Press "Enter" to skip to content

Nangne shakhmat yn hap register beit bad ka KHADC ban ïoh thaw ïing : Paul

Lait noh ki jaka ba hap hapoh ka Municipal bad Industrial Estate

Shillong, Jylliew 29 : Naduh nangne shakhmat kino kino kiba kwah ban thaw ïing ha ki jaka ba hap hapoh u pud u sam jongka Khasi Hills Autonomous District Council (KHADC) kin hap ban ïoh jingbit na ka tnad Building jongka Council tangba lait noh kito ki jaka ba hap hapoh u pud u sam ka Municipal bad Industrial Estate, ïathuh u Executive Member (EM) ka KHADC u ba dei peit ïa ka Tax bad Building u bah Paul Lyngdoh.
U la ïathuh ba ka KHADC kan sa thaw da kawei ka Agency ne Authority ba kyrpang ka ban peit beit tang ïa kane ka kam bad kumjuh ruh ban pynkhreh la ka jong ka Building Bye Laws ka ban kham jynsur na ka Building Bye Laws jongka sorkar jylla. Nalor kata ka bai register ne bai permission ruh kan kham tad na ka KHADC ban ïa ka jong ka sorkar.
“ Ngin leh ïa kane ban ïarap bad pynsuk ïa ki paidbah khamtam ha ki thaiñ nongkyndong namar kumba long mynta kam don ka jingpeit bad pynïaid ryntih ïa ka rukom tei ïing katba kane ka jaka ka dei kawei na ki jaka ba hap ha ka lynti ïaid jong u jumai kumta khnang ban peit ba ka rukom shna ïing ki long kiba skhem kumta la rai ban thung noh da ka Agency ne Authority hapoh ka Council ïa kaba yn sa jer kyrteng ynda la dep pynkhreh nadong shadong” ong u bah Paul Lyngdoh.
U la ïathuh kumba long mynta, ïa ka Building Bye Laws la nang pyntreikam hi da ka Building Bye Laws jongka sorkar jylla namar ka sorkar naduh ba ka pynmih ïa kane ka Building Bye Laws ha ka 1 tarik Rymphang 2019 ka la pynbna ruh ba ka KHADC ka lah ban pyndonkam lang da kane ka building bye laws na ka bynta kito ki jaka ba hap hapoh u pud u sam jongka.
U la ïathuh ba ka la don ka jingïamir jingmut bad u myntri kam pynroi sor ba ka KHADC ka dei ban don la ka jong ka tnad ban peit ïa kane ka aiñ khnang ban kham pynjem ne pynjynsur ïa ki kyndon kat kum ki jinglong jingman jong ki jaka kiba hap hapoh u pud ka Council.
Shuh shuh dang shen hapoh ka ïing dorbar jongka KHADC u bah Paul u la ïathuh ba dang shen ka Council ka la ïoh pdiang bad pyllait haduh 200 tylli ki aplikashon kiba la ai jingbit da ka Council ba kin thaw ïing bad kine ki la ïoh ruh ban shim ram na ki Bank. Kane ka la long ka jingiarap ba khraw ïa ki paidbah khamtam sha ki thaiñ nongkyndong.