Press "Enter" to skip to content

Sa 2 ngut ki samla pule na Garo ba wanphai na UP ki ïoh Corona

“Sngewbha sumar da lade ïalade ba kan ym pur sha ki paidbah” : Hek

Shillong, Jylliew 2 : Sa arngut ki samla pule kiba dei ki shynrang na West Garo Hills District kiba dang wan phai ha kine ki khyndiat sngi na Utter Pradesh ki la ïoh ïa ka jingpang khlam Coronavirus namar ka result jongka test jongki kaba la ïoh mynta ka janmiet ka long positive. Tangba kim lei lei, ki shait ki khlaiñ bad baroh arngut ki don ha ka Corona Care Centre ha Chibinang, ïathuh u myntri ka tnad ka koit ka khiah u bah A.L Hek.
U la ïathuh ruh kat haduh mynta ka sngi ki nongmuna ne sample ba la phah test ki long 9242, ka result kaba la ïoh negative ka long 8651, ka result ba long positive 30, iwei ba la khlad, 12 kiba la koit bad 17 ngut kiba dang long Active ne une u khniang jingpang u dang don ha ka met jongki bad ka result kaba dang ap ka long 563 tylli.
U bah Hek u la ïathuh ruh ba kat haduh mynta ka sngi ki khun samla shynrang bad kynthei kiba pule bad trei shabar ka jylla kiba la wan phai sha ka jylla ki long 12257 ngut.
U bah Hek u la ong “ Kumba long kat haduh mynta hi ki paidbah kim dei ban tieng ban smiej namar kine kiba ïoh ïa une u khniang jingpang ki dei beit kiba la shimti da ka sorkar naduh ba ki poi ha Guwahati la ka dei da ka rel ne da ka liangsuiñ ruh bad na katei ka jaka la ïalam beit ïa ki sha ki jaka ba la pynkhreh kyrpang da ka sorkar ban pynsah ïa ki katba ym pat dep ka RT-PCR Test. Kumta kam don ka jingtieng ba kan ïabit sha ki riew paidbah. Hynrei ha kajuh pat ka por nga da kyntu jur ïa ki paidbah ba kin sngewbha ban sumar da lade ïa lade ban lait na une u khniang jingpang ba un ym pur sha ki paidbah da kaba bud pyrkhing ïa ki jingbthah jong ka tnad ka koit ka khiah, kata ban deng ïa ki mask haba mih sha surok, ban ym biah kulmar, ban ïa ïeng pajih ha ïew ne ha jingtrei ne ki ophis, ban sait khuid ïa ki kti bad kiwei kiwei ki jingbthah”
“ Nga ïai banjur ïa kane namar nga ïohi ba ki paidbah ka la ïa kheiñ sting palat haduh katta katta wat haba ki mih sha surok ruh ki don ki bym deng ïa ka mask. Kam mut ba ngi la lait na une u khniang namar kumba long mynta ha ka ri India ka dang kiew bha, kumta kaba kongsan ka long ba ngin sumar da lade ïa lade ban lait na une u khniang jingpang” pynkut u bah Hek.