Press "Enter" to skip to content

Kyrpad ka Sorkar jylla ïa ka MHA ban pynsangeh jingpynkynriah kam ïa ki shipai

Shillong, Jylliew 29: Ka Sorkar Meghalaya United Alliance (MDA) hynne ka sngi nyngkong, kala bthah ïa u Chief Secretary ka Jylla ban phah jingthoh marmar sha ka Ministry of Home Affairs (MHA) ka Sorkar India, ba kan pyn sangeh shuwa ïa ka jingpynkyn riah kam ne jingtyrwa pyn kynriah kam ïa ki shipai ha Meghalaya katba ka jingïakhun ïa ka COVID-19 ka dang bteng.
Ka Sorkar Jylla kala pynmih ïa kane ka jingbthah hadien ka jingiabit jingpang COVID-19 ki lai ngut ki bor shipai kynthup ïa arngut ki shipai Border Security Force (BSF) bad uwei u shipai Assam Rifle kiba dang shu wan phai na ka shuti sha Jylla Meghalaya.
“Ka Sorkar Jylla kala rai ban kyrpad ïa ka Sorkar India lyngba ka MHA ba kan pynsangeh shuwa ïa kino kino ki jing tyrwa pyn kynriah kam ne ka rai pynkynriah kam ïa ki shipai ha Meghalaya katba ka jinglong jingman ha Jylla kam pat ilong satia” ong u Bah Prestone Tynsong, Symbud Myntri Rangbah ka Jylla haba ïakren bad ki lad pathai khubor hynne ka sngi.
Kat kum ka jingïathuh jong u, kane ka rai jong ka Sorkar kala mih na ka jingïalang shong bishar kam halor ka jing iabit jingpang COVID-19 jong ki shipai kiba dang shu wan phai sha Jylla na ka jingleit shuti.
“Ngi la bthah ïa u Chief Secretary ban thoh shithi noh mardor sha u Secretary ka MHA ban pynsangeh ïa ki rai ne jingtyrwa pynkynriah kam” ong u Bah Prestone.
Halor ka jingkylli u Bah Prestone ula ong ba ka rai jong ka Sorkar ban phah pynsangeh ïa ka jingpynkynriah kam kan treikam ruh wat ïa ki Bank, ki kompani ne ki Ophis jong ka Sorkar Pdeng kiba don ha Jylla.
U Symbud Myntri Rangbah u pyntip ba ha ki jingïalang bala long teng bad ki bor shipai, ka Sorkar kala dep bthah ïa ki bor shipai ba ka dei ban hukum ïa kino kino ki shipai ba wan phai na ka shuti ne ba shah pynkynriah kam, ba ki dei ban shong set slung kat kum ki kyndon bad ban pyndep lut ïa baroh ki jingdonkam.
Haba kylli halor ka jingdon jong ki briew ba ïakynduh markhmat bad ïakynduh pateng ïa ki arngut ki shipai BSF ba dang pynthikna pang COVID-19 hynnin ka sngi U Blei, u Director ka Health Services (MI) Dr A War ula pyntip ba ki shipai BSF bad ka District Survellance Unit ki dang wad ïa ki briew ba ïakynduh ïa kine ki shipai BSF.
U Symbud Myntri Rangbah ula pyntip ba ka jingma jong ka jingsaphriang ka khlam ka duna bha na kine ki shipai namar ka jingïakynduh briew jong ki ka duna bha.
Ha kajuh ka por, u Myntri ka tnad ka koit ka khiah ka Jylla Bah A.L.Hek ula pyntip ba ka jingdon jong ki nong pang COVID-19 haduh hynne ka sngi ka long 50 ngut bad napdeng kine, 42 ngut kila ïoh ïa ka jingkoit bad satang 7 ngut kiba dang pang. Napdeng kine kiba dang pang, 4 ngut ki dei na East Khasi Hills, 2 ngut na South West Garo Hills bad uwei na Ri-Bhoi District.
U Bah Hek u pyntip ba ka Sorkar kala phah test haduh 19287 ngut haduh hynne ka sngi bad na kine, 18657 ngut la Test Negative katba 518 ngut dang ap ïa ka kaiphod leh test. U pyntip ba ki briew bala wan phai na shabar ka Jylla ki long haduh 18823 ngut haduh hynne ka sngi.