Press "Enter" to skip to content

Pyrshah ka HYC ban plie ïa ka khaïi pateng bar ri ha khappud Bangladesh

Jowai, Jylliew 05: Ka Hynniewtrep Youth’s Council (HYC) War Jaiñtia Circle ka pynpaw ka jingpyrshah jur, halor ka rai jong ka sorkar jylla ban plie ïa ka khaïi ka pateng shabar Ri ne ka International Import and Export, namar kane ka lah ban buh jingma shi katdei ïaka thaiñ bad ïaka jylla baroh kawei.
Halor kane ka la khreh ban ïeng ïakhun pyrshah ïaka sorkar jylla lada kam suidniew ïa ka sur u paidbah, halor kane ka nongrim la dawa jur naka sorkar jylla ba kam pat dei ban kyrkieh ban plie ïa ka ‘International Import and export’ naba kan buh jingeh ïa ki paidbah ka War Jaiñtia kiba don ha khappud bad ka Bangladesh.
U President ka seng u samla Yoodahunki Shylla u ong “ngi ïohi ba ka sorkar jylla ka pyrkhing ïa u paidbah da kaba ka bthah ïa u paidbah ban kohnguh ïaki kyndon ba ym dei ban mih kulmar hynrei ngi dap daka jingsngew lyngngoh, kumno pat ka sorkar jylla ka nud ban plie ïaka International import and export? Lada jia ba u Corona Virus u wan poi ha War Jaiñtia hato ka sorkar jylla ka lah mo ban bahkhlieh ïa ki paidbah ka thaiñ? La ïathuh ka seng.
Katba na ka liang u Publicity Secretary samla Riki Mukhim u pynrem jur ïa ka sorkar MDA halor ka jingleh thamula jong ka wat hapdeng kat kane ka saw ka sian ba ka pyrthei baroh kawei ki mad ïaka nemsniew. Ula ong ruh ka sorkar ka dei ban pyrkhat arsien hashwa ban leh ïa kano kano ka kam ym ban leh kai ïa ka ïap ka im u paidbah lym kumta kam don jingmut ban ong ka ri shynshar paidbah katba ïaka sur u paidbah pat ym don ba patiaw ne suidñiew satia.
U Asst. Secretary u samla Ededisuk Shylla ula kynthoh da kaba ong myntoi aiu ïa ka sorkar ba kan wanrah ïa ki Home Guard ne Pulit, katba ïa ka jingkhang bah kan plie rynghang.
Halor kane lada ka sorkar jylla kam sngap ïa ka jingdawa ka seng kan pynlong da ka jingïakhih kaba tyngeh khnang ban lah ban ïada na ka jingma kaba ap ïaka thaiñ bad ïaka jaidbynriew.