Press "Enter" to skip to content

Pyllait noh ka Hyderabad FC ïa u Kamaljit Singh bad Robin Singh

Hyderabad, Jymmang 02: Ka Hyderabad FC ka la pyllait noh ïa u rangap kol jong ka u Kamaljit Singh, Robin Singh (forward) bad ïa u Gurtej Singh (defender). Kiwei pat ki rangïalehkai ïa kaba ka Hyderabad FC ka la pyllait noh bad khlem pynjlan shuh ïa ka kontrak ki kynthup ïa u Abhash Thapa, Keenan Almeida, Rohit Kumar, Shankar Sampingiraj, Kunzang Bhutia, Ajay Chhetri bad u Faheem Ali.
Ha ka jingshisha, u Kamaljit bad u Gurtej ki la mih madan ïa Hyderabad FC naduh kaba sdang eh jong ka lympung ïalehkai Indian Super League (ISL).
U Kamaljit Singh ha kane ka aïom ïalehkai ba lah dep u la mih madan tang 12 sien bad khlem lah ruh ban ïalehkai bha ha kaba u tei u rangap kol ba dang 23 snem karta u la shah thep 26 kol ha baroh kitei ki jingïakhun. Kan long ka jingduh kaba khraw ïa ki rangïalehkai shadien ka Hyderabad, hynrei ïa mynta hi ki bor pynïaid ki la kren shai ban pynkhlaiñ ïa ka kynhun da kaba wanrah da kiwei pat ki rangïalehkai na ka bynta ban pynkhreh ïa ka aïom ïalehkai ban wan.
U Gurtej Singh u la mih madan ïa ka FC Pune FC haduh ar samoi ïa ka FC Pune City (2017-19). Hadien ba ki bor pynïaid ki la pynkylla noh sha ka Hyderabad, utei u rangïaleh kai u dang don bynta ban la ka kynhun ha kaba u la mih madan haduh 24 sien ha baroh lai tylli ki aïom ïalehkai kiba lah dep bad u la ïarap shibun ïa ka Hyderabad FC ha ka jingïalehkai ba shadien.
U Keenan Almeida ula leit pynïasoh da ka ram na ka Hyderabad FC sha ka Mumbai City FC haduh ba kut jong ka aïom ïalehkai 2019-20 (kaba dang shu kut shen) ha ka ïew ïadie ïathied rangïalehkai kaba la long ha u bnai Kyllalyngkot. Hynrei katei ka klob mynta ka la pyllait noh syndon.
Kiwei pat ki rangïalehkai kiba mih noh na katei ka klob ki long u Rohit Kumar (midfielder). Utei u rang ïalehkai ba dang 23 snem karta u la mih madan khyndai sien ïa ka Hyderabad FC ha kane ka aïom ïalehkai ba dang shu dep. Ha kitei ki jingïalehkai u la ïoh ban thep kol bad ïarap ai thep kol.
U Shankar Sampingiraj, u mih madan laisien ha katei ka lympung ba dang shu dep, u Kunzang Bhutia ruh udei uwei na kiba ka Hyderabad FC ka la khreh ban pyllait noh.
U Robin Singh uba dei ruh u rangïalehkai barim ka ri India, u la ïoh ban mih madan tang khyndai sien hapoh ka jingïalam u Brown ha kane ka aïom ba lah dep, hashuwa ba un leit ïalehkai da ka ram ïa ka Real Kashmir ha ka lympung I-League, bad ha na katei ka klob u la mih madah hynñiew sien. Ïa u Ajay Chhetri (midfielder) uba dei ruh u rangïalehkai ba dang 20 snem karta ka Bengaluru FC la pyllait noh hadien ba la pyndep ïa ka ram, bud sa u Faheem Ali.
Ka Hyderabad FC ka khmih lynti ban poi sha ka thong ha kane ka aïom ïalehkai ban wan hapoh ka jingïalam u Albert Roca kum u coach. Ha kane ka aïom ïalehkai ba dang shu dep ka Hyderabad FC hapoh ka jingïalam u Phil Brown kum u coah ka khlem lah ban ïalehkai bha bad don ha ka kyrdan ba shatrai duh na ka miej ïakheiñ poiñ da kaba khur tang 10 poiñ na ki 18 sien ïakhun.