Press "Enter" to skip to content

Kum ki tit mih ki karkhana Coke ha Shallang matlah ka sorkar bad liang pyrshah

Shillong, Jylliew 29 : Wat la ki karkhana Coke beaiñ ki mih kum ki tit ha ki thaiñ Shallang, West Khasi Hills hynrei ki bor synshar ka sorkar ki leh matlah namar kim shym la shim khia ban weng ne khang ïaki.
La ïathuh ba ym duna ïa ka 25 tylli kine ki karkhana Coke ki mih ha katei ka thaiñ bad kaba ma ka long ba ki don beit ha ki marjan shnong jong ki briew bad ym tip kaei ka banjia ïa ka koit ka khiah ki paid nong shong shnong na ka tdem kaba mih na kitei ki kharkhana Coke miet la bad sngi.
Ki trai shnong bapli kim nud ban pyrshah namar ki sheptieng ïoh ka jingiap ne shah thombor ka wan ha ki namar ïa kine ki kharkhana Coke la ïadon kti lang da ki briew kiba don ha ka bor.
“ Ym shym la don ba peit ba jngoh ïa kane ka jingtei ïa kine ki karkana Coke kaba la sdang ban wanrah ka jingkylla ka jinglong jingman ka mariang ha Shallang namar mynta u snem ka jingshit ha kane ka jaka kala nang jur nangjur. Ngim pat ju mad ïa kum kane ka jingshit ha Shallang hynrei mynta ka la kylla jur bha ha kaba ym nud shwa wat tang ban ïaid kai pyngngad mynmiet ne mynstep ruh” ong u trai shnong bym kwah ban pynpaw kyrteng.
Ki trai shnong ki la pynpaw ba ka jingkylla jongka suiñ bneng ka la sdang mynta ha ki thaiñ Shallang bad khlem pep kan nang sniew shuh shuh nangne shakhmat.
Kine ki karkhana Coke ki jyllei ha kapor ba ka jingkhang tih dewiong ka dang bteng ha ka jylla da ka hukum ka NGT bad ka ïing bishar Supreme Court. Hato kane kam long pyrshah ïa kitei ki hukum jong kitei ki ïing bishar namar da u juh u dewiong la pyndonkam ha kitei ki karkhana bad kane kam mut ba ka jingtih dewiong beaiñ ka jur bha ha katei ka thaiñ?
“ Ngim sngewthuh aiu kane ka sorkar ka mut kumne. Hato kane kam long ka jingpynkheiñ aiñ ban ailad ïaki heh saipan ban leh ïa kane ka kam? Hato kine ki karkhana kim pyndonkam da u dewiong? Nangno une u dewiong u wan? kylli uwei u nongtrei mon sngewbha na Rongjeng u J.M Sangma.
La pynpaw ruh ba lada une u dewiong uba la pyndonkam u dei na uto uba la dep lum jingkheiñ da ka sorkar ban lilam, ka jingkylli pat ka long mano, mynno bad naei la ïoh jingbit ban pyndonkam da une u dewiong?
Nalor kata la kylli ruh mano ba aibor ne ai jingbit ban seng ïa kine ki karkhna shna Coke ha ki jaka sah jong ki briew. Hato kine ki trai karkhana ki la ïoh jingbit ban seng ïa kat kine ki karkhana ha ki jaka sah briew. Nalor kata kine ki karkhana beaiñ kim ai jingmyntoi ne khajna ïa ka sorkar jylla hynrei ki shu wan ai tang ka jingpynjot bad pynjulor ïa ka mariang, ong u CG Momin sa uwei u nongtrei mon sngewbha na Rongjeng.
La ïathuh ban pynmih shi ton u Coke donkam haduh 4-5 ton u dewiong. Ki trok kiba kit ïa une u Coke ha ka shisngi kim duna ïa ka 30 haduh 40 tylli bad kawei kawei ka kit ym duna ïa ka 25 ton kaba mut ba ha ka shisngi ka jingdonkam dewiong ha kitei ki karkhana kam duna ïaka 4000 ton. Lada kheiñ ha ka dor khajna Royalty ba mynta ka sorkar ka duhnong ym duna ïa ka 40 lak tyngka ha ka shisngi shisngi.
Hynrei wat la ka sorkar ka tip shai shaphang ka jingdon kine ki karkhana Coke beaiñ ka leh matlah bad leh bym salia bad la suba ba ka dei ka jingiadon kti hi jong ki heh sorkar ba kane ka kam beaiñ ka ïaid beit man ka sngi khlem don ba wan khang ïa ki.