kata ruh ki la sangeh ha kawei ka Petrol Pump ba la tip kum ka Umran Fuel Pump kaba don ha ka Shnong Umran Dairy ba hap ha Umsning Police Outpost, Ri Bhoi District.
Kine ki bar jylla ba la kynnoh da kitei ki nongialam ki seng ba ki dei khar Muslim ki la wan da kawei ka Kali ba la tip kum ka Force Traveler kaba don ïa u number UP 11 – AT – 8425 naduh ka jylla Uttar Pradesh bad ki la kam ruh ba kin leit sha Silchar ba hap ha ka jylla Assam da kaba iaid lyngba na ka jylla Meghalaya khlem kano kano ka lad jingïada.
La ong ruh ba la bat ïa kine ki bar jylla ha ka por kumba 11:30 baje mynmiet hadien ba la lap ba ki la thmu ban sah ha katei ka kali ha katei ka Pump ba don ha Umran Dairy bad namar ba kim shym don kano kano ka lad jingïada na ka liang ki nongialam ka seng ki la pyntip noh sha ki Pulit ka Umsning Police Outpost ban leh ïa kaba donkam.
Haba kren sha ki Nongthoh Khubor, u President ka FKJGP Umsning Circle, u Bah Lessing Warkhar bad u General Secretary ka KSU, Umsning Circle, u Samla Lester Nongbet, ki la ong ba ka daw kaba kum ka seng ka hap ban bat ïa kitei ki bar jylla bad ban pyntip sha ki bor pulit ka dei halor ka nongrim nongrim ba kim shhym la bud ïa ki jingbtah ka sorkar ban shim ïa kita ki lad jingïada ban lait na ka jingsaphriang ka khlam Coronavirus.
Ki la ong ruh ba ki wan na kajuh ka Kali ha kaba ki la don haduh 16 ngut bad lyngba kane ka Kali ba ki wan la thikna ba kim shym la bud ïa ki kyndon ain ka sorkar ha kaba ki la shu ia shong khapngiah khlem ki jingdakhmat bad ruh khlem da pynjngai iwei ia iwei bad kaba sngewlyngngoh ïa ki nongialam seng nalor kata ki thmu ban sah ha katei ka Petrol pump bad ym lah ban tip la ki thmu ban leit sha Silchar ne sha kano kano ka jaka ha kaba kane ka la buh jingma ïa ki paidbah ka jylla nalor ba ki la wan na ka jylla ba shah ktah bha ka khlam coronavirus.
Ki la ïathuh ruh kine ki bar jylla ym tang ba kim shym la deng ki jingdakhmat ne ban don kita ki sabon sait kti ban iada na ka jingsaphriang ka khlam Coronavirus, hynrei kine ki bar jylla ki la mih bad iaid kai ruh sha madan da kaba thiah ha katei ka petrol pump khlem ki jingïada.
Kitei ki nongialam ka KSU bad ka FKJGP ki la ong ruh ba kum ki nongialam ka seng ki sngewlyngngoh hadien ba la pyntip sha ki Pulit ka Umsning da ka jingthmu ba kin tohkit bniah ïa kine ki bar jylla bad phewse hadien ba ki la poi ki la shu beh ïa kitei ki bar jylla khlem kano kano ka jingtohkit kaba bniah halor ka rung ka mih jong kine ki bar jylla kiba la thmu ban sahmiet ha kate ka Petrol Pump.
Na ka liang kine ki nongïalam ka KSU bad FKJGP ki pynpaw ka jingma kaba khraw halor kane ka jingioh rung laitluid kine ki bar jylla lyngba ka jylla Meghalaya, namar kane ka por ka dei ka por ba hap ban long adkar bad phewse wat la ki la shong khapngiah ha katei ka Kali ban pynkhein ia ki kyndon ka sorkar bad ki ioh pat ban rung suk lyngba kane ka jylla kaba la buh jingma ïa ki paidbah ka jylla Meghalaya.
Na ka liang ki nongïalam ba rangbah kine ki ar seng na Ri Bhoi District, ba kynthup ïa u Bah Lui Star Lyngdoh, Secretary ka FKJGP, North Khasi Hills District bad u Samla Ferdynald Kharkamni, President ka KSU, North Khasi Hills District Unit, ki la ong ba kane ka jingioh laitluid kitei ki bar jylla ban rung sha ka jylla ka la buh jingma ïa ki paidbah ka jylla bad khamtam kine ki bar jylla ki wan naduh ka jylla Uttar Pradesh kaba dei kawei na ka jylla ba la shah ktah ha ka khlam Corona virus.
Ki la ong ruh kum ki nongialam seng ki buh jingkylli ruh kumno kine ki bar jylla ki la shu ioh rung suk sha ka jylla khlem kano kano ka jingtohkit bniah ha Byrnihat bad nalor kata kine ki bar jylla ki wan tang na ka Kali kaba rit ha kaba ki la shong khapngiah khlem da tohkit bniah shuwa ba kin rung sha kane ka jylla.
Ki la ong ruh kumba la pynshai da ka tnad Pulit na ka liang kine ki ar seng ki la ong ba ka long ka bym shisha ba la kynnoh ba ki thmu ban wan tang ban theh umphniang, hynrei ka jingthmu hi kine ki bar jylla ka long ban sah ha katei ka jaka khlem da tip da ki bor ka District administration ha kaba kane ka buh jingma na ka jingpur sted ka khlam Corona virus khamtam ba ki wan na ki jylla ba la shah ktah bha ha kane ka khlam.
Shuh shuh, na ka liang u Samla Ferdynald Kharkamni, u la ban khia ruh ba ka seng KSU bad ka FKJGP ruh haduh mynta ki dang ieng ha ka nongrim ba ka sorkar ka dei ban pyntreikam noh ïa ka MRSS Acts, 2016 bad kumjuh ruh ban buh da ki Entry bad ki Exit Point kumba la dawa da kine ki seng bad la jin ba kine ki jingdawa ki treikam ka long ka jingsngain ha kum kane ka por ruh na ka bynta ki paidbah ka jylla ba la don ka jingtohkit bniah shuwa ba ki briew kiba nabar kin rung sha kane ka jylla, u la bynrap.