Press "Enter" to skip to content

Ïalam u Bah PN Syiem ïa ki nongïalam shnong ban ïa kren ïa ka sohsat shlei um ha Pynthorumkhrah

Shillong, Jylliew 29: Ka kynhun ki nongïalam shnong na Pynthorumkhrah ha ka jingïalam u Bah Pynshngaiñ N Syiem, MDC ka Mawkhar-Pynthorumkhrah Constituency ka la leit ban ïa kynduh ïa u Myntri Sorkar Jylla ba dei peit ïa ka tnad Water Resources, u Bah H Brolding Nongsiej ban ïa kren halor ka jingeh kaba mih na ka jingshlei um kaba na ka por sha ka por ha ka thaiñ.
Ha ba kren ha ki lad pathai khubor hadien ka jingwan ïa kynduh ïa u Myntri Sorkar, u Bah Pynshngaiñ N Syiem u la ong ba ka jingjur slap ym tang ha ka por lyiur hynrei wat u slap ba malu mala ha ka por tlang lada neh tang 15-20 minit ka wanrah ka jingshlei um ha ka thaiñ Pynthorumkhrah.
“Ki jaka kiba shah ktah ki dei ka Langkyrding, Nongmynsong, Pynthor bad bunsien ka jingshlei um ka ktah ïa ki jaka rep ha Langkyrding bad Pynthor”, u la ong bad bynrap, “Ki nongshong shnong teng teng ki hap phet na ing ynda la shiteng synñia lada jia ba slap namar kan don beit ka jingshlei um. Ka long ka jingma kaba khraw na ka bynta ki nongshong shnong”.
“Kaba ima ka long na ka jingkhim ki nala bad jingkhlaiñ bor ka jingshlei ka lah ban ktah ïa ki khynnah bad poi sha ka jingmynsaw”, u la ong.
“Na ka liang jong ngi , ngi la pynpaw ha u Myntri ba ka don ka skhim ba la wanrah da ka Sorkar na ka Ministry of Water Resources kaba la tip kum Pynthorumkhrah Flood Control Protection Project. Ki kyndon na ka Ministry ki donkam ka jaka kaba heh bad yn ym lah ban bud bniah ïa ki kyndon bad ïa mynta ki dang iit bniah ban pyntreikam ïa ka”.
” U Myntri la ong ba ka don ka River Rejuvenation Committee kumba la pruid kyndon da ka National Green Tribunal ba la thaw kyrpang na ka bynta ka Wah Umkhrah bad Wah Umshyrpi. Kane ka Committee kla kynthup ïa ki tnad bapher bapher kum PHE, MUDA, Forest bad kiwei”, u la ong .
U la ïathuh ba ki la ai jingmut ïa u Myntri ban khot ïa ka jingïalang ka River Rejuvenation Committree khnang ba ki tnad kin ai ka jingïamir jingmut bad trei bha ha kane ka bynta ban ïada ïa ka jingshlei um
“Lada ngi ïa kren ïa kane ka kam kum kaba kongsan ha nongbah Shillong, nga tharai ba ka Wah Umkhrah ka dei kaba ha khmat bad donkam ban ïatai sani bha. Dei ban khot ïa ka Committee bad pan jingmut na baroh ki tnad bad pynïaid sha khmat ïa ka skhim na ka Ministry of Water Resources ban ïada ïa kane ka jingshlei um”, u la ong.
Haba kylli, u la ong. “Ka jingdonkam kyrkieh jong ngi ka long ba ki don ki nala ba rit ngi donkam ban pynheh ïa ki, don ki jaka ba donkam culvert hap ai noh da ka jingkieng. Ki jingtwa khyndew ka tnad ka la dei ban leh ïa kaba donkam”.
U la ong ba u Myntri hi u la kular ban khot ïa ka jingïalang ka Commitee khang ba kiwei kiwei ki tnad kin ioh ban ïa phylliew jingmut. “Ka jingkhap ngiah ki iing bad ka jingkhapngiah ki nala ki dei ki daw kiba ha khmat jong ka jingshlei um”, u la ong.