Press "Enter" to skip to content

Snohktilang ki coach ka West Bengal ban ai jingïarap ïa ki lanot eriong ‘Amphan’

New Delhi, Jylliew 05: Hadien ki nongïalehkai, mynta sa ki coach jong ka West Bengal kiba don kumba 70 ngut ki la wan shakhmat ban ïasnohktilang ha kaban ai jingïarap ïa kito ki lanot kiba la shah ktah na ka jingkhyrwit ka eriong Amphan hapoh katei ka jylla.
Katei ka kynhun jong ki coach ka la thaw da ka ‘Coaches Who Care’ ban ai ka kti kamon ka kti kadiang ban ïarap lem na ka bynta kitei ki lanot. Kitei ki coach ki kynthup ïa u Sanjoy Sen, Gautam Ghosh, Sankarlal Chakrabarty, Tanumoy Basu, Basudeb Mondal, Manish Mathani, bad shibun kiwei pat ki la ïasnohktilang ban ïarap ïa kito kiba donkam ka jingïarap ha kiba kum kine ki por ba ki ïakynduh jingeh.
“Ban long coach, nga sngewsarong ban ïoh ka lad ban im shuwa kum u rangïalehkai,” ong u coach barim ka kynhun ïalehkai U-16 ka ri u Gautam Ghosh.
“Ka thong ba hakhmat jong ngi ka long na ka bynta baroh ki nongïalehkai kiba donkam ïa ka jingïarap jong ngi. Ki don shibun ki nongïalehkai na kine ki jaka ba la shah ktah, kaba la pynlong ïa ngi ba ngi la donkam ban ai jingïarap na bynta jong ki. Ka mynsiem jong ngi ka pang haba ngi ïoh sngew ba shibun ki briew ki la khlad noh na ka jingshah thngan na ka daw ka jingbym biang ka bam ka dih ka kito ki jaka,” ong shuh u Ghosh.
Na ka liang u Tanumoy Basu coach barim ha ka liang ki nong ap kol ka Pailan Arrows u la pynpaw ka jingsngewkmen ba kiba bun ki coach kiba la shim bynta ha ka jingïalang online, ki la shim ïa kaba kum katei ka sienjam.
“Ngi la ïapynbeit ban pynlong da ka jingïalang na bynta ki coach jong ka West Bengal. Bad nalor kiwei ki mat, ngi la ïakren ruh kumno ban ai ki jingïarap ïa kito ki nongïalehkai kiba shong ba sah ha kitei ki jaka kum ha Sunderbans, Kakdeep bad ha Midnapore. La rai ruh ban pynmih pisa ban ïoh ai jingïarap na bynta jong k,” ong u Basu.
U Sanjoy Sen, uba la jop ïa ka Hero I-League ryngkat bad ka Mohun Bagan ha ka samoi ïalehkai 2014-15, bad uba dei ruh mynta u khliehduh ha ka Youth Development jong ka lahduh ka Hero ISL ka ATK, u la kyntu ïa ki paidbah nongkyrshan ban wan shakhmat bad ban ïarap noh synñiang lem na ka bynta kito ki briew kiba kynduh jingeh.
“Ka Football, bad da shisha, ka imlang sahlang ka la ai mynsiem ïa ngi ha kine ki sngi ba lah leit noh, bad kane kadei ka por ïa ngi ba ngin siew kylliang. Ka eriong Amphan ka la pynjulor ïa ka jylla jong ngi, khamtam eh ha ki jaka nongkyndong,” u la ïathuh.
U la ong ruh, “Kane ka dei ka por ba ngin ïeng tylli lang kawei bad ïarap iwei ïa iwei pat. Nga kyntu ïa phi ban wan shakhmat ban ïa tynrong lem ïa ka khia ka shon bad ïarap ïa baroh kat kaba phi lah ei.”
U Basudeb Mondal u la pyntip ba katto katne ki coach kin sa leit sha kito ki jaka ba la shah ktah ha kine ki taïew ban ban wan bad ai ruh ki jingïarap.
“Nga la ïoh sngew ba ki don shibun ki briew ha kito ki jaka kim ïoh tang u khaw ban shet ha ïing. Kim ïoh ruh ka um kaba biang ban dih, namar ka tyllong um kaba ki ju pyndonkam ha kitei ki jaka la tuid tang da ka um mluh. Shisha ki donkam ka jingïarap jong ngi, bad katto katne na ngi ngin sa leit da lade sha kito ki shnong ryngkat ki jingai jingïarap,” ong u Mondal.