Press "Enter" to skip to content

Lah ban kiew ka jingpep skul shiteng por ha nongkyndong namar ka khang dam

Nongstoiñ, Jylliew 29: La lai bnai tam naduh ba ka jingkhang dam (Lock down) ka la treikam ha kane ka jylla ha kaba la khang khyrdep ïa ki ïew ki hat, ki karkhana, ki shnong ki thaw, ki jaka mane Blei bad ki jaka pule baroh naduh ki Lower, Upper Primary, Secondary Higher Secondary, ki College bad ki University, na ka bynta ban ïada na ka jingsaphriang jong u khñiang jingpang coronavirus kaba dang bteng haduh mynta.
Hapdeng ka khang dam, ka sorkar ka la shimkhia da kaba bthah ïa baroh ki nonghikai ba kin bteng ïa ka jinghikai lyngba ka online ha kaba ki nonghikai ruh ki la trei shitom ban hikai ïa ki khynnah bad ban pyndep ïa ki course katba ki lah ei.
Ym lah ban len ba napdeng ki khynnah skul, dei tang kito ki khynnah kiba sah ha ki jaka ba la kham long sor bad kiba trei shitom ha ryngkat ka jingïarap jong ki kmie ki kpa, ki hynmen kiba la kham san. Nalorkata, ki khynnah kiba lah ban khreh bha ïa ki course ki dei tang kito ki khynnah kiba naduh klass VII shaneng, hynrei ki khynnah kiba dang don ha ki Lower Primary te wat ki kmie ki kpa ki shem jingeh haduh katta katta ban pynbiang kumba long ha ki por ba long skul.
Ha ka jinglum jingtip jong u nongthoh khubor na kylleng ki shnong ha West Khasi Hills District, la lap ba naduh ba ka khang dam ka la sdang, ki khynnah skul kiba dang pule ha ki Upper Primary ha ki nongkyndong, kim ju sngewtynnad shuh ban pule kot namar ki la myllen ha ka leit trei ha kper ha phrah, ha lyngkha ha risai bad wat la ki don katto katne ngut kiba angnud ban khreh kot kim snmgewtynnad satia namar ban shu khreh hi kim sngew lah.
Kawei pat ka jingeh kaba ki ïakynduh ka long na ka jingbym don network, namar watla ki don kiba don ïa ki mobile phone, ki Tablet bad ki Laptop ruh, hynrei bym don network kim lah leh ei ei. Kaba kham isynei ka dei ïa ki khynnah kiba dang don ha ki Lower Primary khamtam kiba dang pule klass I haduh klass III, namar kim pat nang ban leh ei ei khamtam eh ki khynnah ha ki nongkyndong.
Ki kmie ki kpa ruh kim ïohlad shuh ban leit trei bylla sha kiwei pat ki jaka, namar ka jingjynjar ha ka leit ka wan ki hap ban trei shitom ha ki hali ki pynthor bad ha ki lyngkha la jong naduh dang step haduh ban da miet. Ia ki khunlung kiba dang rit la iehnoh ha ïing bad kiba la kham heh kiba dang ha ka karta 10 haduh 12 snem. La lap ruh ba kitei ki khynnah baroh shi sngi ki shu muja ban ïalehkai da kaba bah ruh ïa ki para ba dang rit.
Haba ïakren bad kitei ki khynnah, ki la iathuh ba ki ju pule, hynrei ym don pat kiba hikai bad ki kmie ki kpa ruh namar ba ki la trei shitom baroh shi sngi. Ki don ruh ka jingangnud ba lada ha u snem ban wan ka sorkar ka la phah plie biang ïa ki skul, ki kwah ban shong noh ha ka klass kaba kham halor.